Eseta 8:1-17
8 Sha iyange la, Tor Ahasueru gema ya u Haman+ orhyom u Mbayuda la,+ na Torkwase Eseta; shi Mordekai va sha ishigh ki tor sha ci u Eseta pase er a lu anngô na yô.+
2 Tsô tor tsua iyôgh nagh ki ken uwe ki veren ikyav a mi+ ki ngohol hen Haman la, gema na Mordekai. Shi Eseta gema ya u Haman wa sha ikyev i Mordekai.+
3 Heela tseegh ga, Eseta shi lam a tor. A gba hen angahar a na, a vaa, a zamber a na ér a sôr kwaghbo u Haman Oragagu er la, shi a bunde iferkwagh i a we ishima u eren Mbayuda la.+
4 Tor dugh tôgh nagh ku zanaria kura sha Eseta.+ Maa Eseta mough tile sha, sha ishigh ki tor.
5 A kaa ér: “Aluer ka sha ishima i tor shi doo un a mo, man aluer tor nenge doo un shi m doo un ishima yô, i nger tindi u una bunde kwagh u orayomogh Haman,+ wan u Hamedata Oragagu la,+ yange nger sha u timin Mbayuda ken ikpentar i* tor cii la.
6 Gadia a er nan man me kôrcio u kenger sha ican i ia va sha ior av laa? Man shi a er nan me nenge er a lu timin tsombor wama?”
7 Tsô Tor Ahasueru kaa a Torkwase Eseta kua Mordekai Oryuda la ér: “Nenge! M gema ya u Haman m na Eseta,+ shi m sende un sha kon,+ sha er a we ishima u tan num sha* Mbayuda yô.
8 Hegen ne fatyô u ngeren kwagh u ne nenge a doo sha ci u Mbayuda cii ken iti i tor, shi caghen ikyav i tor sha mi sha iyôgh ki tor ki ken uwe ki veren ikyav a mi. Gadia kwagh u i nger ken iti i tor shi i cagh ikyav i tor a iyôgh ki tor ki ken uwe ki veren ikyav a mi cii, a fatyô u geman un ga.”+
9 Tsô i yila mba ngeren tor kwagh sha shighe la, sha uwer u sha utar ayange 23, ka uwer u Shivan* je la, ve nger hanma kwagh u Mordekai na zwa cii, i tindi a mi hen Mbayuda kua hen utyombaiorov+ man ugomna man mbatarev mba ikpentar*+ hii ken India zan zan ar ken Etiopia, ikpentar* 127, hanma kpentar* sha gbenda u u ngeren kwagh la, man hanma ikyurior ken zwa u i, kua Mbayuda kpaa sha gbenda u ve ngeren kwagh la man ken zwa ve.
10 A nger kwagh la ken iti i Tor Ahasueru, a ver ikyav sha mi sha iyôgh ki tor ki ken uwe ki veren ikyav a mi,+ a tindi a kwagh u i nger la sha ikyev i mbazanaloho sha anyinya, ve henda anyinya a zan a loho fele fele, a i tsaase a sha ci u tom u tor yô.
11 I nger ken uwashika mbara ér tor na Mbayuda mba ken hanma gar cii ian ér ve kohol imôngo ve nôngo kwagh sha ci u uuma vev, ve tim shi ve wua shi ve bee a hanma ikyumutya i hanma nongoior shin kpentar,* i i va te num sha a ve cii, kua kasev man mbayev, shi ve ya ve ishar kpaa.+
12 Lu u kwagh ne una er sha iyange i môm ken ikpentar i* Tor Ahasueru hemen cii, sha werayange 13, uwer u sha 12, ka uwer u Adar* je la.+
13 Lu u washika ne una hingir tindi ken hanma kpentar* cii. Lu u a yôô un hen hanma nongoior, sha er Mbayuda vea wa iyol sha iyange la u oron iyev sha mbahyomov vev yô.+
14 Mbazanaloho mban henda anyinya a zan a loho a i ver sha ci u tom u tor la, ve za ayem fefa sha imo i tor. Shi i wa tindi ne ken Shushan,*+ iyou i taver* kpaa.
15 Tsô Mordekai kar sha ishigh ki tor kera a akondo a tor iyol a lun buluu-buluu* man a pupuu, a cir zegeidyer i tor i sha zanaria shi a cir ikyondo i i er sha mou u dedoo u nyian dindee yô.+ Tsô gar u Shushan* ger sha iember.
16 Mbayuda zua a mpeveryol* man msaanyol man iember kua icivir.
17 Ken hanma kpentar* man hanma gar, hanma ijiir i kwaghôron u tor man tindi na nyôr cii yô, saan Mbayuda iyol, ve lu ember eren uiniongo yan iwer. Ior kpishi ken tar la ve lu kaan ér ve mba Mbayuda,+ sha ci u kwagh u Mbayuda cier ve cii iyol.
Ngeren mba shin kpe
^ Shin “uipyaventar mba.”
^ Zwa Heberu, “a ze uwegh nagh sha u bulan.”
^ Shin “uipyaventar.”
^ Shin “ipyaventar.”
^ Shin “uipyaventar.”
^ Nenge Ngeren u Seer u B15 la.
^ Shin “ipyaventar.”
^ Shin “uipyaventar mba.”
^ Nenge Ngeren u Seer u B15 la.
^ Shin “ipyaventar.”
^ Shin “Susa.”
^ Shin “ya u tor.”
^ Shin “kwer.”
^ Shin “Susa.”
^ Zwa Heberu, “iwanger.”
^ Shin “ipyaventar.”
