Eseta 4:1-17
4 Zum u Mordekai+ ungwa kwagh u i er ne yô,+ a ande akondo a na, a hua akondo a zungwen shi a haa inya shin ityo. Tsô a due a yem ken atô gar a gba za vaan genger genger.
2 A za zan zan a za kighir sha hunda u ya u tor, sha ci u or nyôron ken ya u tor a akondo a zungwen iyol ga.
3 Shi ken hanma kpentar+* u tindi u tor ne za ar her la cii, Mbayuda lu zungwen kpishi, ve lu hôron kwaghyan+ shi vaan genger genger. Mbakpishiv hua akondo a zungwen ve lu viligh shin mtuhwe.+
4 Mbatomov mba Torkwase Eseta mba kasev man mba nomso mba va er un kwagh ne yô ishima za un iyol kpishi. Nahan a tindi a akondo ér i za na Mordekai, a er akondo a zungwen la kera a gema a hua a ngara, kpa a venda.
5 Tsô Eseta yila Hataki, môm ken mba eren tom ken ya u tor, u tor ver un ér a eren Eseta tom la, a kaa a na ér a za pine Mordekai, a fa inja i kwagh ne man kwagh u a lu zan hemen yô.
6 Tsô Hataki due za kohol Mordekai sha tembe hen ishigh ki hunda u ya u tor.
7 Mordekai maa ôr un hanma kwagh u a er un yô, kua inyaregh+ ki Haman a tôndo zwa ér una kimbi ken iyou i tor i koson inyaregh, sha u i tim Mbayuda la kpaa.+
8 Shi a na un kôpi u tindi u i wa ken Shushan*+ ér i tim ve la. A kaa a na ér a tese Eseta shi a pase un kwagh ne, a kaa un yô,+ a za hen tor jighilii a za zamber a na sha ci u ior nav.
9 Hataki hide va ôr Eseta kwagh u Mordekai ôr la.
10 Eseta di shi ôr Hataki kwagh u una za ôr Mordekai yô, ér:+
11 “Mbatomov mba tor cii, kua ior mba ken ikpentar i* tor cii fa ér, aluer tor yila or ga tsô nan mough nan za nyôr ken tembeya na u ken atô+ la yô, a̱ lu nomsoor shin kwase kpaa tindi ngu môm tseegh u una kôr nan yô: A wua nan kpee je. Kwagh u una na ve nana war yô, saa di tor dugh tôgh nagh ku zanaria kura sha a nan.+ Man mba a yilam ér mo m za hen tor ga ka ayange 30 je ne.”
12 Mba va ôron Mordekai kwagh u Eseta ôr la yô,
13 a hide a tindi loho hen Eseta ér: “De henen wer u ngu ken ya u tor yô u hemba ngun sha ian i waren kwagh ne a Mbayuda mbagen cii ga.
14 Aluer u huan ving hen shighe ne yô, Mbayuda vea zua a mpever man myom hen ijiir igen,+ kpa we man ya u teru yô ne tim. Man aluer ka sha ci u kwagh ne u hingir u za lun sha ian i torkwase yô ka an nan fe?”+
15 Maa Eseta tindi i za kaa Mordekai ér:
16 “Za za kohol Mbayuda mba ve lu ken Shushan* cii, hôr nen kwaghyan+ sha ci wam. De ye nen kwagh ga shi de me nen kwagh ga tugh man atetan, zan zan ayange atar.+ Mo kua mbatomov av mba kasev kpaa se hôr kwaghyan. Me za hen tor, shin er i lu sha tindi ga nahan kpaa, aluer ka u me kpe yô me kpe di je.”
17 Nahan Mordekai yem za er hanma kwagh u Eseta kaa un cii.
