Eseta 3:1-15
3 Akaa ne nga been yô, Tor Ahasueru ver Haman+ wan u Hamedata Oragagu+ sha ian i vesen, a kende a na sha, sha u veren un sha ian i hemban i* mbatarev mbagen mba ve lu vea na la cii.+
2 Nahan mbatomov mba hen ya u tor mba ve luun sha hunda u ya u tor la cii, ve ngurum shi ve yaven inya sha ishigh ki Haman, sha ci u ka kwagh u tor kaa ér i eren a na je la. Kpa Mordekai yô venda u ngurum shin yaven inya.
3 Nahan mbatomov mba tor mba ve lu sha hunda u ya u tor la pine Mordekai ér: “Er nan ve u lu peren tindi u toro?”
4 Hanma iyange yô ve zer pinen un kwagh ne, kpa a ungwa ve her ga. Nahan ve lam a Haman sha u vea fa aluer ka u a er kwagh sha ieren i Mordekai ne shin a er ga yô;+ gadia Mordekai ôr ve er un lu Oryuda yô.+
5 Haman va fe ér Mordekai venda u ngurum shin yaven un inya yô, ishima vihi un ker kpishi.+
6 Kpa u been a* Mordekai tseegh yô lu un kwagh u ihyeenegh, sha ci u i ôr un kwagh u ior mba Mordekai. Nahan Haman gba keren gbenda u timin Mbayuda mba ve lu ken tartor u Ahasueru la cii kera, ka ior mba Mordekai cica cii je la.
7 Ken uwer u hiihii, ka uwer u Nisan* je la, ken inyom i sha 12+ i Tor Ahasueru la, ve haa Pur+ (inja na yô, ve er Ishor) sha ishigh ki Haman sha u a fa iyange man uwer yô, nahan ishor la gba sha uwer u sha 12, ka uwer u Adar* je la.+
8 Haman maa kaa a Tor Ahasueru ér: “Ikyurior igen ngi i i sambe i i lu sha ajiir wue wue ken akuraior+ ken ikpentar i* ken tartor wou yô,+ atindi a ve kaha a atindi a ior mbagen cii, shi mba kuran atindi a tor ga. Man aluer tor de ve mba her yô vea bula un.
9 Tor a lumun yô, i nger tindi ér i tim ior mban kera. Mo me kimbi mbatomov mba tor utalenti* mba azurufa 10,000 ve za ver ken iyou i tor i koson inyaregh.”*
10 Tsô tor tsua iyôgh nagh ki ken uwe ki veren ikyav a mi+ gema na Haman+ wan u Hamedata Oragagu,+ u lu orhyom u Mbayuda la.
11 Tor kaa a Haman ér: “M na u azurufa* man ior mbara, er a ve er u nenge i doo u la.”
12 Maa i yila mba ngeren tor kwagh+ sha uwer u hiihii la ayange 13. Ve nger+ hanma kwagh u Haman ôr cii, hen utyombaiorov mba tor kua ugomna mba ken ikpentar* man mbatarev mba akuraior kposo kposo, hanma kpentar* sha gbenda u u ngeren kwagh yô, man hanma ikyuior ken zwa u i. I nger ken iti i Tor Ahasueru shi i cagh ikyav i tor sha iyôgh ki tor ki ken uwe ki veren ikyav a mi.+
13 I tindi a uwashika mbara sha ikyev i mbazanaloho hen ikpentar i* tor cii, i na wada ér i bee a Mbayuda, i wua ve, i tim ve cica cii kera; agumaior man mbabeenyol, mbayev man kasev cii ken iyange i môm, ken uwer u sha 12 ayange 13 la, inja na yô ka uwer u Adar je la,+ shi i ya ishar sha akaa a ve kpaa.+
14 Lu u kwagh u i nger ken washika la una hingir tindi ken hanma kpentar* shi a yôô un hen ior cii, sha er vea wa iyol vea lu keghen a kegh iyange la yô.
15 Mbazanaloho mbara yange ve za fese+ sha wada u tor na ve la; tindi la yange due ken Shushan,*+ iyou i taver.* Maa tor vea Haman hide tema inya gba man kwagh, kpa anzughul gema gba ken gar u Shushan.*
Ngeren mba shin kpe
^ Zwa Heberu, “ikyônough ki hemban ki.”
^ Shin “u wuan.”
^ Nenge Ngeren u Seer u B15 la.
^ Nenge Ngeren u Seer u B15 la.
^ Shin “uipyaventar mba.”
^ Shin a fatyô u kaan ér, “me kimbi utalenti mba azurfa 10,000 ken iyou i tor i koson inyaregh, sha ci u ior mba vea er tom ne la.”
^ Talenti môm yange a yuhwa i kuma ukilogeram 34.2. Nenge Ngeren u Seer u B14 la.
^ A fatyô u lun azurfa u una za ya Mbayuda ishar sha mi la.
^ Shin “ipyaventar.”
^ Shin “uipyaventar.”
^ Shin “uipyaventar mba.”
^ Shin “ipyaventar.”
^ Shin “Susa.”
^ Shin “ya u tor.”
^ Shin “Susa.”
