Skip to content

Skip to table of contents

 OINSÁ ATU BELE MORIS KONTENTE

Saúde no adapta ho situasaun foun

Saúde no adapta ho situasaun foun

EMA NIA MORIS BELE IHA MUDANSA BOOT BAINHIRA HETAN MORAS NEʼEBÉ SUSAR ATU KURA. Uluk mane ida naran Ulf iha saúde diʼak no ativu tebes, maibé ikusmai ninia isin sai maten. Nia esplika ninia sentimentu, hodi dehan: “Haʼu hetan moras depresaun. Haʼu lakon haʼu-nia forsa, aten-brani no kbiit . . . haʼu sente la iha folin.”

Ulf nia esperiénsia fó-hanoin ba ita katak ita la iha kbiit atu kontrola situasaun hotu. Maibé, ita bele hamenus risku atu kona moras. Se nuneʼe, oinsá se ita-nia saúde sai aat ba beibeik? Neʼe katak ita la bele moris ho kontente ka lae? Ita sei buka-hatene kona-ba neʼe. Primeiru, mai ita haree matadalan balu husi Bíblia kona-ba oinsá atu bele mantein saúde neʼebé diʼak.

KONTROLA ITA-NIA TOMAN. (1 Timóteo 3:2, 11) Toman atu han no hemu demais mak ladiʼak ba ita-nia saúde, no neʼe mós gasta osan barak! Bíblia hatete: “Keta sai hanesan ema neʼebé hemu tua demais, ema neʼebé han naʼan demais, tanba ema neʼebé lanu-teen no kaan-teen sei sai kiak.”​—Provérbios (Amsal) 23:20, 21.

KETA HAFOʼER ITA-NIA ISIN. “Mai ita hamoos ita-nia an husi buat hotu neʼebé hafoʼer isin no laran.” (2 Korinto 7:1) Ema hafoʼer sira-nia isin kuandu sira uza tabaku, droga no hemu tua demais. Porezemplu, relatóriu ida husi U.S. Centers for Disease Control and Prevention hatete katak fuma “bele hamosu moras oioin no bele estraga maizumenus orgaun hotu iha ita-nia isin-lolon”.

HAFOLIN ITA-NIA ISIN NO MORIS. “Liuhusi [Maromak] mak ita hetan moris, book an no iha.” (Apóstolu 17:28) Ita bele hatudu katak ita hafolin ita-nia moris hodi la tau ita-nia an iha perigu laran bainhira serbisu, lori transporte ka hili atividade halimar nian. Se ita la kuidadu, ita bele hetan rezultadu aat hanesan sai defisiente.

KONTROLA EMOSAUN NEGATIVU. Ita-nia emosaun bele kona ita-nia saúde. Entaun, koko atu la hanoin barak, la sai hirus lalais, la laran-moras, no sentimentu seluk neʼebé ladiʼak. Salmo 37:8 hatete: “Husik tiha hirus no soe tiha laran-nakali.” Eskritura seluk mós hatete: “Keta hanoin barak  kona-ba loron tuirmai, basá loron tuirmai iha ninia susar rasik.”​—Mateus 6:34.

KOKO ATU HANOIN POZITIVU. Provérbios 14:30 hatete: “Laran neʼebé kalma fó moris ba isin.” Eskritura seluk mós hatete: “Laran neʼebé kontente mak ai-moruk neʼebé diʼak.” (Provérbios [Amsal] 17:22) Tuir loloos neʼe konsellu neʼebé kapás. Doutór ida iha rai-Eskósia, hatete: “Se ita mak ema neʼebé kontente, ita sei ladún kona moras iha futuru se kompara ho sira neʼebé la kontente.”

ADAPTA HO SITUASAUN FOUN. Hanesan ho Ulf, neʼebé temi ona, karik ita mós hasoru hela susar neʼebé ita tenke tahan ba tempu kleur. Maski nuneʼe, ita bele buka dalan oinsá atu tahan. Ema balu nia situasaun halo sira sente laran-triste tebes, no neʼe bele halo susar liután atu tahan. Provérbios 24:10 hatete: “Se ó sai laran-triste iha tempu susar, ó-nia kbiit sei sai menus.”

Ema balu bele adapta ho sira-nia situasaun foun no hatene oinsá atu tahan, no ikusmai ladún sente triste hanesan uluk. Ulf mós hanesan neʼe, nia esplika katak nia halo orasaun beibeik no hanoin kleʼan kona-ba Bíblia nia mensajen. Ikusmai, nia komesa fokus deʼit ba buat neʼebé nia bele halo. Laʼós neʼe deʼit, nia mós aprende oinsá atu hatudu laran-sadiʼa no hanoin ema seluk, no neʼe book nia atu fahe Bíblia nia mensajen hodi fó kmaan ba ema seluk.

Mane seluk naran Steve mós hasoru situasaun susar. Bainhira nia tinan 15 nia monu husi ai leten no neʼe halo ninia isin sai maten husi kabaas toʼo ain. Bainhira nia tinan 18 ninia liman komesa book an fali. Tuirmai nia bá universidade no nia komesa uza droga, hemu tua demais, no halo hahalok la morál. Nia sente la iha esperansa, maibé nia komesa estuda Bíblia no neʼe fó esperansa ba nia no mós ajuda nia atu troka ninia toman aat sira. Nia hatete: “Ba tempu kleur haʼu la sente kontente, maibé agora haʼu sente kontente no moris ho dame.”

Steve no Ulf nia esperiénsia halo ita hanoin kona-ba eskritura iha Salmo 19:7, 8, neʼebé dehan: “Jeová nia ukun-fuan mak perfeitu, halo ema hetan fali kbiit. . . . Jeová nia orden mak loos, halo ema nia laran haksolok; Jeová nia mandamentu mak moos, halo ema nia matan nabilan.”