Odo 29:1-27
29 Wan man di no wani arki* awinsi o furu sma e bari en, o pori en libi wantronso.Yepi no o de gi en moro.
2 Te furu ret’ati sma de, dan a pipel e prisiri,ma te wan ogrisma e tiri, dan a pipel e soktu.
3 Wan sma di lobi koni e meki en p’pa prisiri,ma a sma di e waka nanga huru-uma e pori en gudu.
4 Te wan kownu e tiri na wan reti fasi, dan wan kondre e drai bun,ma wan man di e teki tyuku e broko wan kondre te na gron.
5 Wan man di e kori en mati nanga switi wortue span wan net gi en futu.
6 Den ogri di wan takru-ati sma e du de leki wan val gi en,ma a sma di e du san reti e bari fu prisiri èn a breiti srefsrefi.
7 Wan ret’ati sma e broko en ede nanga den reti fu den mofinawan.Ma wan ogrisma no e prakseri a sani disi srefsrefi.
8 Sma di e meki bigi de leki sma di e sutu faya gi wan foto,ma den sma di koni e kowru atibron.
9 Te wan konisma abi wan trobi nanga wan donman,dan a donman o rigeri èn a o lafu, ma a trobi no o lusu.
10 Kiriman no lobi krin-ati sma*èn den e suku fu kiri den ret’ati sma.*
11 Wan donman no man hori ensrefi te en ati e bron,ma a sma di koni no e bruya.
12 Te wan tiriman e arki lei,dan ala den futuboi fu en o de ogrisma.
13 A pôtiman nanga a sma di e pina trawan na a srefi.*
Na Yehovah e meki taki den ala tu man libi.
14 Efu wan kownu e koti krutu gi den pôtisma na wan reti fasi,dan a o tiri leki kownu fu wan langa pisi ten.
15 A tiki* nanga pir’ai e meki wan sma koni.Ma wan pkin di mag du san a wani o gi en m’ma syen.
16 Te den ogrisma e kon furu, dan ogridu e kon furu tu.Ma den sma di e du san reti o si fa den ogriwan o fadon.
17 Pir’ai gi a manpkin fu yu,dan a o gi yu rostu èn yu o prisiri trutru.
18 Efu wan pipel no e suku a tiri fu Gado, dan den o du san den wani.Ma den sma di e hori a wet o de koloku.
19 Wortu w’wan no sari fu warskow wan futuboi,bika a e ferstan bun san yu e taki, ma a no wani arki.
20 Yu si wan man di gaw tumsi fu taki san a e denki?
Moro howpu de gi wan sma sondro ferstan leki gi en.
21 Efu wan sma pori en futuboi sensi en yongu yari,dan bakaten a futuboi no o de nanga tangi.
22 Wan sma di ati e bron esi e tyari trobi konèn wan faya-ati sma e meki furu fowtu.
23 Wan sma di abi heimemre o kisi syen,ma a sma di abi sakafasi o kisi glori.
24 Wan sma di e yepi wan fufurman no lobi ensrefi.
Kande sma kari en na fesi krutu,* ma tòg a no e taki san a sabi.
25 Te yu e frede* libisma, dan dati o de leki wan val gi yu,ma a sma di e fertrow tapu Yehovah o kisi kibri.
26 Furu sma e suku fu kon na fesi wan tiriman fu aksi yepi,*ma na Yehovah e sorgu taki wan sma kisi en reti.
27 Ret’ati sma e teige den sma di no e du san reti.Ma wan ogrisma e teige wan krin-ati sma.
Futuwortu
^ Hebrewtongo: „di e steifi en neki”.
^ Noso: „sma di no e du ogri”.
^ Noso kande: „ma a ret’ati sma e suku fu kibri en libi”.
^ Hebrewtongo: „miti makandra”.
^ Noso: „strafu”.
^ Noso: „Kande a yere wan sweri di abi fu du nanga wan fluku”.
^ Noso: „e beifi gi”.
^ Noso kande: „e du muiti fu meki wan tiriman feni den bun”. Hebrewtongo: „e suku a fesi fu wan tiriman”.
