Odo 15:1-33
15 Wan safri piki e kowru bigi atibron,ma te wan sma e taki hati sani, dan dati e wiki atibron.
2 Wan konisma e taki fu den bun sani di a sabi,ma den sma di no abi ferstan e taki soso dondon sani nanga den mofo.
3 Den ai fu Yehovah e si ala sani.A e si den sma di e du ogri èn den sma di e du bun.
4 Te wan sma e taki na wan switi fasi, dan dati na wan bon di e gi libi,*ma te wan sma e taki sani di no tru, dan dati e broko sma saka.
5 Wan donsma ati e bron te en p’pa e bari en,ma wan konisma e teki pir’ai.
6 Furu gudu de na ini na oso fu a ret’ati sma,ma den sani di na ogrisma e tyari kon na wán* e tyari soso problema kon gi en.
7 Konisma e prati a sabi di den abi,ma donsma no e du dati.
8 Yehovah e fisti gi den ofrandi fu den ogrisma,ma den begi fu den krin-ati sma e gi en prisiri.
9 A fasi fa den ogrisma e tyari densrefi e gi Yehovah groskin,ma a lobi a sma di e meki muiti fu du san reti.
10 A sma di e gwe libi a bun pasi e si pir’ai leki wan ogri sani.Ma a sma di no lobi pir’ai o dede.
11 Efu Yehovah man si krin suma de na ini Grebi,* a presi pe sma e pori gwe,*
dan yu denki taki a no man si san de na ini na ati fu libisma?
12 A spotuman no lobi a sma di e pir’ai gi en.
A no o go suku rai na den koniwan.
13 Wan ati di e prisiri e meki a fesi brenki,ma wan ati di e sari e meki wan sma firi brokosaka.
14 Na ati di abi ferstan e suku fu sabi sani finfini,ma a mofo fu den donsma lobi dondon sani.
15 Wan mofinawan kan feni taki en libi lai nanga problema,ma gi den sma di e prisiri na ini den ati, a gersi leki den abi wan fesa ala ten.
16 A moro betre fu lespeki Yehovah èn fu abi pkinso nomo,leki fu abi furu gudu di e tyari soso brok’ede* kon.
17 A moro betre fu nyan wan preti nanga gruntu na wan presi pe lobi de,leki fu nyan wan fatu mankaw na wan presi pe bita-ati de.
18 Wan man di ati e bron esi e meki soso trobi,ma wan man di ati no e bron esi e kowru wan trobi.
19 A pasi fu wan lesiman de leki wan skotu fu makabon,ma den krin-ati sma e waka na tapu wan moi grati pasi.
20 Wan boi di koni e gi en p’pa prisiri,ma wan donsma e wiswasi en m’ma.
21 Wan sma di no e waka nanga koni* e prisiri te a e du dondon sani,ma a sma di abi ferstan e tan waka a reti pasi.
22 Te sma no e taki krin nanga makandra ala sani e bruya,ma te furu raiman de sani e waka bun.
23 Wan sma e prisiri te a gi wan bun piki*èn wan wortu di taki na a yoisti ten, bun srefsrefi!
24 A sma di abi koni e waka a pasi di e kren go na loktu.A no o saka go na ini Grebi.*
25 Yehovah o broko na oso puru fu den sma di e hei densrefi,ma a o sorgu taki na uma di masra dede kba no lasi nowan pisi fu a gron fu en.
26 Yehovah no lobi en srefsrefi te den ogrisma e kori trawan,ma a e prisiri te wan sma e taki na wan switi fasi.
27 A sma di e suku fu kon gudu na wan bedrigi fasi e tyari problema* gi en eigi osofamiri,ma a sma di no lobi tyuku o tan na libi.
28 A ret’ati sma* e denki bun fosi a piki,*ma soso ogri e kmoto na ini a mofo fu den ogriwan.
29 Yehovah de fara fu den ogriwan,ma a e yere den begi fu den ret’ati sma.
30 Wan fesi di e lafu* e meki na ati prisiri.Bun nyunsu e gi den bonyo krakti.*
31 A sma di e arki pir’ai di e gi libibreiti fu de na mindri konisma.
32 Wan sma di no wani teki pir’ai no lobi en libi,ma a sma di e teki rai e kon koni.*
33 Bigi lespeki gi Yehovah e yepi wan sma fu abi konièn fosi wan sma kisi glori a musu abi sakafasi.
Futuwortu
^ Noso: „Wan tongo di e dresi na wan bon di e gi libi”.
^ Noso: „a n’nyan di na ogrisma e koti”.
^ Noso: „bruya”.
^ Hebrewtongo: „di e mankeri ati”.
^ Hebrewtongo: „nanga a piki fu en mofo”.
^ Noso: „syen”.
^ Hebrewtongo: „Na ati fu a ret’ati sma”.
^ Noso: „e denki bun fa a musu piki”, „e denki fosi a taki”.
^ Hebrewtongo: „Ai di e brenki”.
^ Hebrewtongo: „e meki den bonyo kon fatu”.
^ Hebrewtongo: „e kisi ati”.
