Wan Openbaring gi Yohanes 4:1-11
4 Baka dati mi si wan opo doro na ini hemel. A fosi sten di mi yere ben gersi a b’bari fu wan trompet. A taigi mi: „Kon dyaso na loktu, dan mi o sori yu den sani di musu psa.”
2 Direk santa yeye kon na mi tapu. Ne mi si wan kownusturu na hemel èn wan sma ben e sdon na tapu a kownusturu.
3 A sma di ben sdon na en tapu ben e brenki leki wan yaspis-ston* nanga wan sardiyus-ston.* Lontu a kownusturu wan regenboog ben de di ben gersi smaragd-ston.*
4 Lontu a kownusturu 24 kownusturu ben de èn mi si 24 owruman* sdon na tapu den kownusturu disi. Den ben weri weti krosi èn na tapu den ede den ben weri gowtu kroon.
5 Bliksem ben e koti kmoto fu a kownusturu, sten ben de fu yere èn dondru ben e bari. Seibi lampu nanga faya ben de na fesi a kownusturu. Disi na den seibi yeye fu Gado.
6 Na fesi a kownusturu wan sani ben de di ben gersi wan grasi se. A ben e brenki leki kristal-ston.*
Na mindrisei* èn lontu a kownusturu yu ben abi fo kerub-engel.* Fes’sei nanga bakasei fu den skin ben lai nanga ai.
7 A fosi kerub-engel ben gersi wan lew, a di fu tu kerub-engel ben gersi wan yongu mankaw, a di fu dri kerub-engel ben abi wan fesi leki di fu wan libisma èn a di fu fo kerub-engel ben gersi wan aka di e frei.
8 Ibriwan fu den fo kerub-engel ben abi siksi frei di ben lai nanga ai. Dei nanga neti den e taki: „Yehovah* Gado santa, a santa, a santa. En na a Almaktiwan di ben de kba, di de now èn di o kon.”
9 Den kerub-engel ben e gi glori, grani nanga tangi na a sma di ben e sdon na tapu a kownusturu, a sma di e libi fu ala ten, iya, fu têgo. Ibri leisi te den ben e du disi,
10 dan den 24 owruman ben e saka kindi na fesi a sma di ben e sdon na tapu a kownusturu. Den ben e anbegi a sma di e libi fu ala ten, iya, fu têgo. Den ben e trowe a kroon fu den na fesi a kownusturu èn den ben e taki:
11 „Na yu, Yehovah* wi Gado, warti fu sma prèise yu gi a glori, a grani nanga a makti di yu abi, bika na yu meki ala sani. Na fu di yu ben wani, meki den sani disi kon de èn na yu meki den.”
