Yoshua 7:1-26
7 Kpa Mbaiserael per tindi u Aôndo wa ve sha kwagh u lu u a tim kera la, sha ci u Akan+ wan u Karmi, wan u Sabedi, wan u Sera, ken ipyaven u Yuda, tôô akaa agen ken kwagh u lu u a tim kera la.+ Kwagh ne na yô, ishima vihi Yehova a Mbaiserael tsung.+
2 Tsô Yoshua tindi ior hen Yeriko ér ve za ken Ai,+ u a lu ikyua a Bete-aven man Betel,+ vegher u sha ityoughkitaregh la, a kaa a ve ér: “Kôndo nen za gba nen mker ken tar la.” Nahan ior mbara kôndo za gba mker ken Ai.
3 Ior mbara mba hidi hen Yoshua yô, ve kaa a na ér: “Ka ior cii i gbe u vea za ga. Iorov dubu uhar shin dubu utar tseegh kpa vea hemba Ai ityav. De ne wer ior cii ve vôr sha u kaan a ve wer ve za ityav mbira ga, sha ci u ior i Ai vese iyenge ga.”
4 Nahan iorov 3,000 kôndo za, kpa ve za yevese ior i Ai.+
5 Ior i Ai wua ve iorov 36 haa inya, shi ior i Ai zenda ve hii hen hundagar zan zan za nyôr Sebarim,* shi ve za hemen u wuan ve senen shin pev. Nahan asema a ior mbara sough, kua kera er mngerem nahan.
6 Kwagh ne na yô, Yoshua ande akondo a na shi gba cir ishigh inya sha ishigh ki Areki u Yehova zan zan aikighe, un man mbatamen mba ken Iserael, shi ve za hemen u kuran vuulevu haan sha mtom vem.
7 Yoshua kaa ér: “Aye, Yehova Ter u Hemban Cii, er nan u ve a ior mban cii ve va per Yordan sha er u gema se u na sha ikyev i Mbaamor wer ve tim se? Guda yange ma se gba lun Yordan yande* la tsô!
8 Aye Yehova, gba den mo kera tsô, ka nyi me ôr hegen er Iserael a yevese* mbahyomov nav nee?
9 Mbakaanan man mba ve tem ken tar la cii vea ungwa kwagh ne yô, vea va kase se vea bee a iti yase shin tar kera, nahan ka nyi kwagh u er sha kwagh u iti you i hemban laa?”+
10 Yehova kaa a Yoshua ér: “Mough sha! Er nan u yav u cir ishigh inyaa?
11 Mbaiserael er isholibo. Ve vihi tindi u ikyur+ i yange m ya a ve la. Ve tôô akaa agen ken kwagh u lu u a tim kera la,+ ve ii+ un shi ve va yer un ken akaa a ve.+
12 Sha nahan yô, Mbaiserael vea fatyô u hemban mbahyomov vev ityav ga. Vea gema ijime vea yevese mbahyomov vev, sha ci u ve hingir kwagh u i lu u a tim kera yô. Me kera lu a ven ga, zan zan saa ne kar been a kwagh u yange lu u a tim la hen atô wen kera.+
13 Mough sha, wanger ior!+ Kaa a ve wer, ‘Wanger nen ayol a en sha ci u kper, gadia ka kwagh u Yehova Aôndo u Iserael a kaa je ne, ér: “Kwagh u i lu u a tim la ngu hen atô wou, we Iserael. U kera fatyô u hemban mbahyomov ou ityav ga, zan zan saa u kar been a kwagh u i lu u a tim la hen atô wou kera.
14 Kper pepe, due kohol nen sha uipyaven uipyaven, nahan ipyaven u Yehova una tsua la+ a kporom ikyua sha icombor icombor, maa tsombor u Yehova una tsua la u kporom ikyua sha uya uya, gema ya u Yehova una tsua la, hanma or her nana kporom ikyua.
15 Maa or u a kôr nan a kwagh u i lu u a tim kera la, a nande nan sha usu,+ a nande nan kua akaa a nan lu a mi cii, sha ci u nan vihi ikyuryan+ i Yehova, man sha ci u nan er kwagh u kunya ken Iserael.”’”
16 Tsô kpernan Yoshua nderen pepe pepe yô, a kaa a Mbaiserael ér ve kporom ikyua sha uipyaven vev mbara, maa i tsua ipyaven u Yuda.
17 Nahan Yoshua kaa a icombor i Yuda ér i kporom ikyua, maa i tsua tsombor u Sera.+ Yoshua been yô, a kaa a hanma nomsoor ken tsombor u Sera ér nana kporom ikyua, maa i tsua Sabedi.
18 Maa u masen yô, a kaa a hanma nomsoor hen ya u Sabedi ér nana kporom ikyua, maa i tsua Akan wan u Karmi, wan u Sabedi, wan u Sera, ken ipyaven u Yuda.+
19 Tsô Yoshua kaa a Akan ér: “M zamber we wan wam, na Yehova Aôndo u Iserael icivir shi pase un isholibo you. M zamber, ôrom kwagh u u er la. De yeren mo a mi ga.”
20 Akan gema kaa a Yoshua ér: “Jighilii yô, ka mo m er Yehova Aôndo u Iserael isholibo ye, man ka kwagh u m er je ne.
21 Yange m nengen a ikyondo i taver ishe i doonashe i ken Shinar,+ man azurufa u yuhwan kuman ushekel* 200, man teran u zanaria u yuhwan kuman ushekel 50 ken ishar i i ya la yô sarem, nahan m tôô akaa shon. M yer a shin inya ken tenti wam, inyaregh kira gema ki shin atô.”
22 Maa fese je Yoshua tindi ior ve yevese ve za ken tenti la, nahan ve nenge i yer ikyondo la ken tenti u Akan, inyaregh kira gema lu shin atô.
23 Tsô ve tôô akaa la ve due a mi ken tenti la kera, ve va a mi hen Yoshua man hen Mbaiserael cii, ve va ver sha ishigh ki Yehova.
24 Nahan Yoshua man Mbaiserael cii kôr Akan+ wan u Sera, shi ve tôô azurufa man ikyondo i icivirigh man teran u zanaria la,+ shi ve kôr ônov nav mba nomso man mba kasev, man anomabua a na man ujaki nav man iyôngo na cii, shi ve tôô tenti na man hanma kwagh na cii, ve va a mi shin Pev* u Akor.+
25 Yoshua kaa ér: “Er nan u ve a kwaghbo* sha a vese?+ Nahan Yehova una va a kwaghbo sha a we nyian.” Ôron nahan yô, Mbaiserael cii ta un awen,+ mba been yô, ve nande ve sha usu.+ Nahan i ta ve cii awen.
26 Tsô ve ta zege tihi u awen sha ikyom na, ngu her zan zan nyian. Mba eren nahan yô, ishima i i vihi Yehova tsung la bee.+ Ka nahan ve iti i ijiir la i lu Pev* u Akor* zan zan nyian ye.
Ngeren mba shin kpe
^ Inja na yô ér, “Ijiir i Dughun Akaa Shin Inya.”
^ Ka vegher u sha ityoughkitaregh je la.
^ Shin “a gem ijime a.”
^ Shekel môm yange a yuhwa i kuma ugeram 11.4. Nenge Ngeren u Seer u B14 la.
^ Shin “Pev u Lun Gburumaa.”
^ Shin “zayol.”
^ Shin “Pev u Lun Gburumaa.”
^ Inja na yô ér, “Kwaghbo.”
