Odo 28:1-28
-
Gado e fisti gi den begi fu sma di no wani du san a wet e taki (9)
-
Te wan sma e taki krin sortu sondu a du, dan sma o sori sar’ati gi en (13)
-
Sma di e feti fu kon gudu, no o man wai pasi gi sondu (20)
-
A moro bun fu pir’ai gi wan sma na presi fu korkori en (23)
-
A sma di lobi gi tra sma sani no o mankeri noti (27)
28 Den ogrisma e lowe sondro taki wan sma de na den baka,ma den ret’ati sma abi dek’ati leki wan lew.*
2 Te sma e trangayesi den wet fu a kondre,* dan ibri leisi wan tra tiriman o tiri a kondre.Ma efu a tiriman e kisi yepi fu wan man di abi koni nanga sabi, dan a o tiri fu wan langa pisi ten.
3 Wan pôtiman di e bedrigi den mofinasma,de leki alen di e wasi ala n’nyan gwe.
4 Den sma di drai baka gi a wet e prèise den ogrisma,ma den wan di e hori a wet e ati bron tapu den sma di drai baka gi a wet.
5 Ogrisma no man ferstan san na retidu,ma den sma di e suku Yehovah man ferstan ala sani.
6 Wan pôtisma di e tyari ensrefi na wan reti fasi,bun moro wan gudusma di e du kruka sani.
7 Wan koni manpkin e hori a wet,ma wan pkin di e waka nanga sma di e nyan tumsi furu e gi en p’pa syen.
8 Wan sma di e kon moro gudu fu di a e meki moni na sma tapu èn fu di a e aksi tumsi furu rente,e tyari den gudu fu en kon na wán gi a sma di e du bun gi den pôtiwan.
9 Gado e fisti gi den begi fu wan sma di no wani du san a wet e taki.
10 A sma di e kori den krin-ati sma fu go waka a takru pasi o fadon go na ini na olo di ensrefi diki,ma den sma di e du san reti o feni bun.
11 Wan guduman denki taki a koni,ma wan pôtiman di koni man si suma a de trutru.
12 Te ret’ati sma e wini, dan bigi prisiri* de,ma te ogrisma e bigin tiri, dan sma e go kibri.
13 Sani no o waka bun gi a sma di e kibri den sondu fu en,ma te wan sma e taki krin sortu sondu a du èn te a no e du den moro, dan sma o sori sar’ati gi en.
14 A sma di ala ten e luku bun san a e du* o de koloku,ma ogri o miti a sma di e meki en ati kon tranga.
15 Leki wan lew di e bari èn leki wan beer di e lon kon na sma tapu,na so wan ogr’ati tiriman de gi a pipel fu en di no man yepi densrefi.
16 Wan tiriman di no abi koni o gebroiki a makti fu en fu pina sma,ma a sma di no lobi bedrigi trawan fu kon gudu o libi moro langa.
17 Wan sma di kiri wan trawan o tyari a brudu-paiman dati èn a o tan lowe teleki a doro na ini en grebi.
Nowan sma musu yepi en.
18 A sma di e du san reti o kisi kibri,ma a sma di e du kruka sani o fadon wantronso.
19 A sma di e wroko en gron o abi furu n’nyan,ma a sma di e feti baka sani di no warti noti, o nyan pina.
20 Wan man di e du san reti o kisi furu blesi,ma a sma di e feti fu kon gudu, no o man wai pasi gi sondu.
21 A no bun fu teki sma sei,ma wan man kan du ogri soso fu kan feni wan pisi brede.
22 Wan man di abi bigi-ai* e feti fu kisi gudu,ma a no sabi taki pina o miti en.
23 Wan sma o de nanga moro tangi bakaten gi a sma di e pir’ai gi en,leki gi a sma di e korkori en nanga switi wortu.
24 A sma di e fufuru en p’pa nanga en m’ma èn e taki: „Mi no du nowan ogri”,
ogri leki a sma di e pori trawan libi.
25 A sma di gridi* e tyari trobi kon,ma te wan sma e fertrow tapu Yehovah, dan sani o go bun nanga en.*
26 A sma di e fertrow tapu ensrefi na wan donsma,ma a sma di e waka nanga koni o kisi kibri.
27 A sma di e yepi den pôtiwan no o mankeri noti,ma den o fluku a sma di e tapu en ai gi den nowtu fu den pôtiwan.
28 Te ogrisma e bigin tiri, dan sma e go kibri,ma te den ogrisma dede, dan den ret’ati sma e kon moro furu.
