Wan Openbaring gi Yohanes 5:1-14

  • Wan bukulolo di tapu nanga seibi stampu (1-5)

  • A Pkin Skapu e teki a bukulolo (6-8)

  • A Pkin Skapu warti fu puru den stampu na a bukulolo (9-14)

5  Ne mi si wan bukulolo na ini a ret’anu fu a sma di e sdon na tapu a kownusturu. Sani ben skrifi na ala tu sei* fu a bukulolo* èn a ben tapu bun nanga seibi stampu.* 2  Ne mi si wan tranga engel di ben bari nanga wan tranga sten: „Suma warti fu opo a bukulolo èn fu puru den stampu fu en?” 3  Ma nowan sma na ini hemel, na grontapu noso ondro gron ben man opo a bukulolo fu luku san skrifi na ini. 4  Ne mi bari krei, bika den no ben man feni nowan sma di ben warti fu opo a bukulolo fu luku san skrifi na ini. 5  Ma wan fu den owruman* taigi mi: „No krei moro. Luku, a Lew fu a lo fu Yuda, a rutu fu David, wini a strei. Dati meki a warti fu opo a bukulolo èn a warti fu puru den seibi stampu fu a bukulolo.” 6  Ne mi si wan pkin skapu e tnapu krosbei* fu a kownusturu na mindri den fo kerub-engel* nanga den owruman. A ben gersi leki sma srakti a pkin skapu. A ben abi seibi tutu nanga seibi ai. Den ai na den seibi yeye fu Gado di a seni go na heri grontapu. 7  Ne a pkin skapu kon na fes’sei èn a teki a bukulolo di ben de na ini a ret’anu fu a sma di e sdon na tapu a kownusturu. 8  Di a teki a bukulolo, den fo kerub-engel nanga den 24 owruman saka kindi na fesi a Pkin Skapu. Ibriwan fu den ben abi wan harpu nanga gowtu komki di ben furu nanga wierook. (A wierook na den begi fu den santawan.) 9  Den e singi wan nyun singi. Disi na a singi: „Yu warti fu teki a bukulolo èn fu puru den stampu fu en, bika den ben srakti yu èn nanga yu brudu yu bai sma fu ibri lo, tongo, pipel nanga kondre gi Gado. 10  Yu meki den tron kownu nanga priester fu dini wi Gado èn den o tiri grontapu leki kownu.” 11  Dan mi si bun furu engel, den kerub-engel nanga den owruman lontu a kownusturu èn mi yere a sten fu den. Tin dusun tron tin dusun engel nanga dusun tron dusun ben de. 12  Den ben e taki nanga wan tranga sten: „A Pkin Skapu di den srakti warti fu kisi makti, gudu, koni, krakti, grani, glori nanga blesi.” 13  Ne mi yere ala den libisani di de na hemel, na grontapu, ondro gron, tapu a se èn ala sani di de na ini den. Den ben e taki: „A sma di e sdon na tapu a kownusturu èn a Pkin Skapu musu kisi blesi, grani, glori nanga makti fu ala ten, iya, fu têgo.” 14  Ne den fo kerub-engel taki: „Amen!” Dan den owruman saka kindi èn den anbegi Gado.

Futuwortu

^ Grikitongo: „na insei èn na bakasei”.
^ Luku Wortubuku.
^ Luku Wortubuku.
^ Luku Wortubuku.
^ Noso: „na mindrisei”.
^ Luku Wortubuku.

Auteursrechten voor deze publicatie