Yoshua 4:1-24
-
Awen ne aa lu kwagh u umbur (1-24)
4 Yange ikyurior la jimin cii peren Yordan yô, fese je Yehova kaa a Yoshua ér:
2 “Tsua iorov 12 ken ior, or môm ken hanma ipyaven,+
3 nahan ôr ve, ve er kwagh ne, kaa a ve wer: ‘Tôô nen awen 12 hen atô u Yordan, hen ijiir i upristi tile ijiir i môm la,+ maa yem nen a mi za ver nen ape ne tsa la.’”+
4 Tsô Yoshua yila iorov 12 mba a tsua ken Mbaiserael la, or môm ken hanma ipyaven,
5 nahan Yoshua kaa a ve ér: “Kar nen sha hemen u Areki u Yehova Aôndo wen, yem nen hen atô u Yordan, maa hanmô wen nana tôô iwen i môm sha kwende u nan, sha iyenge i uipyaven mba Mbaiserael la,
6 sha er kwagh ne una lu ne ikyav yô. Aluer ken hemen mbayev* enev pine ne ér, ‘Ne mba a awen ne sha ci u nyi?’ yô,+
7 kaa nen a ve ner: ‘Ka sha ci u yange mngerem ma Yordan tôndo sha ishigh ki areki+ u ikyuryan u Yehova la. Shighe u i lu peren a areki shin Yordan la, mngerem ma shin Yordan tôndo. Awen ne aa lu kwagh u ior i Iserael ia umbur gbem sha won yô.’”+
8 Tsô Mbaiserael er vough, er Yoshua kaa nahan. Ve tôô awen 12 hen atô u Yordan, er Yehova ôr a Yoshua nahan, sha iyenge i uipyaven mba Mbaiserael la. Ve yem a mi ve za ver hen ijiir i lu u vea tsa la.
9 Yoshua shi ver awen 12 hen atô u Yordan, hen ijiir i upristi mba ve tôô areki u ikyuryan tile la;+ awen la nga her zan zan nyian.
10 Upristi mba ve tôô Areki la tile hen atô u Yordan zan zan i kar eren hanma kwagh u Yehova kaa a Yoshua ér a ôr ior ve er la been, u zuan sha hanma kwagh u yange Mose ôr a Yoshua la cii. Hen shighe la cii, ior lu peren fele fele.
11 Ior cii mba peren mba been yô, fese je maa upristi mba ve tôô Areki u Yehova la per sha ashe a ior.+
12 Shi Mbaruben man Mbagadi man vegher-ipyaven u Manase la per er shoja i yemen ityav nahan;+ ve vande peren a Mbaiserael mbagenev, er Mose yange ôr a ve nahan.+
13 Ushoja mba kuman er 40,000 nahan, mba ve wa iyol i utya yô, per sha ishigh ki Yehova, yem hen taaikyôngo u Yeriko.
14 Sha iyange la, Yehova na Yoshua icivir sha ashe a Iserael cii,+ nahan sha ayange a uma na cii, ve naan un icivir tsung,* er yange ve naan Mose icivir tsung nahan.+
15 Tsô Yehova kaa a Yoshua ér:
16 “Kaa upristi mba ve tee areki+ u Shiada* la ve due shin Yordan kera.”
17 Nahan Yoshua kaa a upristi mbara ér: “Due nen shin Yordan kera.”
18 Upristi mba ve tôô areki+ u ikyuryan u Yehova la mba dugh hen atô u Yordan, shi akevangahar a upristi mbara nga za benden sha tar yô, mngerem ma shin Yordan hide gba kuan her, shi ma sar avenge+ er vande lun nahan.
19 Yange ior mbara per Yordan sha uwer u sha môm ayange pue, maa ve haa afo hen Gilgal,+ sha ikighir i Yeriko, vegher u sha ityoughkitaregh la.
20 Hide awen 12 a ve tôô shin Yordan la yô, Yoshua ver a hen Gilgal.+
21 Nahan a kaa a Mbaiserael ér: “Aluer ken hemen mbayev enev va pine uter vev ér, ‘Awen ne ka a nyi?’ yô,+
22 pase nen mbayev enev ner: ‘Yange Iserael per Yordan sha tareghnyaagh,+
23 zum u Yehova Aôndo uma mngerem ma shin Yordan sha ashe a ve, zan zan ve kar peren been, er Yehova Aôndo wen er a Zegemnger u Nyian, zum u uma un kera sha ashe a ase zan zan se kar peren been la nahan.+
24 Yange er kwagh ne sha er ior mba sha tar cii vea fa er uwegh ku Yehova ku lu a agee,+ man sha er ne cian Yehova Aôndo wen hanma shighe cii yô.’”
Ngeren mba shin kpe
^ Zwa Heberu, “ônov mba nomso.”
^ Zwa Heberu, “ve cian un.”
^ Ka areki u ikyuryan je la. Nenge Ngeren u Pasen Asember.
