A fosi brifi gi Timoteyus 2:1-15
2 A fosi sani di mi wani taigi ala sma, na fu begi fayafaya gi ala sortu sma. Begi Gado gi a bun fu den èn taki Gado tangi gi den.
2 Du disi tu gi kownu èn gi ala den heihei man, so taki wi kan libi wan rustig libi sondro dyugudyugu, aladi wi e dini Gado fayafaya èn na wan seryusu fasi.
3 Dati na san Gado, wi Ferlusuman, feni bun èn na dati e gi en prisiri.
4 A wani taki ala sortu sma musu kisi ferlusu èn taki den musu kon sabi a tru leri finfini,
5 bika wán Gado de èn wán mindriman de di e yepi libisma fu kon bun baka nanga Gado. Dati na a man Krestes Yesus.
6 A pai nanga en libi èn dati na precies san ben de fanowdu fu meki ala sma* kon fri fu sondu. Sma o taki fu a sani disi na a yoisti sten.
7 Na fu di mi ben musu taki fu a sani disi, meki mi kisi a wroko fu de wan preikiman èn wan apostel. Den sani di mi e taki, tru. Mi no e lei. Mi kisi a wroko fu leri den trakondre sma san na bribi èn san na a tru leri.
8 Fu dati ede, mi wani taki na ala presi pe unu e kon makandra, na den mansma musu begi. Èn te den e opo den anu go na loktu fu begi, den musu du dati nanga wan krin ati. Den no musu abi a gwenti fu kisi atibron èn fu hartaki nanga makandra.
9 Mi wani tu taki den umasma musu moi densrefi nanga krosi di fiti. Den musu du dati na wan lespeki fasi èn nanga krin ferstan. Te den e moi densrefi, dan a no musu de nomo taki den e brei den ede-w’wiri na ala sortu modo fasi noso taki den e weri gowtu, parel noso diri krosi.
10 Ma den musu moi densrefi soleki fa a fiti umasma di e taki dati den e anbegi Gado. Te den e du bun sani, dan na dati e moi den.
11 Te wan uma e teki leri, dan a musu tan tiri* èn a musu arki nanga ala sakafasi.
12 Mi no e gi wan uma pasi fu gi leri noso fu basi wan man, ma a musu tan tiri,*
13 bika Gado meki Adam fosi, baka dati a meki Eva.
14 Boiti dati, Didibri no ben kori Adam, ma a ben kori na uma. Na so na uma sondu.
15 Ma te wan uma meki pkin, dan disi o kibri en, soso te a* e tan sori taki a e bribi, taki a lobi sma, taki a santa èn taki a de nanga krin ferstan.*
