Eseta 5:1-14
5 Sha iyange i sha utar la+ Eseta hua akondo a na a torkwase, maa a za tile ken tembe u ken atô u ya u tor, a tile a ver ishigh ken iyou i tor shighe u tor tema sha ikyônough nagh ki torough ken iyou na i i ne ishigh sha hunda la.
2 Er tor nenge a Torkwase Eseta tile hen tembeya yô doo un a na, nahan tor naregh tôgh nagh ku zanaria ku kôr ken uwe la sha Eseta.+ Eseta maa kporom va bende uwegh sha ityough ki tôgh kura.
3 Tor pine un ér: “Ka nyi i ere, Torkwase Eseta? Ka nyi u soo wer i na u we? Aluer ka vegher u tartor wam je kpaa a na u!”
4 Eseta gema kaa a na ér: “Tor a nenge a doo un yô a va ya iwer i m yer un la nyian vea Haman.”+
5 Tsô tor kaa a ior nav ér: “Kaa nen Haman a va fese er Eseta a ôr nahan.” Tor maa za u za yan iwer i Eseta yôr la vea Haman.
6 Mba va ngur man wain yô, tor pine Eseta ér: “Ka nyi u soo wer i er u we? A er u un! Man ka nyi u soo wer i na u we? Aluer ka vegher u tartor wam je kpaa a na u!”+
7 Eseta gema kaa a na ér: “Kwagh u a sarem man u m soo mer i erem yô ka un ne,
8 Aluer doo tor a mo shi tor soo u eren mo kwagh u a sarem shi nan mo kwagh u m sen yô, tor vea Haman ve va iwer i me yôr ve kper la; nahan kper me er kwagh u tor a kaa la.”
9 Sha iyange la Haman due saan saan shi ishima doo un ker. Kpa zum u Haman nenge a Mordekai sha hunda u ya u tor, shi kav er Mordekai mough sha gbidye akarkase iyol sha ishigh nagh ga yô, ishima vihi un ker a Mordekai.+
10 Nahan kpa, Haman kôr iyol na tsaha yem ken ya na. Maa a tindi i za yila azende a na kua kwase na Sereshi.+
11 Tsô Haman gba tan ihyagh sha inyaregh ki un lu a mi kpishi la, kua sha kwagh u ônov mba nomso mba un ngee a mi la,+ man er tor a ver un sha ian i vesen shi a kende a na sha i hembe mbatarev kua mbatomov mba tor cii yô.+
12 Haman shi kaa ér: “Heela tseegh ga, ka mo tseegh Torkwase Eseta a lehem ér m za ya iwer i un yôr+ la vea tor ye, a lôhô orgen môm ga. Shi a lôhôm ér kper la kpa mo m za ya iwer vea na kua tor.+
13 Kpa ka mea nenge a Mordekai Oryuda la una tema sha hunda u ya u tor nahan akaa ne cii a kera nam msaanyol ga.”
14 Nahan kwase na Sereshi kua azende a na cii kaa a na ér: “Tim ityôgh ki tav aseva 50.* Kper pepe yô ôr tor i va sende Mordekai sha ki,+ maa yem vea tor za ya nen tar hen iwer i i yer ne la.” Mhen ne doo Haman nahan a kaa ér i tim ityôgh kira.
Ngeren mba shin kpe
^ Tav kuma umita 22.3 (angahar 73). Nenge Ngeren u Seer u B14 la.
