Yoshua 2:1-24
2 Tsô Yoshua wan u Nun tindi iorov uhar myer, shighe u ve lu ken Shitim la+ ér ve za gba mker. A kaa a ve ér: “Za, za nenge nen tar la, hemban je yô, Yeriko.” Nahan ve yem ve za nyôr hen ya u agbagakwase ugen, iti na ér Rahabi,+ maa ve lu her.
2 I za ôr a tor u Yeriko ér: “Nenge! Ior mba ken Iserael va heen tugh mbun, sha u va gban mker ken tar ne.”
3 Tor u Yeriko ongo nahan yô, a tindi i za ôr Rahabi ér: “Due a nomso mba ve ve, ve lu hen ya wou la, sha ci u ve va sha u gban mker ken tar ne cii.”
4 Kpa kwase la za yer nomso mba uhar mbara. Nahan a kaa ér: “Een, ior mbara va hen a mo, kpa m fa ape ve mough ve ve ga.
5 Shi ime ngi va we, ka kom u a wuhe hundagar yô, ior mbara due yem. M fa ape ve yem ga, kpa aluer ne due fese ne zenda ve ijime yô, ne kohol ve.”
6 (Nahan kpa, a unde a ve sha haav mbu iyoughough, a za yer ve ken agongor a ada* a i tar aile aile sha haav mbu shon la.)
7 Nahan ior mba i tindi ve la zenda mbagbanmker mbara ijime, yem vegher u ahongo a ifi u Yordan la,+ maa mbazendanior mbara mba dugh kera yô, fese je i wuhe hundagar.
8 Cii man nomso mbara ve yav yô, Rahabi unde za sha haav mbura, ape ve lu la.
9 A za kaa a ve ér: “M fa Yehova una na ne tar ne,+ shi kwagh wen cier se iyol.+ Ior mba ve tem ken gar ne cii, mba cian gighir gighir sha kwagh wen,+
10 sha ci u se ungwa ser yange Yehova uma mngerem ma shin Zegemnger u Nyian sha ashe a en, shighe u ne due ken Igipiti la,+ kua kwagh u ne er a ator ahar a Mbaamor, ka Shihon+ man Ogo+ je la, mba ne tim ve yande* Yordan la.
11 Yange se mba ongo kwagh ne yô, mciem gba se iyol, shi kwagh wen na yô, ishima kera taver or môm ga, sha ci u Yehova Aôndo wen ka Aôndo u sha man tar cii.+
12 Hegen nea lumun yô, bum nen a mo ken iti i Yehova ner, er m er a ven doo doo yô, ne kpa ne er a mba hen ya u terem cii doo doo. Nahan a gba u ne nam ikyav i mimi.
13 Gba u ne war uma u terem man u ngôm kua u anmgbianev av mba nomso man mba kasev, man u ior vev cii, sha er ne yima se, se kpe ga yô.”+
14 Nomso mbara mba ongo nahan yô, ve kaa a na ér: “Se na uuma asev sha ci wen! Aluer ne pase or kwagh u se soo u eren ne ga yô, se er a ven doo doo man sha mimi, shighe u Yehova una na se tar ne la.”
15 Mba been yô, a kende kor sha windou, ve hungwa sha mi, sha ci u ya na suur ken kpekpe u gar la. Jighilii je yô, lu sha kpekpe la.+
16 Tsô a kaa a ve ér: “Yem nen hen haregh u iwoogh za yer nen her ayange atar, sha er mba ve lu zendan ne la vea zua a ven ga yô. Nahan mba ve lu zendan ne la vea hiden yô, ne mase yemen kwagh wen.”
17 Ior mbara kaa a na ér: “Se lu a ibo sha kwagh u u ne se bum ne ga.+
18 Nahan kpa, shighe u se va ken tar ne la, saa u ta kor u nyian bong sha windou, ape u va hongo a vese la. Shi u nyôr a teru man ngôu man anmgbianev ou, kua mba ve lu hen ya u teru cii ken iyou la.+
19 Nahan aluer or due ken iyou you la nan yem ken won yô, awambe a nan aa lu sha ityough ki nan, se yô, se lu a ibo ga. Kpa aluer or ngu ken iyou la vea we, man kwagh er nan* yô, awambe a nan aa lu sha ityouv yasev.
20 Kpa aluer u pase or kwagh u se soo u eren ne yô,+ se lu a ibo sha kwagh u u ne se bum a we ne ga.”
21 Tsô a kaa a ve ér: “I lu vough er ne ôr nahan.”
Nahan a na ve ian ér ve yem, maa ve kar ve yem kwagh ve. Mba yemen yô, a ta kor u nyian bong sha windou la.
22 Tsô ior mbagban mker mbara kar yem hen haregh u iwoogh la, ve za tsa her ayange atar zan zan ior mba ve lu zendan ve la kar hiden. Ior mba ve lu zendan ve la ker ve sha igbenda cii, kpa ve zua a ve ga.
23 Nahan nomsombaiorov mba uhar mbara hungwa sha iwo la, per ifi hide hen Yoshua, wan u Nun. Ve va pase un akaa a a er ve la cii.
24 Tsô ve kaa a Yoshua ér: “Yehova na se tar la cii.+ Shi ior mba ve tem ken tar la cii, mba cian gighir gighir sha kwagh wase.”+
