Skip to content

Skip to table of contents

 OINSÁ ATU BELE MORIS KONTENTE

Kontente ho buat neʼebé ita iha no hatudu laran-luak

Kontente ho buat neʼebé ita iha no hatudu laran-luak

EMA BARAK FIAR KATAK SASÁN NO RIKUSOIN MAK HALO EMA KONTENTE. Hanoin neʼe book ema millaun ba millaun atu serbisu ba oras barak atu sai riku. Maibé ita bele hetan kontente neʼebé loos husi osan no rikusoin ka lae? Evidénsia ohin loron hatudu saida?

Livru ida (Journal of Happiness Studies) esplika katak se ita iha ona ita-nia presiza loron-loron nian, osan barak liután sei la halo ita-nia moris sai kontente liu. Problema sira la mai husi osan, maibé hanesan livru ida tan (Monitor on Psychology) esplika: “Hakaʼas an demais atu hetan osan mak halo ita la sente kontente.” Liafuan sira-neʼe atu hanesan ho matadalan iha Bíblia neʼebé hakerek maizumenus tinan rihun rua liubá: “Basá domin ba osan mak hun ba buat aat oioin, no tanba hadomi osan ema balu . . . fó kanek oioin ba sira-nia an.” (1 Timóteo 6:9, 10) Fó kanek iha dalan oinsá?

ESTRESE NO TOBA LADIʼAK TANBA TAʼUK LAKON RIKUSOIN. “Atan neʼebé serbí ema seluk sei toba-dukur loos, maski nia han uitoan ka barak, maibé ema riku nia rikusoin sei halo nia labele toba-dukur.”​—Eclesiastes (Pengkhotbah) 5:12.

TRISTE MASKI IHA RIKUSOIN BARAK. Tuir loloos, ita nunka bele kumpre ita-nia hakarak ba osan. Bíblia hatete: “Ema neʼebé hadomi osan-mutin sei nunka sai kontente ho osan-mutin, nuneʼe mós, ema neʼebé hadomi rikusoin sei nunka sai kontente ho rikusoin neʼebé nia hetan ona.” (Eclesiastes [Pengkhotbah] 5:10) Laʼós neʼe deʼit, ita-nia hakarak neʼe mós bele halo ita atu husik buat importante liu neʼebé lori kontente, hanesan tempu ba família no belun ka tempu atu adora Maromak.

TRISTE NO ESTRESE BAINHIRA LAKON RIKUSOIN. “Keta halo kole ó-nia an atu hetan rikusoin. Labele halo tan ida-neʼe, maibé hatudu matenek bá. Bainhira ó hateke ba rikusoin, neʼe la iha ona, tanba rikusoin neʼe sei iha liras hanesan manu-makikit no semo ba lalehan.”​—Provérbios (Amsal) 23:4, 5.

 HAHALOK SIRA NEʼEBÉ LORI KONTENTE

KONTENTE HO BUAT NEʼEBÉ ITA IHA. “Ita la lori buat ida mai mundu neʼe, no ita mós la bele lori sai buat ida husi mundu neʼe. Entaun, se ita iha ai-han, hatais no hela-fatin, ita kontente ona ho buat sira-neʼe.” (1 Timóteo 6:7, 8) Ema neʼebé kontente ho buat neʼebé sira iha, baibain la muramura no la sente laran-moras. No tanba sira la kaan sasán neʼebé sira la iha kbiit atu sosa, neʼe ajuda sira atu la sente laran-susar no estrese.

HATUDU LARAN-LUAK. “Kontente liu atu fó duké simu.” (Apóstolu 20:35) Ema neʼebé laran-luak mak kontente tanba sira gosta atu halo ema seluk kontente, maski buat neʼebé sira bele fó mak sira-nia forsa no tempu uitoan deʼit. Baibain, sira hetan buat neʼebé la bele sosa ho osan, neʼe mak domin, respeitu, no belun diʼak neʼebé mós hatudu laran-luak!​—Lucas 6:38.

TAU ULUK EMA DUKÉ SASÁN. “Diʼak liu han modo-tahan bikan ida hamutuk ho domin duké han naʼan neʼebé diʼak liu hamutuk ho odi.” (Provérbios [Amsal] 15:17) Neʼe katak sá? Ita-nia relasaun diʼak ho ema seluk mak diʼak liu fali rikusoin. No atu bele hetan kontente ita presiza domin.

Feto ida husi rai-Amérika Súl naran Sabina aprende oinsá Bíblia nia matadalan ajuda nia. Ninia laʼen husik hela nia, tan neʼe Sabina presiza serbisu makaʼas atu bele sustenta ninia an no oan-feto rua. Loron-loron nia presiza hadeer tuku haat madrugada tanba nia iha serbisu rua. Maski nia okupadu tebes, maibé Sabina deside atu estuda Bíblia. Oinsá mak estuda Bíblia ajuda nia?

Maski ninia situasaun ekonomia la troka, maibé ninia hanoin kona-ba moris mak troka! Ezemplu ida mak, nia sente kontente tanba bele aprende kona-ba Maromak nia matadalan. (Mateus 5:3) Nia mós hetan belun diʼak neʼebé hadomi Maromak. No nia sente kontente tanba bele fahe ba ema seluk buat neʼebé nia aprende husi Bíblia.

Bíblia hatete: “Liuhusi ema nia hahalok loos mak nia hatudu sai ninia matenek.” (Mateus 11:19) Entaun atu hatudu katak ita mak ema matenek, ita presiza hatudu hahalok loos hanesan kontente ho buat neʼebé ita iha, hatudu laran-luak no mós tau uluk ema duké sasán.