Eseta 7:1-10
7 Tsô tor vea Haman+ ve va nyôr hen iwer i Torkwase Eseta yôr la.
2 Mba va ngur man wain sha iyange i sha uhar i iniongo la yô, tor shi pine Eseta ér: “Ka nyi u soo wer i er u, Torkwase Eseta? A er u un. Man ka nyi u soo wer i na u we? Aluer ka vegher u tartor wam je kpaa a na u!”+
3 Torkwase Eseta gema kaa ér: “Aluer doo u a mo yô tor, man aluer tor nenge doo un yô, m ngu zamber mer ma a shi de ma m lu uma her,* mo kua ior av.+
4 Sha ci u i tee se,+ mo kua ior av, sha u i bee a vese kera, i wua se, shi i tim se kpaa.+ Luun er i tee se ér se lu ikpan i nomso man i ukase kpa, ma m gba huan ving tsô. Kpa ican la i doo ga, sha ci u ia va tor a zayol kpishi.”
5 Tor Ahasueru maa pine Torkwase Eseta ér: “Ka an oro? Or shon u nan cihi nan er imbakwagh ne la nan ngu hana?”
6 Eseta maa kaa ér: “Orayongo man orhyom u nan er kwagh ne la ka Haman iferor ne.”
Tsô cier Haman iyol a tor man torkwase.
7 Tsô tor mough hen iniongo i wain la a ishima i vihin yem ken sule u ikyon u hen ya u tor, kpa Haman mough sha u zamber a Torkwase Eseta sha ci u uma na, gadia a kav er tor wa ishima u tsahan un kpee je yô.
8 Tor za hidi hen sule u ikyon u hen ya u tor va nyer ken iyou i iniongo i wain la yô, a nenge Haman kporom va yav sha ikyônough ki Eseta tema sha mi la. Maa tor nande kaa ér: “Shi ka u una kighir torkwase a yav a na ken iyou yamaa?” Mkaanem man ma dugh tor ken zwa je maa, i va cir Haman ishigh.
9 Harbona,+ môm ken mba eren tom hen ya u tor maa kaa ér: “Haman tim ityôgh sha er una sende Mordekai+ or u yange ôr kwagh u waren tor la+ sha mi yô. Ki ken ya u Haman, ki tav aseva 50.”* Maa tor kaa ér: “Za sende un nen sha mi.”
10 Tsô i za sende Haman sha ityôgh ki tim sha ci u Mordekai la, maa ishima gba tor shimi.
Ngeren mba shin kpe
^ Zwa Heberu, “ma a nem uma wam.”
^ Kuma umita 22.3 (angahar 73). Nenge Ngeren u Seer u B14 la.
