Eseta 1:1-22
1 Sha ayange a Ahasueru* la, ka Ahasueru u yange hemen ikpentar* 127+ hii ken India zan zan ar ken Etiopia* la,
2 sha ayange la, zum u Tor Ahasueru tema sha ikyônough nagh ki torough ken Shushan,*+ iyou i taver,*
3 ken inyom i sha utar i hemen na la, a mir zegeiniongo sha ci u mbatarev nav man mbatomov nav. Ikyumutya i Pershia+ man Mede+ kua ashagbaaior man mbatarev mba ikpentar la* cii haa sha ishigh nagh gbir gbir.
4 A tese ve inyaregh nagh man iengem i tartor na kua shagba na man icivir na i hemban la ayange kpishi; ayange 180.
5 Ayange la nga been yô, tor er iniongo ayange ataankarahar sha ci u ior mba ve lu ken Shushan,* iyou i taver* la, mbavesen man mbakiriki cii, ken tembe u sule u ikyon u u lu hen ya u tor la.
6 I ta akondo a pupuu a engem man a sha mou u dedoo, kua a lun buluu-buluu,* sha ikyor i sha ikyondo i doonashe, man i sha mou u nyian dindee i lun a ikyunya i azurufa sha mi, i kange sha mtôm ma sha awen a mabel, shi i ver mkônom ma zanaria man ma azurufa sha varenda u i er sha awen a pofiri* man awen a mabel man sha tagbede kua awen a mabel a il yô.
7 Yange i haa wain shin ukôôpu mba* zanaria i na ior; hanma kôôpu yô lu kposo a ugen, shi wain u tor va a mi la ngee kpishi, sha indi i tor.
8 Yange i wa tindi sha kwaghman la ér i de kighir or ga,* gadia tor kaa a mbatomov mba vesen mba hen ya na ér i de hanma or nana er sha ishima i nan.
9 Torkwase Vaseti+ kpaa er kasev iniongo hen ya* u Tor Ahasueru.
10 Zum u tor ma wain saan un iyol sha iyange i sha utaankaruhar la yô, a kaa a Mehuman man Biseta man Harbona+ man Bigeta man Abageta man Setar kua Karkashi, mbatomov mba vesen utaankaruhar mba ve shiren Tor Ahasueru iyol na la,
11 ér ve va a Torkwase Vaseti sha ishigh ki tor, a̱ kange ityough ki* torkwase, sha er una tese ior man mbatarev mdoom nav yô, sha ci u yange doo kwase kpishi.
12 Er tor tindi mbatomov mba vesen mba hen ya na ve za yila Torkwase Vaseti nahan kpa, a zer vendan ér una va ga. Nahan kwagh ne na ishima vihi tor kpishi je lu yeghen a yegh.
13 Tsô tor lam a ior nav mba fan kwagh shi lun a mkav sha er una fa kwagh u i gbe u a er* yô (sha ci u kape i vaan a akaa a tor sha ishigh ki mba ve fa kwagh u atindigh kua ajiraôron je la,
14 man mba ve hemba lun ikyua ikyua a na yô lu Karshena man Shetar man Ademata man Tarshishi man Merese man Marsena kua Memukan, ka mbatarev utaankarahar+ mba Pershia man Mede mba yange ve zaan sha ishigh ki tor shi ve hemba lun tagher tagher ken tartor la je la).
15 Nahan tor pine ér: “Sha kwagh u tindi a tese yô, ka nyi i gbe u a er a Torkwase Vaseti? Sha ci u a venda u eren sha imo i Tor Ahasueru i mbatomov mba tor ôr un la.”
16 Tsô Memukan ôr kwagh sha ishigh ki tor man mbatarev, kaa ér: “Ka tor tseegh Torkwase Vaseti a er un kwaghbo ga,+ kpa ka mbatarev cii kua ior mba ken ikpentar i* Tor Ahasueru cii a er ve kwaghbo ye.
17 Gadia kasevmbayaav cii vea va fa kwagh u torkwase yange er la, nahan vea laha noov vev vea kaa ér, ‘Tor Ahasueru je kpa yange tindi ér i va a Torkwase Vaseti sha ishigh nagh kpa venda u van.’
18 Nyian je kasev mba mbatarev mba ken Pershia man Mede mba ve fe kwagh u torkwase a er ne vea lam a noov vev sha kwagh ne, nahan kwagh ne una va a ilyahan man ishimavihin kpishi.
19 Aluer tor nenge doo un yô, a wa tindi, i nger un ken atindi a Mbapershia man Mbamede a a geman ga la,+ ér mayange Vaseti a de kera ve sha ishigh ki Tor Ahasueru ga; shi tor a gema ian na i torkwase la a na kwase ugen u nan hembe un yô.
20 Nahan zum u ior cii vea ungwa tindi u tor ne ken tartor na u u kehe kpishi ne yô, kasev cii vea na noov vev icivir, mba vesen man mba kiriki cii.”
21 Kwagh u Memukan ôr ne doo tor kua mbatarev mbara, tsô tor er sha imo na.
22 Nahan a tindi a uwashika hen ikpentar i lu hemen i la* cii,+ hanma kpentar* sha gbenda u u ngeren kwagh yô, man hanma ikyurior kpaa ken zwa u i, ér hanma nom nana lu orvesen hen ya u nan shi nana lamen ken zwa u ior mba nan.
Ngeren mba shin kpe
^ I nenge ér ka un a lu Shaseta u sha 1, wan u Dariu u Tamen (u i yilan ér Dariu Hystaspis) la ye.
^ Shin “uipyaventar.”
^ Shin “Kushi.”
^ Shin “Susa.”
^ Shin “ya u tor.” Ikyav tese ér lu iyou i môm tseegh ga, kpa lu ayou a tor a vesen a kohol lu hen ijiir i môm, i wa a gir yô.
^ Shin “uipyaventar mbara.”
^ Shin “Susa.”
^ Shin “ya u tor.”
^ Ka awen a nyian a lun a acan a pupuu sha mi.
^ Shin “kwer.”
^ Shin “ayongo a.”
^ Shin “i de yangen or ga.”
^ Shin “kwa.”
^ Shin “adikpo u.”
^ Shin “gbenda u a er kwagh.” Zwa Heberu, “ashighe.”
^ Shin “uipyaventar mba.”
^ Zwa Heberu, “uipyaventar mba tor.”
^ Shin “ipyaventar.”
