Skip to content

Skip to table of contents

 OINSÁ ATU BELE MORIS KONTENTE

Fó perdua

Fó perdua

PATRICIA HATETE: “BAINHIRA HAʼU KIʼIK, HAʼU SEMPRE RONA LIAFUAN AAT NO HAKILAR MALU. Haʼu la aprende oinsá atu fó perdua. Maski haʼu boot ona, kuandu ema seluk hakanek haʼu, haʼu sempre hanoin beibeik kona-ba problema neʼe toʼo toba ladiʼak.” Loos duni, se ita-nia moris nakonu ho odi no hirus, neʼe sei halo ita la sente kontente. Tuir loloos, estudu ida fó sai katak baibain ema neʼebé lakohi fó perdua sei . . .

  • Husik hirus estraga sira-nia relasaun ho ema seluk toʼo ikusmai sira sente mesamesak

  • Lalais atu sente laran-kanek, laran-susar ka hetan moras depresaun

  • Moris la kontente tanba fokus demais ba sala neʼebé ema seluk halo ba sira

  • Sente la kontente tanba hatene katak buat neʼebé sira halo mak ladiʼak

  • Sente estrese no hetan moras oioin, inklui moras tensaun, ataka fuan no ulun-moras *

FÓ PERDUA KATAK SÁ? Katak haluha sala neʼebé ema seluk halo no la rai odi, hirus no la hanoin atu selu aat ho aat. Maibé fó perdua la dehan katak ita konkorda ho hahalok sala, simu deʼit ka finje katak buat ruma la akontese. Maibé bainhira ita fó perdua, neʼe mak ita-nia desizaun rasik no neʼe hatudu katak ita hakarak haburas dame no iha relasaun neʼebé diʼak ho ema seluk.

Bainhira ita fó perdua, neʼe mós hatudu katak ita komprende ema seluk no rekoñese katak ita hotu sempre halo sala liuhusi liafuan no hahalok. (Roma 3:23) Bíblia hatete: “Kontinua hatudu pasiénsia ba malu no fó perdua ba malu ho laran tomak maski ema halo buat ruma hasoru imi.”​—Koloso 3:13.

Klaru katak fó perdua mak parte importante husi domin no neʼe bele ajuda ita atu iha relasaun diʼak ho ema seluk. (Koloso 3:14) No sítiu Mayo Clinic mós esplika katak fó perdua sei ajuda ita atu . . .

  •   Iha relasaun diʼak ho ema seluk, hanoin ema, komprende ema seluk no hatudu laran-sadiʼa ba ema neʼebé halo sala ba ita

  • Iha saúde neʼebé diʼak no iha relasaun diʼak ho Maromak

  • La sente laran-susar, estrese no hirus

  • Hamenus moras depresaun

PERDUA ITA-NIA AN RASIK. Jornál ida (Disability & Rehabilitation) hatete katak fó perdua ba ita-nia an rasik mak “buat neʼebé susar tebes atu halo” maibé fó perdua “diʼak tebes ba ita-nia saúde”.[transpose?] Saida mak bele ajuda Ita atu halo ida-neʼe?

  • Rekoñese katak Ita mak ema sala-naʼin, no Ita mós halo sala hanesan ema seluk.​—Eclesiastes (Pengkhotbah) 7:20

  • Aprende husi Ita-nia sala atu nuneʼe Ita la halo tan sala neʼebé hanesan

  • Hatudu pasiénsia ba Ita-nia an rasik, presiza tempu atu bele halakon Ita-nia fraku no toman aat sira.​—Éfeso 4:23, 24

  • Ransu ho ema neʼebé iha hanoin pozitivu, laran-diʼak, anima Ita no mós koʼalia nakloke ba Ita.​—Provérbios (Amsal) 13:20

  • Se Ita hakanek ema nia laran, rekoñese Ita-nia sala no lalais atu husu perdua. Se Ita haburas dame, Ita sei sente hakmatek.​—Mateus 5:23, 24

BÍBLIA NIA MATADALAN BELE AJUDA!

Bainhira estuda Bíblia, Patricia neʼebé temi ona, aprende oinsá atu fó perdua. Nia hatete: “Uluk, haʼu-nia moris nakonu ho hirus no odi, maibé agora haʼu sai livre. Haʼu la terus tan no haʼu mós la haterus ema seluk. Matadalan sira iha Bíblia laran hatudu katak Maromak hadomi ita no hakarak fó buat neʼebé diʼak ba ita.”

Mane ida naran Ron hatete: “Haʼu la bele kontrola ema seluk nia hanoin no hahalok. Maibé haʼu bele kontrola haʼu-nia hanoin no hahalok. Se haʼu hakarak iha dame, haʼu la bele rai hirus. Haʼu rekoñese katak haʼu la bele sente dame no hirus iha tempu hanesan. Agora, haʼu iha konxiénsia neʼebé diʼak.”

^ par. 8 Foti husi: Sítiu Mayo Clinic no sítiu Johns Hopkins Medicine no mós jornál médiku Social Psychiatry and Psychiatric Epidemiology.