Yoshua 3:1-17
-
Mbaiserael per Yordan (1-17)
3 Tsô Yoshua nder pepe pepe, nahan un man Mbaiserael* cii ve mough hen Shitim+ ve va shin Yordan. Ve tsa her cii ve mase peren ye.
2 Ayange nga kar atar yô, mbavesen+ mbara zende ken afo la cii tser,
3 maa ve ôr a ior ér: “Zum u ne nenge Mbalevi mba ve lu upristi la, vea tôô areki u ikyuryan u Yehova Aôndo wen la vea karen yô,+ fese je, mough nen hen ijiir i ne lu la dondo nen un ijime.
4 Kpa lu nen ica a na i kuma er aseva 2,000* nahan; de kporom nen ikyua a na i hemban nahan ga, sha er ne fa gbenda u ne za yô, sha ci u ne mba a vande karen sha gbenda ne ga.”
5 Nahan Yoshua kaa a ior ér: “Wanger nen ayol a en,+ sha ci u kper Yehova una er akaa a kpilighyol hen atô wen.”+
6 Tsô Yoshua kaa a upristi ér: “Tôô nen areki+ u ikyuryan, kar hemen nen ior gbenda.” Maa ve tôô areki u ikyuryan la ve hemen ior gbenda.
7 Nahan Yehova kaa a Yoshua ér: “Nyian ne, me hii u nan we icivir sha ashe a Mbaiserael cii,+ sha er vea fa er me lu a we,+ er yange m lu a Mose nahan yô.+
8 Ôr upristi mba ve lu tôôn areki u ikyuryan la ve er kwagh ne, kaa a ve wer: ‘Ne za nyôron hen kpe u mngerem ma Yordan yô, hungwa nen shimi za tile nen ijiir i môm.’”+
9 Yoshua shi kaa a Mbaiserael ér: “Va nen heen, va ungwa nen akaa a Yehova Aôndo wen a ôr yô.”
10 Yoshua maa kaa ér: “Ka sha kwagh ne, ne fa er Aôndo u uma a lu hen atô wen,+ shi una zenda Mbakaanan man Mbahiti man Mbahivi man Mbaperishi man Mbagirgashi man Mbaamor kua Mbayebushi+ sha ishigh yenegh kera kpee, a bunde ga ye.
11 Nenge! Areki u ikyuryan u Ter u tar cii la hemen ne gbenda, ngu yemen shin Yordan.
12 Hegen yô, tsua nen iorov 12 ken uipyaven mba Iserael la, or môm ken hanma ipyaven,+
13 nahan akevangahar a upristi mba ve lu tôôn Areki u Yehova u a lu Ter u tar cii la, aa za benden a* mngerem ma shin Yordan yô, fese je, mngerem ma Yordan ma ma lu kuan sha, senen la ma a tôndo, ma a tile, er kpekpe nahan.”+
14 Tsô shighe u ior mough hen utenti vev sha u vea per Yordan la, upristi mba ve tôô areki+ u ikyuryan la kar hemen ior gbenda.
15 Upristi mba ve tôô Areki la mba za nyer shin Yordan shi mba hongo angahar hen kpemnger yô, fese nahan (sha shighe u sundan iyiav la cii Yordan a sar avenge),+
16 mngerem ma ma lu kuan senen la tile. Ma mough tav sha, er kpekpe nahan, gba ica kpishi a Adam, gar u lu ikyua a Saretan la, kpa gema mngerem ma ma lu kuan senen shin Zegemnger u Araba, ka Zegemnger u Bar* je la yô, uma, tôndo kera. Maa ior per, Yeriko gema lu ve sha ishi.
17 Er upristi mba ve tôô areki u ikyuryan u Yehova la tile ijiir i môm sha tareghnyaagh+ hen atô u Yordan la, Mbaiserael cii per sha tareghnyaagh+ zan zan ikyurior la cii kar peren Yordan been.
Ngeren mba shin kpe
^ Zwa Heberu, “ônov mba Iserael.”
^ Kuma er umita 890 nahan (kuma er angahar 2,920 nahan). Nenge Ngeren u Seer u B14 la.
^ Zwa Heberu, “hungwan shin.”
^ Ka Zegemnger u Kuugh je la.
