Primeiru Timóteo 3:1-16

  • Kritéria atu simu knaar nuʼudar katuas (1-7)

  • Kritéria atu sai atan ba kongregasaun (8-13)

  • Segredu santu kona-ba laran-metin ba Maromak (14-16)

3  Liafuan tuirmai neʼe mak loos: Se mane ida hakaʼas an atu simu knaar nuʼudar katuas,*+ nia hakarak halo serbisu neʼebé diʼak.  Katuas ida* tenke halaʼo nia moris ho didiʼak atu ema la hetan razaun atu duun nia, tenke iha feen ida deʼit, kontrola ninia hahalok, iha hanoin neʼebé loos,*+ moris iha dalan neʼebé loos,* simu ema ho laran-diʼak,*+ iha kbiit atu hanorin,+  la lanu-teen,+ la halo violénsia,* la ulun-toos,*+ la istori malu,+ la hadomi osan.+  Nia tenke tau matan ba ninia família iha dalan neʼebé diʼak, no ninia oan sira halo tuir no hatudu hahalok diʼak,*+  tanba se mane ida la hatene tau matan ba ninia umakain rasik, oinsá mak nia sei tau matan ba Maromak nia kongregasaun?*  Nia laʼós ema neʼebé foin sai fiar-naʼin,+ atu nuneʼe nia la sai foti an no simu tesi-lia neʼebé Diabu mós simu ona.  Liután neʼe, nia tenke iha naran diʼak* ho ema neʼebé laʼós parte ba kongregasaun,+ atu nuneʼe ema labele hatete aat* nia no nia la monu ba Diabu nia lasu.  Atan ba kongregasaun mós tenke sériu,* la laran-makerek,* la hemu tua barak, la buka atu manán buat ruma ho laran-makerek,+  kaer metin ba segredu santu kona-ba fiar ho konxiénsia neʼebé moos.+ 10  No mós, koko uluk nia atu haree se nia diʼak* ba knaar neʼe ka lae; tuirmai nia bele serbí nuʼudar atan, tanba ema ida la iha razaun atu duun nia.+ 11  Feto sira mós tenke sériu,* la koʼalia aat hodi hafoʼer ema seluk nia naran,+ kontrola ninia hahalok, no laran-metin iha buat hotu.+ 12  Atan ba kongregasaun tenke iha feen ida deʼit, tau matan ba ninia oan sira no ninia umakain iha dalan neʼebé diʼak. 13  Tanba mane sira neʼebé serbí iha dalan neʼebé diʼak, sira hetan naran diʼak no koʼalia nakloke kona-ba fiar iha Kristu Jesus. 14  Maski haʼu hein katak lakleur tan haʼu sei bá haree ó, maibé haʼu hakarak hakerek buat sira-neʼe ba ó, 15  atu nuneʼe, se karik haʼu demora, ó bele hatene oinsá ó tenke moris iha Maromak nia umakain,+ neʼe katak Maromak moris nia kongregasaun, neʼebé nuʼudar ai-riin no fundasaun ba lia-loos. 16  Tuir loloos, segredu santu kona-ba laran-metin ba Maromak* mak importante duni: ‘Nia hatudu sai nia an iha isin,+ Maromak fó sai katak nia laran-loos kuandu nia sai espíritu ida,+ nia mosu ba anju sira,+ ema haklaken kona-ba nia iha nasaun sira-nia leet,+ mundu tau fiar ba nia,+ no Maromak simu nia iha lalehan ho glória.’

Nota-rodapé

Ka “katuas neʼebé tau matan no proteje kongregasaun”. Haree “Katuas” iha Glosáriu.
Ka “Katuas neʼebé tau matan no proteje kongregasaun”.
Ka “hatene halo desizaun diʼak; matenek”.
Ka “halo nia serbisu la ho runguranga”.
Ka “tau matan ba ema oin-foun”.
Ka “la koʼalia liafuan kroʼat”.
Ka “prontu atu simu ema seluk nia hanoin”.
Ka “ninia oan sira halo tuir ho sériu”.
Ka “reputasaun diʼak”.
Ka “labele hamoe”.
Ka “tenke hatudu hahalok diʼak”.
Ka “la koʼalia liafuan bosok”.
Ka “se nia kumpre kritéria”.
Ka “tenke hatudu hahalok diʼak”.
Ka “kona-ba devosaun ba Maromak”. Haree “Devosaun ba Maromak” iha Glosáriu.