Wan Openbaring gi Yohanes 10:1-11
10 Dan mi si ete wan tranga engel e saka kmoto fu hemel. A ben weri wan wolku leki krosi* èn wan regenboog ben de tapu en ede. En fesi ben de leki a son èn en futu ben de leki pilari fu faya.
2 Na ini en anu a ben hori wan pkin bukulolo di ben opo. Dan a poti en retsei futu tapu a se, ma en kruktusei futu a poti tapu a syoro.
3 Ne a bari nanga wan tranga sten neleki te wan lew e bari. Di a bari, mi yere den sten fu den seibi dondru.
4 Di den seibi dondru bigin taki, mi ben wani skrifi den sani di den taki. Ma mi yere wan sten kmoto fu hemel taki: „No skrifi san den seibi dondru taki. Meki den tan wan kibritori.”*
5 Dan na engel di mi ben si e tnapu tapu a se èn tapu a syoro, opo en ret’anu go na hemel
6 èn a sweri na a sma di e libi fu ala ten, iya, fu têgo. A sweri na a sma di meki hemel, grontapu, a se nanga ala den sani di de na ini den. A sweri: „A no o wakti moro langa.
7 Ma te a di fu seibi engel o bro a trompet fu en, dan a santa kibritori o kon na krin trutru. A santa kibritori na a bun nyunsu di Gado ferteri den eigi srafu fu en di de profeiti.”
8 Ne mi yere a sten di kmoto fu hemel taki ete wan leisi nanga mi. A taki: „Go teki a bukulolo di opo. A de na ini na anu fu na engel di e tnapu tapu a se èn tapu a syoro.”
9 Ne mi go na a engel èn mi taigi en fu gi mi a pkin bukulolo. A taigi mi: „Teki en, dan yu nyan en. A o meki yu bere kon bita, ma na ini yu mofo a o switi leki oni.”
10 Ne mi teki a pkin bukulolo puru na ini na anu fu na engel, dan mi nyan en èn na ini mi mofo a ben switi leki oni. Ma di mi nyan en kba, a meki mi bere kon bita.
11 Dan den taigi mi: „Yu musu tan taki profeititori di abi fu du nanga pipel, kondre, tongo èn furu kownu.”
