Pe Yu Kan Go fu Kisi Bun Rai?

A „wroko fu gi sma rai”, tron wan bisnis now. Sma kan meki milyardmilyard Amerkan dala wan yari nanga a wroko dati. Sma e suku yepi. Heinz Lehmann, sabiman tapu a kontren fu gosontu na frustan sei, e taki: „[Ini a libimakandra fu a ten disi] sani e mankeri na a sei fu skoroleri èn na sociaal sei. Sma no e hori densrefi moro na kerki markitiki leki fa den ben gwenti fu du. Osofamiri no tranga so moro srefisrefi. . . , èn fu dati ede sma abi en muilek.” A skrifiman Eric Maisel e taki: „Wan ten sma ben go na a lukuman, kerki fesiman noso osofamiri datra fu den fu kisi yepi nanga problema na frustan sei, na yeye fasi èn na skin fasi. Now den e luku na ini den buku di e gi sma rai ini a tori fu a fasi fa den kan yepi densrefi fu go moro na fesi, so taki den man feni wan lusu gi den problema fu den.”

FURU sma de di e suku na wan opregti fasi fu yepi trawan di de na ini nowtu. Ma a de wan sari sani, taki wan lo sma di wani bedrigi sma e suku fu feni wini fu a firi di sma e firi taki den de den wawan èn a pina di sma e pina, èn den no e gi sma trutru yepi noso wan lusu gi den problema fu den.

San na a yoisti presi pe wi kan feni yepi di wi kan frutrow? Pe wi kan feni bun rai di o wroko ala ten?

A Presi Pe Wi Kan Feni Tiri Di Wi Kan Frutrow

Na Amerkan preikiman Henry Ward Beecher fu a di fu tinaneigi yarihondro ben taki: „Bijbel na wan karta di Gado ben gi fu sori yu a yoisti pasi, fu kibri yu meki yu boto no sungu, èn fu sori yu pe a lanpresi de, èn fa fu doro drape sondro fu go fasi na tapu klepston noso santi bangi.” Wan tra man ben taki fu a Bijbel: „No wan sma kan taki dati den sabi ala sani fu Bijbel kaba; o moro den yari fu wi e kren o moro furu sani wi e leri èn o moro dipi wi e kon frustan sani.” Fu san ede yu musu ondrosuku Bijbel seryusu?

Bijbel e taki, ala di a e rikomanderi ensrefi: „Na Gado ben meki sma skrifi ala den Buku fu Bijbel nanga yepi fu en santa yeye èn den bun fu gi leri, fu piri-ai gi sma, fu poti sani kon reti, fu gi trangaleri ini regtfardikifasi, so taki a sma di de fu Gado kan koni dorodoro, de srekasreka dorodoro gi ibri bun wroko” (2 Timoteus 3:16, 17). Den sani di skrifi na ini Bijbel e kon fu a reti Sma fu pe a libi komopo, Yehovah Gado (Psalm 36:9). Leki a Sma fu pe a libi komopo, a sabi a fasi fa wi meki heri bun, soleki fa Psalm 103:14 e memre wi: „Ensrefi sabi heri bun fa wi meki, fu di a e hori na prakseri taki wi na doti.” Fu dati ede wi kan abi frutrow dorodoro na ini a prenspari di Bijbel prenspari.

Te yu luku en bun, dan Bijbel abi wan lo gronprakseri nanga tirilin di yu kan gebroiki nanga bun bakapisi na ini awansi sortu situwâsi yu ben sa kan de. Nanga yepi fu Bijbel Gado e taigi wi: „Disi na a pasi. Waka na tapu” (Yesaya 30:21). Bijbel  kan sorgu trutru gi den sani di sma abi fanowdu na ini a ten disi? Meki wi go luku.

Bijbel E Sorgu gi den Sani Di Wi Abi Fanowdu . . .

Te Wi Musu Kakafutu gi Broko-ede. Bijbel e fruteri wi: „No broko un ede nanga noti, ma meki Gado kon sabi den faya begi fu unu na ini ala sani nanga yepi fu begi nanga tranga begi makandra nanga tangi; èn a vrede fu Gado, di e pasa ala prakseri, sa kibri un ati nanga un krakti fu denki nanga yepi fu Krestes Yesus” (Filipisma 4:6, 7). A begi di sma e begi, de wan yepi fu man kakafutu gi broko-ede na emotioneel sei di abi fu du nanga a wroko di sma musu wroko tranga fu feni moni? A begi de wan yepi tu te sma broko saka fu di tra sma mesbroiki den na seks sei èn te sma e kosi den noso te den e sari fu a lasi di den lasi wan lobiwan ini dede? Luku na ondrofenitori di e kon now.

Baka di Jackie kon sabi taki sma ben mesbroiki na umapikin fu en na seks sei, a erken: „A konsensi fonfon di mi kisi fu di mi no ben man kibri mi pikin, na wan sani di mi no man taki fu en srefi. Mi ben musu feti nanga firi fu pen, bita-atifasi nanga atibron. Den firi disi ben bigin pori mi libi. Mi ben abi Yehovah tranga fanowdu fu kibri mi ati.” Baka di a leisi Filipisma 4:6, 7 èn a leisi en ete wan tron baka, dan a ben wroko tranga fu fiti a rai dati na ini en libi. „Mi e begi ibri dei èn e aksi Yehovah doronomo fu no meki firi di no bun pori mi, èn A yepi mi fu kisi wan korostu èn prisiri ati. Mi e firi trutru vrede na inisei fu mi”, Jackie e fruteri.

Yu tu kan kon na ini wan situwâsi di yu no man basi noso di yu no man feni wan lusu gi en èn dati e gi broko-ede na emotioneel sei. Te yu e gi yesi na a frumane fu Bijbel fu begi, dan yu kan kakafutu gi dati nanga bun bakapisi. A psalm skrifiman e gi wi deki-ati nanga den wortu disi: „Poti yu pasi na tapu Yehovah, èn frutrow na en tapu, èn ensrefi sa handri.”—Psalm 37:5.

Fu Kisi Deki-ati. A psalm skrifiman ben taki den wortu disi di ben e sori a warderi fu en: „Yehovah mi lobi fu de na ini na oso fu yu èn a presi pe a glori fu yu e tan. Mi eigi futu seiker sa tanapu na tapu wan plata presi; Na mindri den ipi sma di kon makandra, mi sa blesi Yehovah” (Psalm 26:8, 12). Wi e kisi deki-ati na ini Bijbel fu kon makandra doronomo fu anbegi Yehovah. Fa a demakandra disi kan gi yu san yu abi fanowdu? San trawan kon si?

Becky e fruteri: „Mi papa nanga mama no e dini Yehovah, dati meki den e gens mi te mi e pruberi fu du wan sani di abi fu du nanga diniwroko gi Gado. Mi musu du furu muiti fu go na den konmakandra.” Becky e feni taki a kisi furu blesi fu di a span ensrefi bun tranga fu man go na den Kresten konmakandra doronomo. „Den konmakandra e tranga a bribi fu mi, so taki mi kan kakafutu gi den aladei kwinsi leki wan studenti, umapikin nanga futuboi fu Yehovah. Den sma na ini a Kownukondre zaal de heri tra fasi leki den studenti na skoro! Den e sori lobi gi yu èn e yepi yu, èn den takimakandra di mi e hori nanga den e gi mi deki-ati ala ten. Den na trutru mati.”

Iya, te wi e gi yesi na a Bijbel rai fu kon makandra doronomo, dan Yehovah kan gi wi a deki-ati di wi abi fanowdu. Na dyaso wi e ondrofeni taki den wortu fu a psalm skrifiman de tru: „Gado de wan kibripresi nanga wan krakti gi wi, wan yepi di de fu feni makriki na ini ten fu banawtu.”—Psalm 46:1.

Fu Du Wroko Di E Gi Satisfaksi èn Di Warti. „Kon de kánkan, no beifi, abi ala ten furu fu du na ini a wroko fu Masra, fu di unu sabi taki a wroko fu unu no de fu soso ini a tori fu Masra”, Bijbel e gi a deki-ati (1 Korentesma 15:58). A de so taki „a wroko fu Masra” e gi satisfaksi trutru? A Kresten diniwroko di wi e du, man doro wan sani di warti?

Amelia e taki fa a e firi: „Mi ben studeri Bijbel nanga wan trowpaar di pikinmoro ben o prati.  Mi ben yepi wan uma tu. Sma ben kiri na umapikin fu na uma disi na wan ogri-ati fasi. Fu di na uma no ben sabi san e pasa baka te wi dede, dan dati ben e trobi en srefisrefi. Na ini ala den tu kefal disi, a gebroiki fu Bijbel gronprakseri ben tyari vrede nanga howpu kon na ini a libi fu den. Mi abi bigi prisiri nanga satisfaksi fu di mi ben man yepi den.” Scott e taki: „Efu yu abi wan bun ondrofeni na ini a preikiwroko, e bigin wan nyun bijbelstudie, noso abi bun bakapisi fu a gi di yu e gi okasi kotoigi, dan yu sa taki fu en furu yari langa na ini a ten di e kon. Den srefi firi nanga bigi prisiri e kon na libi baka ibritron te yu e fruteri fu den. Na fu a diniwroko ede a moro bigi prisiri di e tan, e kon.

A de krin taki te sma e teki a tiri fu Bijbel fu tron fayafaya dinari, dan dati e meki taki den sma disi sa du wroko di e gi satisfaksi èn di warti. Yu tu e kisi wan kari fu teki prati na a wroko disi fu gi tra sma leri di abi fu du nanga den pasi èn den gronprakseri fu Gado, ala di na a srefi ten yusrefi e kisi wini fu dati.—Yesaya 48:17; Mateus 28:19, 20.

Feni Wini fu a Wortu fu Gado

Tweifri no de, taki Bijbel na wan buku di e gi bun tiri di sma kan frutrow. A abi rai di yu kan gebroiki na ini a grontapu fu a ten disi. Efu wi wani nyan bun fu en, dan wi musu tan du muiti. Wi musu leisi en doronomo, studeri en, èn denki dipi fu en. Paulus ben gi a seryusu rai: „Denki dipi fu den sani disi; teki den krinkrin na ini yu, so taki ala [sma] kan si taki yu e go na fesi” (1 Timoteus 4:15; Deuteronomium 11:18-21). Gado e gi a dyaranti taki efu yu e wroko fu gebroiki a rai fu en soleki fa a de fu feni na ini Bijbel, dan yu sa abi bun bakapisi. A e pramisi: „Frutrow tapu Yehovah nanga yu heri ati èn no frutrow tapu yu eigi frustan. Poti prakseri na en na ini ala yu pasi, èn ensrefi sa meki yu pasi kon reti.”—Odo 3:5, 6.

[Prenki na tapu bladzijde 31]

Te wi e du san Bijbel e gi leki rai, dan dati e meki wi libi wan libi di e gi satisfaksi èn di warti