Lintlha-khōlō Tsa Buka ea Mareka
Lentsoe la Jehova Lea Phela
Lintlha-khōlō Tsa Buka ea Mareka
KOSEPELE ea Mareka e khutšoanyane ho feta Likosepele tse ling tse tharo. E ngotsoe ke Johanne Mareka hoo e ka bang lilemo tse 30 ka mor’a lefu la Jesu Kreste le tsoho ea hae. Ke tlaleho e bolelang litaba ka potlako le e tletseng liketsahalo tsa lilemo tse tharo le halofo tsa tšebeletso ea Jesu.
Ho bonahala eka buka ea Mareka e ngoletsoe Balichaba, haholo-holo Baroma, kahoo e hlalosa Jesu e le Mora oa Molimo ea etsang mehlolo le ea etsang phutuho e khōlō ea ho bolela litaba tse molemo. E bua haholo ka seo Jesu a se entseng eseng ka seo a ileng a se ruta. Ha re ela hloko Kosepele ea Mareka, e tla matlafatsa tumelo ea rōna ho Mesia e be e re susumelletse ho ba baboleli ba chesehang ba molaetsa oa Molimo ha re le tšebeletsong ea Bokreste.—Baheb. 4:12.
TŠEBELETSO E KHŌLŌ GALILEA
Ka mor’a hore Mareka a tlalehe ka mosebetsi oa Johanne Mokolobetsi le ka matsatsi a 40 ao Jesu a a qetileng lefeelleng, litemaneng tse 14 feela, o qala tlaleho e susumetsang ea tšebeletso eo Jesu a e entseng Galilea. Ho pheta-pheta poleloana e reng “kapele-pele” ho etsa hore tlaleho ena e fetise maikutlo a hore lintho li ne li etsahala ka potlako.—Mar. 1:10, 12.
Ka lilemo tse ka tlaase ho tse tharo, Jesu o phetha matšolo a mararo a ho bolela Galilea. Mareka o ngola a hlahlamanya liketsahalo ka nako ea tsona. Ha aa ngola Thuto ea Thabeng, joalokaha a sa akarelletsa le lipuo tse ling tse telele tsa Jesu.
Lipotso Tsa Mangolo Lia Arajoa:
1:15—Ho ne ho phethehile “Nako e behiloeng” ea eng? Jesu o ne a bolela hore ho phethehile nako e behiloeng ea hore a qale tšebeletso ea hae. Kaha o ne a le teng joaloka ea khethetsoeng ho ba Morena, ’Muso oa Molimo o ne o atametse. Batho ba lipelo li ntle ba ne ba ka susumetsoa ke mosebetsi oa hae oa ho bolela eaba ba nka khato e neng e tla etsa hore Molimo a ba amohele.
1:44; 3:12; 7:36—Ke hobane’ng ha Jesu a ne a sa batle hore mehlolo ea hae e phatlalatsoe? Jesu o ne a batla hore batho ba iponele hore ke Kreste le hore motho ka mong a iketsetse qeto e thehiloeng bopaking boo, eseng hore batho ba etse liqeto ka ho nkeha maikutlo kapa ka litlaleho tseo e seng tsa ’nete. (Esa. 42:1-4; Mat. 8:4; 9:30; 12:15-21; 16:20; Luka 5:14) Mokhelo feela ke tabeng ea monna ea neng a e-na le bademona oa naheng ea Bagerasa. Jesu o ile a mo bolella hore a ee hae ’me a bolelle beng ka eena taba e etsahetseng. Kaha batho ba sebaka seo ba ne ba kōpile Jesu hore a se ke a kena sebakeng sa bona, o ne a tla be a bile le monyetla o fokolang haholo oa hore a buisane le batho ba moo kapa a sa ba le oona ho hang. Boteng ba monna eo ka mosa Jesu a neng a mo phekotse, le bopaki boo a neng a tla fana ka bona, li ne li tla loantša lipuo leha e le life tse kotsi mabapi le likolobe tse shoeleng.—Mar. 5:1-20; Luka 8:26-39.
2:28—Ke hobane’ng ha Jesu a bitsoa “Morena esita le oa sabatha”? Moapostola Pauluse o ile a ngola a re: “Molao o na le seriti sa lintho tse molemo tse tlang ho tla.” (Baheb. 10:1) Joalokaha Molao o ne o bolela, Sabatha e ne e tla ka mor’a matsatsi a tšeletseng a ho sebetsa, ’me Jesu o ne a phekola haholo ka letsatsi leo. Sena se ne se tšoantšetsa ho phomola ka khotso le litlhohonolofatso tse ling tseo batho ba tla ba le tsona Pusong ea Lilemo Tse Sekete ea Kreste ka mor’a hore puso e hatellang ea Satane e felisoe. Kahoo, Morena oa ’Muso oo e boetse ke “Morena oa sabatha.”—Mat. 12:8; Luka 6:5.
3:5; 7:34; 8:12—Mareka o ne a ka tseba joang hore na Jesu o ne a ikutloa joang maemong a sa tšoaneng? Mareka e ne e se e mong oa baapostola ba 12 ebile e ne e se motsoalle ea haufi oa Jesu. Ho ea ka neano, motsoalle ea haufi oa Mareka, e leng moapostola Petrose, ke eena ea ileng a fa Mareka boitsebiso bo bongata.—1 Pet. 5:13.
6:51, 52—Ke sefe “se boleloang ke mahobe” seo barutuoa ba ileng ba hlōloa ho se utloisisa? Lihora tse seng kae pele ho moo, Jesu o ne a fepile banna ba 5 000 ntle ho basali le bana ka mahobe a mahlano feela le litlhapi tse peli. “Se boleloang ke mahobe” seo barutuoa ba ka beng ba ile ba se utloisisa ketsahalong eo e ne e le hore Jesu o ne a filoe matla ke Jehova Molimo hore a etse mehlolo. (Mar. 6:41-44) Haeba ba ne ba utloisisitse boholo ba matla ao Jesu a neng a a filoe, ba ka be ba sa ka ba makala hakaalo ha a ne a tsamaea ka mohlolo holim’a metsi.
8:22-26—Ke hobane’ng ha Jesu a ile a nka mehato e ’meli ho etsa hore monna ea neng a foufetse a bone? Mohlomong sena Jesu o se entse ka lebaka la ho nahanela monna enoa. Ho etsa hore motho ea neng a ile a tloaela ho bona botšo feela ka nako e telele a bone butle-butle, ho ne ho ka ’na ha etsa hore mahlo a hae a tloaele khanya ea letsatsi.
Seo re Ithutang Sona:
2:18; 7:11; 12:18; 13:3. Mareka o hlalosa mekhoa, mantsoe, litumelo le libaka tseo mohlomong babali bao e seng Bajuda ba neng ba ka ’na ba se ke ba li tseba. O hlakisa hore Bafarisi “ba ne ba tloaetse ho itima lijo,” hore korbane ke “mpho e nehetsoeng ho Molimo,” hore Basaduse ‘ba re ha ho na tsoho’ le hore tempele e ne e le moo motho a ka ‘e bonang’ ha a le “Thabeng ea Mehloaare.” Kaha leloko la Mesia le ne le ka khahla Bajuda haholo-holo, ha aa ngola ka lona ho hang. Kahoo, Mareka o re behela mohlala. Re lokela ho nahanela semelo sa batho bao re buang le bona ha re le tšebeletsong ea Bokreste kapa ha re fana ka lipuo libokeng tsa phutheho.
3:21. Beng ka Jesu e ne e se balumeli. Kahoo, o nahanela bao beng ka bona ba sa lumelang ba ba hanyetsang kapa ba ba somang ka lebaka la tumelo ea bona.
3:31-35. Ha Jesu a kolobetsoa, e ile ea e-ba Mora oa Molimo oa moea, ’me “Jerusalema oa holimo” e ne e le ’mè oa hae. (Bagal. 4:26) Ho tloha ka nako eo, barutuoa ba Jesu ba ne ba le haufi haholo le eena ebile e le ba bohlokoa haholo ho feta beng ka eena ka tsoalo. Sena se re ruta hore lintho tse amanang le borapeli ba ’nete li lokela ho tla pele bophelong ba rōna.—Mat. 12:46-50; Luka 8:19-21.
8:32-34. Re lokela ho lemoha le ho hana ho khothalletsoa ka tsela leha e le efe hore re ipaballe ha re lokela hore ebe rea itela. Molateli oa Kreste o lokela hore a ikemisetse ho ‘itatola,’ ke hore, a ikhane ’me a hane litakatso le lipakane tsa boithati. O lokela ho ikemisetsa hore “a nke thupa ea hae ea tlhokofatso”—a utloe bohloko, haeba ho hlokahala, kapa a hlabisoe lihlong kapa a hlorisoe haesita le ho bolaeloa ho ba Mokreste. O lokela ‘ho latela Jesu a sa khaotse,’ a etsa lintho tumellanong le mohlala oa Jesu. Bophelo ba borutuoa bo hloka hore re be le moea o tšoanang le oa Kreste Jesu oa boitelo le hore re o boloke.—Mat. 16:21-25; Luka 9:22, 23.
9:24. Ha rea lokela ho ba lihlong ho bolella ba bang ka tumelo ea rōna kapa ho rapella tumelo e eketsehileng.—Luka 17:5.
KHOELI EA HO QETELA
Ho elella qetellong ea selemo sa 32 C.E., Jesu o tla “meeling ea Judea le ka mose ho Jordane,” ’me matšoele a boela a tla ho eena. (Mar. 10:1) Ka mor’a ho bolela litaba tse molemo moo, o nka leeto la ho ea Jerusalema.
Ka la 8 Nisane, Jesu o Bethani. O otlile ka lehlakore lijong ’me mosali e mong oa tla, o mo tšela ka oli e nkhang hamonate hloohong. Liketsahalo tsa ho tloha ha Jesu a kena ka tlhōlo Jerusalema ho fihlela tsohong ea hae li hlalosoa ka tatellano.
Lipotso Tsa Mangolo Lia Arajoa:
10:17, 18—Ke hobane’ng ha Jesu a ile a khalemela monna e mong ha a ne a mo bitsa “Mosuoe ea Molemo”? Ha Jesu a hana tlotla eo e neng e mo rorisa ho tlōla tekanyo, o ile a isa tlotla ho Jehova ’me a bontša hore Molimo oa ’nete ke eena mohloli oa lintho tsohle tse molemo. Ho feta moo, Jesu o ile a hlokomelisa ka ’nete ea bohlokoa ea hore Jehova Molimo, Mōpi oa lintho tsohle, ke eena feela ea nang le tokelo ea ho beha litekanyetso tsa se setle le se sebe.—Mat. 19:16, 17; Luka 18:18, 19.
14:25—Jesu o ne a bolela’ng ha a re ho baapostola ba hae ba tšepahalang: “Ho hang ha ke sa tla hlola ke noa sehlahisoa sa sefate sa morara ho fihlela letsatsing leo ka lona ke se noang se le secha ’musong oa Molimo”? Jesu o ne a sa bolele hore ho na le veine ea sebele leholimong. Leha ho le joalo, kaha ka linako tse ling thabo e tšoantšetsoa ka veine, Jesu o ne a bua ka thabo ea ho ba ’Musong le balateli ba hae ba tlotsitsoeng ba tsositsoeng bafung.—Pes. 104:15; Mat. 26:29.
14:51, 52—Mohlankana ea ileng “a baleha a hlobotse” ke mang? Ke Mareka feela ea buang ka ketsahalo ena, kahoo hoa utloahala ha re etsa qeto ea hore o ne a bua ka eena.
15:34—Na mantsoe a Jesu a reng “Molimo oa ka, Molimo oa ka, u ntloheletse’ng?” a ne a bontša hore o ne a se na tumelo? Che. Le hoja re sa tsebe hantle hore na ke hobane’ng ha Jesu a ile a bua sena, mantsoe a hae a bontša hore Jesu o ne a tseba hore Jehova o ne a tlositse tšireletso ea Hae e le hore botšepehi ba Mora oa Hae bo ka lekoa ka ho feletseng. Hape ho ka etsahala hore ebe Jesu o buile sena hobane a ne a batla ho phethahatsa seo Pesaleme ea 22:1 e neng e se boletse esale pele ka eena.—Mat. 27:46.
Seo re Ithutang Sona:
10:6-9. Morero oa Molimo ke hore banyalani ba lule ba le hammoho. Kahoo, ho e-na le ho potlakela ho batla ho hlalana, banna le basali ba lokela ho loanela ho sebelisa melao-motheo ea Bibele hore ba hlōle mathata leha e le afe a ka ’nang a hlaha lenyalong.—Mat. 19:4-6.
12:41-44. Mohlala oa mohlolohali ea futsanehileng o re ruta hore ha rea lokela ho icheba borōna ha re tšehetsa borapeli bo hloekileng.
[Setšoantšo se leqepheng la 29]
Ke hobane’ng ha Jesu a ile a re monna eo a e’o bolella beng ka eena sohle se etsahetseng ho eena?