Teki leri fu Gado Wortu

Suma na Gado?

Na artikel disi e poti prakseri na sani di yu ben kan aksi yusrefi èn a e sori pe yu kan feni den piki na ini yu Bijbel. Yehovah Kotoigi ben o breiti fu taki nanga yu fu den piki disi.

1. Suma na Gado?

A tru Gado na a Mekiman fu ala sani. Bijbel e kari en „Kownu fu têgo” èn disi wani taki dati a no abi wan bigin, èn noiti a o abi wan kaba (Openbaring 15:3). Fu di a libi komoto fu Gado, meki wi musu anbegi en wawan.​—Leisi Openbaring 4:11.

2. Fa Gado de?

Noiti wan sma si Gado, bika en na wan Yeye. Disi wani taki dati a hei moro den libisani na grontapu (Yohanes 1:18; 4:24). Den sani di Gado meki e sori den fasi fu en. Fu eksempre, te wi e prakseri a fasi fa froktu nanga bromki meki èn taki difrenti sortu fu den de, dan wi e kon si taki Gado abi lobi èn taki a koni. Te wi e luku o bigi hemel de èn ala den sani di de na hemel, dan disi e sori wi taki Gado abi furu krakti.​—Leisi Romesma 1:20.

Wi kan leri moro fu den fasi fu Gado te wi e leisi Bijbel. Fu eksempre, a e fruteri wi san Gado lobi èn san a no lobi, fa a e handri nanga sma, èn fa a e handri na ini difrenti situwâsi.​—Leisi Psalm 103:7-10.

3. Gado abi wan nen?

Yesus ben taki: „Wi Tata na hemel, meki yu nen kon santa” (Mateyus 6:9). Aladi Bijbel e kari Gado na difrenti fasi, toku a abi wán nen nomo. Na ini ibri tongo sma e kari a nen na wan tra fasi. Na ini Sranantongo wi gwenti taki „Yehovah”.​—Leisi Psalm 83:18.

Na ini furu Bijbel sma puru a nen fu Gado èn na presi fu dati den e gebroiki a wortu MASRA noso GADO. Ma di Bijbel ben skrifi, Gado nen ben skrifi sowan 7000 tron na ini. Yesus ben meki sma kon sabi a nen fu Gado fu di a ben gebroiki a nen dati te a ben fruklari Gado Wortu gi sma. A ben yepi sma fu kon leri sabi Gado.​—Leisi Yohanes 17:26.

  4. Yehovah e broko en ede nanga wi?

Yehovah e sori taki a e broko en ede nanga wi, fu di ensrefi e arki den begi fu wi (Psalm 65:2). Bun furu pina de, ma dati e sori taki Gado no e broko en ede nanga wi? Son sma e taki dati Gado e meki wi pina fu tesi wi, ma dati no tru. Bijbel e taki: „A no tru kwetikweti taki Gado e du ogri!”​—Yob 34:10; leisi Yakobus 1:13.

Gado gi sma a grani fu teki den eigi bosroiti. Wi e warderi en trutru taki wi abi a grani fu bosroiti efu wi wani dini Gado, a no so? (Yosua 24:15) Furu pina de fu di furu sma e du ogri nanga trawan. A e hati Yehovah fu si so furu kruktudu.​—Leisi Genesis 6:5, 6.

Heri esi Yehovah o meki Yesus tyari wan kaba kon na pina èn na den sma di e meki taki pina de. Na a srefi ten, Yehovah abi bun reide fu san ede a e gi pasi taki pina de fu wan pisi ten. Na ini wan tra artikel di o kon, wi o leri fu san ede Gado e gi pasi taki pina de.​—Leisi Yesaya 11:4.

5. San Gado wani wi fu du?

Yehovah meki wi na so wan fasi taki wi man kon sabi en èn lobi en. A wani taki wi e leri den tru tori di abi fu du nanga en (1 Timoteyus 2:4). Te wi e studeri Bijbel, dan wi kan kon leri sabi Gado leki wan Mati.​—Leisi Odo 2:4, 5.

Fu di Yehovah gi wi libi, meki wi musu lobi en moro iniwan tra sma. Wi kan sori Gado taki wi lobi en te wi e taki nanga en na ini begi èn te wi e du den sani di a wani taki wi musu du (Odo 15:8). Yehovah wani taki wi sori lobi gi tra sma.​—Leisi Markus 12:29, 30; 1 Yohanes 5:3.

Efu yu wani sabi moro, dan luku kapitel 1 fu a buku disi, San Bijbel e leri wi trutru?, di Yehovah Kotoigi tyari kon na doro.

[Prenki na tapu bladzijde 17]

Wan bun reide de fu san ede wan sma e gi pasi taki wan trawan e pina fu wan syatu pisi ten?