Skip to content

Skip to table of contents

 OINSÁ ATU BELE MORIS KONTENTE

Domin

Domin

EMA PRESIZA DOMIN. Se ita la iha domin, ita la bele iha moris kontente nuʼudar feen-laʼen, família no belun. Laʼós neʼe deʼit, domin mós diʼak ba ita-nia saúde no halo ita kontente. Se nuneʼe, domin katak sá?

Maski domin romántiku mak importante, maibé domin neʼebé temi iha informasaun neʼe mak importante liu tanba bele book ita atu hanoin uluk ema seluk nia diʼak. No domin neʼe bazeia ba Bíblia nia prinsípiu, maibé mós tenke inklui ema nia laran no sentimentu.

Bíblia esplika kona-ba domin hodi hatete: “Domin mak pasiénsia no laran-diʼak. Domin la laran-moras, la gaba an, la foti-an. Domin hatudu respeitu, la buka nia rasik nia diʼak, la sai hirus lalais. Domin la hanoin fali buat aat neʼebé nia simu. Domin la haksolok ho hahalok laloos, maibé haksolok ho lia-loos. Domin lori todan hotu, . . . tau esperansa iha buat hotu, no tahan buat hotu. Domin nunka lakon.”​—1 Korinto 13:4-8.

Domin hanesan neʼe sei “nunka lakon”. Domin neʼe mós bele sai metin liután. No tanba domin neʼe book ita atu hatudu pasiénsia, laran-diʼak no fó perdua, neʼe ajuda ita atu hatudu domin ba malu “iha dalan neʼebé kompletu”. (Koloso 3:14) Tan neʼe, maski ita mak ema sala-naʼin, maibé ita bele iha relasaun diʼak ho ema seluk no sente kontente. Porezemplu, mai ita koʼalia kona-ba moris kaben nian.

 HADOMI MALU “IHA DALAN NEʼEBÉ KOMPLETU”

Jesus Kristu fó matadalan oioin kona-ba moris kaben nian. Porezemplu, nia dehan: “‘Mane ida sei husik ninia inan no aman no nia sei hela ho nia feen no sira naʼin-rua sei sai isin ida deʼit’ . . . Neʼe duni, buat neʼebé Maromak tau hamutuk, ema keta haketak.” (Mateus 19:5, 6) Ita bele aprende matadalan importante rua husi eskritura neʼe.

“SIRA NAʼIN-RUA SEI SAI ISIN IDA DEʼIT.” Moris kaben nian mak relasaun neʼebé besik liu hotu entre ema, no domin bele proteje kaben-naʼin sira husi halo sala seksuál no la sai “isin ida deʼit” ho ema seluk. (1 Korinto 6:16; Ebreu 13:4) Hahalok la laran-metin estraga duni ita-nia moris kaben nian. No neʼe bele lori trauma ba ita-nia oan sira, halo sira sente la seguru ka hirus no sente katak ita la hadomi sira.

“BUAT NEʼEBÉ MAROMAK TAU HAMUTUK.” Moris kaben nian mak sagradu. Bainhira kaben-naʼin respeitu arranju neʼe, sira sei hakaʼas an atu hametin sira-nia moris kaben nian. Maski problema mosu, sira la buka dalan oioin atu hakotu moris kaben nian. Sira-nia domin mak metin no nunka troka. Domin hanesan neʼe “lori todan hotu”, no ajuda sira atu rezolve problema oioin tanba sira hakarak atu moris ho dame.

Se inan-aman sira hatudu domin neʼebé la hanoin an, oan sira sei sente kontente. Feto joven ida naran Jessica hatete: “Haʼu-nia inan-aman hadomi malu tebes no hatudu respeitu ba malu. Kuandu haʼu haree amá hatudu respeitu ba apá, neʼe halo haʼu hakarak banati-tuir amá nia ezemplu.”

Domin mak Maromak nia hahalok ida neʼebé importante liu hotu. No Bíblia hatete: “Maromak mak domin.” (1 João 4:8) Bíblia mós bolu Jeová nuʼudar “Maromak neʼebé kontente”. (1 Timóteo 1:11) Ita mós sei sente kontente se ita banati-tuir ita-nia Kriadór nia hahalok sira, liuliu ninia domin. Éfeso 5:1, 2 hatete: “Banati-tuir Maromak nuʼudar ninia oan doben sira, no kontinua laʼo iha domin.”