Eseta 9:1-32
9 Ken uwer u sha 12 ayange 13, ka uwer u Adar* je la,+ hen shighe u gba u a er sha imo i tor kua tindi na,+ sha iyange i mbahyomov mba Mbayuda hen ér vea hemba Mbayuda la, kera lu nahan ga, kpa Mbayuda gema hemba mba ve kôr ve ihyom la gburu gburu.+
2 Tsô Mbayuda kohol ken agar a ve, ken hanma kpentar* u Tor Ahasueru+ lu hemen la cii, sha er vea nôngo ityav a mba ve lu keren u bulan ve la yô, man or môm tile hendan kwagh a ve ga, sha ci u mciem gba hanma or iyol sha kwagh ve.+
3 Shi mbahemenev mba ikpentar* man mbatarev+ man ugomna kua mba ve eren tor tom la cii ve lu tan ikyaa a Mbayuda, sha ci u ve lu cian Mordekai.
4 Mordekai hingir or u tagher tagher+ hen ya u tor, shi gwa na lu samber ken ikpentar la* cii, sha ci u Mordekai lu zuan a tahav seer a seer.
5 Mbayuda gber mbahyomov vev cii sha sanker haa inya, ve wua ve shi ve tim ve; ve er kwagh u ve soo cii a mba ve kôr ve ihyom la.+
6 Mbayuda wua iorov 500 ken Shushan,*+ iyou i taver* la, ve tim ve.
7 Shi ve wua Parshandata man Dalfon man Asepata,
8 man Porata man Adalia man Aridata,
9 man Parmasheta man Arisai man Aridai man Vaisata,
10 ka ônov mba nomso pue mba Haman wan u Hamedata orhyom u Mbayuda la je la,+ kpa mba woo ve kera yô, ve kera ya ishar sha kwagh môm ga.+
11 Sha iyange la, i ôr tor ingyegh ki ior mba i wua ken Shushan,* iyou i taver* la.
12 Tsô tor kaa a Torkwase Eseta ér: “Mbayuda wua iorov 500 ken Shushan,* iyou i taver* heen shi ve tim ve, kua ônov mba Haman mba puev mbara. Nahan ken ikpentar i tor igen la* di ve gema ve er nena?+ Ka nyi i sar u hegene? A na u. Man ka nyi igen kpa u soo wer i ere? A er sha mi je.”
13 Eseta gema kaa ér: “Aluer tor nenge doo un yô,+ i na Mbayuda mba ve lu ken Shushan* la ian, kper kpa ve er kwagh u i we tindi ér i er nyian ne;+ shi i hambe ônov mba puev mba Haman mbara sha kon.”+
14 Nahan tor na zwa ér i er kwagh ne. Tsô i wa tindi ken Shushan,* nahan i za hambe ônov mba Haman mba puev mbara sha kon.
15 Mbayuda shi kohol ken Shushan* ken uwer u Adar ayange 14,+ ve wua iorov 300 ken Shushan,* kpa ve ya ishar sha kwagh môm ga.
16 Mbayuda mbagenev mba ken ikpentar i* tor la cii kpa kohol imôngo nôngo kwagh sha ci u uuma vev.+ Ve bee a mbahyomov vev kera,+ ve wua iorov 75,000 mba ve kôr ve ihyom la; kpa ve ya ishar sha kwagh môm ga.
17 Lu ken uwer u Adar, ayange 13, ve gema ve mem sha werayange 14 shi ve gema iyange la hingir iyange i eren iniongo shi ember.
18 Mbayuda mba ken Shushan* di ve kohol imôngo sha werayange 13+ man 14,+ kpa ve gema ve mem sha werayange 15, shi ve gema iyange la hingir iyange i iniongo man i ember.
19 Ka nahan ve Mbayuda mba ve lu ken agar agen la ve gema iyange i sha 14 i uwer u Adar hingir iyange i eren iniongo shi ember, man i eren msaanyol+ shi tindin ayol a ve a kwaghyan kpaa ye.+
20 Mordekai+ nger akaa a a er ne, shi a tindi a uwashika hen Mbayuda mba ve lu ken ikpentar i* Tor Ahasueru cii, mba ve lu ikyua man mba ve lu ica kpaa.
21 A kaa a ve ér ve umbur uwer u Adar ayange 14 man 15 hanma inyom cii,
22 sha ci u lu sha ayange la Mbayuda zua a mmem sha ikyev i mbahyomov vev ye, shi lu ken uwer la i gema ishimavihin ve hingir iember man ijungwen+ ve hingir msaanyol ye. Lu u vea umbur ayange ne sha u eren uiniongo shi ember shi tindin ayol a ve a kwaghyan shi nan mbaatsanev uiyua.
23 Nahan Mbayuda lumun ér vea za hemen u eren uiniongo mba ve hii u eren mban, shi vea er sha kwagh u Mordekai a nger ve la kpaa.
24 Sha ci u Haman+ wan u Hamedata Oragagu+ u kôr Mbayuda cii ihyom la yange er ayom sha er una tim Mbayuda yô.+ Shi a haa Pur,+ inja na yô ka Ishor je la, sha er una ta ve mciem iyol shi una tim ve yô.
25 Kpa zum u Eseta va sha ishigh ki tor yô, tor wa tindi i nger shin inya ér:+ “Kwaghbo u a we ishima u eren a Mbayuda la+ a hide sha ityough nagh.” Nahan i sende un vea ônov nav sha kon.+
26 Kwagh ne na yô, i gema yilan ayange la ér Purim* sha iti i Pur la.+ Nahan akaa a i nger ken washika la cii, kua akaa a Mbayuda nenge sha kwagh ne man akaa a a er ve la na yô,
27 ve kange ishima ér ve kua ônov vev man ior mba ve nyer nongo a ve cii,+ mayange vea bunde u eren iniongo sha ayange a ahar ne ga, shi vea eren hanma kwagh u i nger ér ve eren sha ayange shon la cii vough vough hanma inyom.
28 Yange gba u vea umbur ayange ne shi vea eren iniongo ne sha ikyov ikyov, sha hanma tsombor man ken hanma kpentar* man hanma gar, man lu u a hungur ayange a Purim ne hen Mbayuda ma shighe môm ga, vea za hemen u umbur a sha ikyov ikyov.
29 Tsô i nger washika u sha uhar sha kwagh u Purim la, nahan Torkwase Eseta, wan u Abihail, kua Mordekai Oryuda la, ve sue kwagh u i nger ken washika shon la sha tahav mbu ve lu a mi la cii.
30 I tindi a uwashika hen Mbayuda mba ve lu ken ikpentar* 127+ ken tartor u Ahasueru cii,+ i nger mkaanem ma bem man ma mimi ker
31 sha u suen kwagh u umbur ayange a Purim sha ashighe a i ver la, er Mordekai Oryuda kua Torkwase Eseta vande ôron ve nahan,+ man er ve ayol a ve kua ônov vev kpa ve kange ishima u eren nahan,+ kua u hôron kwaghyan+ shi eren mbamsen mba zamber kpaa.+
32 Tindi u Eseta shi seer suen kwagh u Purim la,+ shi i nger un ken takeda kpaa.
Ngeren mba shin kpe
^ Nenge Ngeren u Seer u B15 la.
^ Shin “ipyaventar.”
^ Shin “uipyaventar.”
^ Shin “uipyaventar mbara.”
^ Shin “Susa.”
^ Shin “ya u tor.”
^ Shin “Susa.”
^ Shin “ya u tor.”
^ Shin “Susa.”
^ Shin “ya u tor.”
^ Shin “uipyaventar mba tor mbagen mbara.”
^ Shin “Susa.”
^ Shin “Susa.”
^ Shin “Susa.”
^ Shin “Susa.”
^ Shin “uipyaventar mba.”
^ Shin “Susa.”
^ Shin “uipyaventar mba.”
^ Inja i Purim ér, “Asor a eren.” Yange i va gema yilan iniongo i Mbayuda eren ken uwer u sha 12 u kalenda ve la ér Purim. Nenge Ngeren u Seer u B15 la.
^ Shin “ipyaventar.”
^ Shin “uipyaventar.”
