Ondrofenitori

Mi Ben Kisi Yepi fu No De Fruleigi Moro

SOLEKI FA RUTH L. ULRICH BEN FRUTERI

Mi ben bari krei leti drape na a doromofo fu a kerki tiriman. Didyonsro a ben taki wan lo sani di no tru fu Charles T. Russell, di ben dini leki a fosi presidenti fu a Waktitoren Bijbel nanga Traktaat Genootschap. Meki mi fruteri fa a du kon taki mi, di ben de wan yongu umapikin nomo, ben e go na den sma disi.

MI GEBORE na ini 1910 na wan pranigron na ini Nebraska, Amerkankondre, na ini wan famiri di ben de fayafaya kerkiman. Na osofamiri fu wi ben e leisi Bijbel nanga makandra ala mamanten nanga ala mofoneti baka te wi ben nyan. Papa ben de na edeman fu a sonde-skoro fu a Methodist kerki na ini a pikin foto Winside, di ben de so wan siksi kilometer farawe fu a pranigron fu wi. Wi ben abi wan wagi di asi ben e hari èn garden ben anga na den fensre, so taki awansi fa a weer ben o de, toku wi ben man go na kerki sonde mamanten.

Di mi ben abi wan sani fu aiti yari, dan mi pikin brada ben kon kisi a siki di e lan pikin-nengre. Mama ben teki en go na wan presi na ini Iowa pe sma di abi wan hebi siki di no e dresi esi-esi, e go fu kisi yepi. Ala di a ben sorgu en so bun, toku mi brada dede di den ben de drape. Ma di Mama ben de drape na ini Iowa, dan a ben miti wan Bijbel Ondrosukuman, soleki den ben e kari Yehovah Kotoigi na a ten dati. Den ben abi furu takimakandra èn Mama ben go na wan tu konmakandra fu den Bijbel Ondrosukuman srefi nanga na uma.

Di Mama ben drai kon baka na oso, dan a ben tyari wan tu pisi fu Studies in the Scriptures (Studie fu den Buku fu Bijbel) nanga en di a Waktitoren Genootschap ben tyari kon na doro. Heri esi a ben abi na overtoigi taki den Bijbel Ondrosukuman ben e leri a waarheid èn taki den sani di sma ben e leri fu a libisma sili taki a no man dede èn taki den godelowsusma e kisi skin-ati fu têgo, no de tru.—Genesis 2:7; Preikiman 9:5, 10; Esekièl 18:4.

 Ma Papa ben mandi srefisrefi èn a ben gens Mama te a ben wani go na den konmakandra fu den Bijbel Ondrosukuman. A ben e tan tyari mi nanga mi brada Clarence, di owru moro mi, go na kerki nanga en. Ma te Papa no ben de na oso, dan Mama ben e studeri Bijbel nanga wi. Disi ben meki taki wi ben abi wan bun okasi fu luku efu den sani di den Bijbel Ondrosukuman ben e leri ben e kruderi nanga den sani di a kerki fu wi ben e leri.

Mi nanga Clarence ben e go na a sonde-skoro na kerki doronomo èn Clarence ben e aksi a skoromisi sani di a no ben man piki. Te wi ben doro oso, dan wi ben e fruteri a mama fu wi dati èn disi ben e meki taki wi ben abi langa takimakandra fu den tori disi. Te fu kaba, mi ben libi a kerki èn ben bigin go na den konmakandra fu den Bijbel Ondrosukuman nanga Mama èn no langa na baka, Clarence ben du a srefi sani tu.

A Feti fu No De Fruleigi Moro

Na ini september 1922 mi nanga Mama ben go na a kongres fu den Bijbel Ondrosukuman na Cedar Point, Ohio, di mi no man frigiti moro kwetikweti. Mi man si ete fa a kefalek bigi fraga e lolo opo ala di Joseph F. Rutherford di ben de presidenti fu a Waktitoren Genootschap na a ten dati, ben gi den 18.000 sma di ben kon na a kongres, a deki-ati nanga den wortu di skrifi na tapu a fraga: „Preiki a Kownu nanga Kownukondre”. Disi ben naki mi ati trutru èn mi ben firi taki mi ben musu fruteri tra sma wantewante fu a bun nyunsu fu Gado en Kownukondre.—Mateus 6:9, 10; 24:14.

Na den kongres di ben hori fu 1922 te go miti 1928, den sma di ben kon drape ben teki wan tu bosroiti, èn den boskopu ben poti na ini traktaat di Bijbel Ondrosukuman ben prati na milyunmilyun sma na heri grontapu. Mi ben fini èn mi ben langa — den ben kari mi fini-tyoles — èn mi ben e waka go oso fu oso esi-esi fu prati den boskopu disi di druk na tapu den traktaat. Mi ben e prisiri trutru fu du a wroko disi. Toku, fu taki nanga sma, fu fruteri sma fesi na fesi fu a Kownukondre fu Gado, ben de wan tra tori.

Mi ben fruleigi so kefalek taki mi no ben lobi en kwetikweti te Mama ben e gi bigi ipi famiri wan kari fu kon ibri yari. Mi ben e go kibri na ini mi kamra èn mi ben e tan drape. Wan leisi, Mama ben wani teki wan fowtow fu a heri famiri èn a ben taigi mi fu komoto na mi kamra. Fu di mi no ben  wani meki a fowtow nanga den, mi ben bari di Mama ben hari mi puru trutru na mi kamra.

Ma a dei ben kon taki mi ben teki a fasti bosroiti fu poti wan tu Bijbel buku na ini wan tas. Ibri leisi baka mi ben e taki: „Mi no man du en” ma baka dati mi ben e taigi misrefi: „Mi musu du en”. Te fu kaba, mi ben e go preiki. Baka dati, mi ben prisiri so kefalek taki mi ben teki a deki-ati fu go. A sani di ben gi mi a moro bigi prisiri na taki mi ben kaba a wroko, no fu di mi ben du en. A ben de na a ten dati, taki mi ben miti a kerki tiriman di mi ben kari na a bigin èn taki mi ben e krei di mi ben e waka gowe. Baka ten, nanga yepi fu Yehovah mi ben man taki nanga sma na den oso èn mi ben kon kisi moro prisiri. Baka dati, na ini 1925, mi ben sori taki mi ben gi misrefi abra na Yehovah fu di mi ben teki dopu na ini watra.

Mi E Bigin Nanga a Furuten Diniwroko

Di mi ben abi 18 yari, dan mi ben bai wan wagi nanga moni di mi tanta di dede kaba, ben libi gi mi na baka èn mi ben bigin du a pionierwroko, soleki den ben e kari a furuten diniwroko. Tu yari baka dati, na ini 1930, mi nanga wan pionier patna ben teki a preikiwroko di wi ben kisi fu du. Na a ten dati Clarence ben bigin du a pionierwroko tu. Syatu baka dati a ben teki a kari di a ben kisi fu dini na Bethel, na edekantoro na ini Brooklyn, New York, gi Yehovah Kotoigi na heri grontapu.

Na a ten dati a papa nanga mama fu wi ben broko trow, èn dati meki mi nanga Mama ben meki sma meki wan wagi kon tron wan tanpresi tu èn wi ben bigin du a pionierwroko nanga makandra. Dati ben de di Amerkankondre ben kon abi fu du nanga a Bigi Crisis. A ben tron wan bigi tyalensi fu go doro nanga a pionierwroko, ma wi ben abi a fasti bosroiti fu no tapu nanga a wroko. Te wi ben gi sma Bijbel lektuur, dan den ben gi wi fowru, eksi nanga sani di den ben prani na den gron, so srefi sani leki owru batterij nanga aluminium sani di den trowe gowe. Wi ben e seri den aluminium sani fu bai gasoline gi a wagi èn fu pai tra kostu. Mi ben leri tu fu lobi oli gi den difrenti pisi fu a wagi èn fu kenki oli so taki wi ben kan poti moni na wan sei. Wi ben si fa Yehovah, leki fa a pramisi, seti sani so fu yepi wi wini den problema.—Mateus 6:33.

Mi E Go na den Kondre Di Mi Kisi Leki Zendeling

Na ini 1946 mi ben kisi wan kari fu go na a di fu seibi klas fu a Waktitoren Bijbelskoro Gilead di ben de krosibei fu South Lansing, New York. Na a ten dati, mi ben du a pionierwroko makandra nanga Mama moro leki 15 yari kaba, ma toku a no ben wani tapu mi fu kisi a skoro fu du a zendelingwroko. So bun a ben gi mi deki-ati fu teki a grani fu go na Gileadskoro. Baka di mi ben kaba nanga a skoro, mi nanga Martha Hess fu Peoria, Illinois, ben tron pionier patna. Wi, makandra nanga tu tra umasma ben kisi a toewijzing fu go na Cleveland, Ohio, gi wan yari ala di wi ben e wakti wan toewijzing fu go na wan tra kondre.

Wi ben kisi a toewijzing dati na ini 1947. Mi nanga Martha ben kisi a toewijzing fu go na Hawai. Fu di a ben makriki fu go libi na den èilanti disi, meki Mama ben kon èn a ben tan krosibei fu wi na ini a foto Honolulu. Mama en gosontu ben go na baka èn dati meki mi ben e du a zendelingwroko fu mi èn mi ben e yepi mama tu. Mi ben man sorgu en te leki a dede na ini Hawai na ini 1956, di a ben abi 77 yari. Di wi ben kon na ini Hawai biginbigin, dan so wan 130 Kotoigi ben de na ini a kondre, ma na a ten di Mama dede, moro leki wan dusun sma ben de èn den no ben abi zendeling fanowdu moro.

Na ini 1957 mi nanga Martha ben kisi wan brifi fu a Waktitoren Genootschap di ben gi wi wan toewijzing fu go wroko na ini Yapan. A fosi sani di wi ben broko wi ede nanga dati ben de efu wi, te wi ben luku a yari di wi ben abi, ben o man leri a tongo fu Yapan. Na a ten dati mi ben abi 48 yari èn Martha Hess ben de soso fo yari moro yongu. Ma wi ben libi na afersi na ini Yehovah en anu èn ben teki a toewijzing.

 Na ini 1958 leti baka na internationaal kongres di hori na a Yankee Stadion fu New York City èn na Polo Grounds wi ben de na pasi e go na Tokio nanga sipi. Bigi ogri winti ben naki wi di wi ben kon krosibei fu a lanpresi na Yokohama, pe Don nanga Mabel Haslett, Lloyd nanga Melba Barry nanga tra zendeling ben kon miti wi. Na a ten dati soso 1124 Kotoigi ben de na ini Yapan.

Wantewante wi ben bigin studeri a tongo fu Yapan èn wi ben go na ini na oso-fu-oso diniwroko tu. Wi ben gebroiki na alfabet fu Ingrisitongo fu skrifi den pristeri fu wi di de na ini Yapantongo. Baka dati wi ben e leisi den pristeri disi gi den sma. Te den ososma ben gi wan piki, dan den ben e taki, „Yoroshii desu” noso „Kekko desu”, èn wi ben kon frustan taki disi wani taki „A bun”. Ma wi no ben sabi ala ten efu na ososma ben wani sabi moro noso efu a no ben wani dati, fu di den ben e gebroiki den wortu disi tu te den e taki dati den no wani wan sani. Na a fasi fa a sma ben taki den wortu noso na a fasi fa a ben poti en fesi, ben de fu si san den ben wani taki. Baka wan pisi ten wi ben kon sabi san wan sma wani taki te a e taki „a bun”.

Ondrofenitori Di Ben Prisiri Mi Ati

Wan dei, ala di mi ben e feti nanga a tongo ete, mi ben fisiti wan gebow nanga sribipresi gi wrokoman fu Mitsubishi èn mi ben miti wan uma di ben abi 20 yari. A ben kon sabi furu fu Bijbel èn a dopu na ini 1966. Wan yari baka dati a ben bigin du a pionierwroko èn syatu baka dati a ben poti leki spesrutu pionier. A dini leki spesrutu pionier sensi a ten dati. Ala ten mi ben kisi deki-ati te mi ben si fa a gebroiki en ten nanga en krakti na ini a furuten diniwroko sensi en yongu yari.

Fu tanapu kánkan gi a waarheid fu Bijbel na wan bigi tyalensi, spesrutu gi sma di e libi na ini libimakandra di no de Kresten. Toku someni dusundusun sma wini den tyalensi disi, so srefi wan tu fu den  sma di mi studeri Bijbel nanga den. Den puru den diri Buda altari nanga den Syinto altari di, leki fa a gwenti de drape, de fu feni na ini den oso fu Yapan. Sontron famiri no e frustan bun te wan sma e du den sani disi, fu di den e denki taki a no e lespeki den dede afo fu en. Dati meki den sma di e bigin studeri musu abi deki-ati fu du disi. Den sani di den du nanga deki-ati, na a srefi leki san den fosi Kresten ben du di ben puru den sani na den skin di ben abi fu du nanga falsi anbegi.—Tori fu den Apostel 19:18-20.

Mi e memre wan bijbelstudenti, wan uma di de na oso èn di e sorgu gi en osofamiri, di ben e prakseri fu foroisi komoto fu Tokio nanga en osofamiri. A ben wani foroisi go na wan nyun oso di no ben abi no wan sani na ini di ben abi fu du nanga heiden anbegi. So bun a ben taigi en masra san a ben wani du èn en masra ben agri nanga dati. A ben fruteri mi disi nanga prisiri ma wantronso a ben memre taki a ben poti wan bigi, diri marmer vaas na ini wan paki. A ben bai en bika sma ben taki dati a vaas e tyari koloku kon na ini na oso ala ten. Fu di a ben tweifri efu a sani disi abi wan sani fu du nanga falsi anbegi, meki a ben broko a vaas nanga wan amra èn ben trowe en gowe.

A si di mi ben si taki na uma disi nanga tra sma ben de klariklari fu puru diri sani di abi fu du nanga falsi anbegi èn taki den ben abi a deki-ati fu bigin wan nyun libi fu dini Yehovah, na wan sani di mi ondrofeni taki a e gi satisfaksi trutru. Mi e taigi Yehovah tangi doronomo taki mi ben man du a zendelingwroko moro leki 40 yari na ini Yapan.

„Wondru” na ini a Ten Disi

Te mi e prakseri baka fu den moro leki 70 yari na ini a furuten diniwroko, dan den sani di mi e si leki wondru di e pasa na ini a ten disi, e fruwondru mi trutru. Leki wan yongusma di ben abi problema fu di mi ben de wan fruleigi sma, noiti mi ben prakseri taki oiti mi ben o gebroiki mi heri libi fu teki fesi fu taki nanga sma fu wan Kownukondre di moro furu sma no wani yere noti fu dati. Ma boiti taki mi ben man du dati, mi si hondrohondro noso dusundusun sma di du a srefi sani. Èn den ben du  dati na so wan bun fasi taki den Kotoigi na ini Yapan di ben de pikinso moro leki wan dusun di mi kon na ini a kondre na ini 1958, kon tron moro leki 222.000 na ini a ten disi!

A fosi leisi di mi nanga Martha ben doro na ini Yapan, dan wi ben kisi a toewijzing fu tan na a bijkantoro na ini Tokio. Na ini 1963 wan nyun gebow fu siksi sodro ben bow na a presi dati èn wi ben tan drape sensi a ten dati. Na ini november 1963 wi ben de na mindri den 163 sma di ben de drape gi a lezing fu na inwijding di a bijkantoro opziener fu wi, Lloyd Barry, ben hori. Na a ten dati wi ben doro 3000 Kotoigi na ini Yapan.

A de wan prisiri sani fu si taki a Kownukondre preikiwroko e gro kefalek esi, taki wi doro moro leki 14.000 na ini 1972 di wan nyun bijkantoro di ben meki kon moro bigi, ben kaba bow na ini a foto Numazu. Ma na ini 1982 moro leki 68.000 Kownukondre preikiman ben de na ini Yapan èn wi ben bow wan moro bigi bijkantoro na ini a foto Ebina di de so wan 80 kilometer farawe fu Tokio.

Na a pisi ten dati, a fosi gebow fu a bijkantoro di ben de leti na mindri Tokio ben meki kon bun baka. Baka ten a ben tron wan zendeling-oso gi moro leki 20 zendeling di dini na ini Yapan 40 noso 50 yari noso moro langa, so srefi mi nanga mi pionier patna Martha Hess di de mi patna langa ten kaba. Wan datra nanga en wefi, di de wan ati-oso zuster e tan na wi oso tu. Den e sorgu wi èn e luku na wan lobi fasi fa a de nanga wi gosontu. No so langa pasa wan tra ati-oso zuster ben kon wroko nanga a datra nanga en wefi, èn na deiten Kresten sisa e kon yepi den ati-oso zuster. Tu memre fu a Bethelfamiri na ini Ebina e kon wan baka trawan fu bori gi wi èn fu krin wi oso. Fu tru, Yehovah bun gi wi.—Psalm 34:8, 10.

Wan heimarki na ini mi libi leki zendeling ben de na ini november di pasa, 36 yari baka na inwijding fu a gebow pe someni fu wi di de zendeling langa ten kaba, e tan now. Tapu 13 november 1999 mi ben de na mindri den moro leki 4486 sma, so srefi den hondrohondro sma di de Kotoigi wan langa ten kaba fu 37 kondre, di ben go na a inwijding fu den tra gebow di ben bow gi a bijkantoro fu Yapan fu a Waktitoren Bijbel nanga Traktaat Genootschap na ini Ebina. Nownowde, so wan 650 sma de na ini a bijkantoro famiri.

Na ini den pikinmoro 80 yari sensi mi ben bigin tyari boskopu fu Bijbel oso fu oso na wan fruleigi fasi, Yehovah ben de wan yepi gi mi di e gi mi krakti. A yepi mi fu no de fruleigi moro. Mi e bribi tranga taki Yehovah kan gebroiki iniwan sma di e poti frutrow na en tapu, srefi den wan di fruleigi so kefalek leki mi. Èn mi ben abi wan bun libi trutru taki mi ben man taki nanga sma fu a Gado fu wi, Yehovah!

[Prenki na tapu bladzijde 21]

Nanga Mama èn nanga Clarence, di ben e kon luku wi fu Bethel

[Prenki na tapu bladzijde 23]

Memre fu wi klas di e studeri na tapu a grasi na Gileadskoro krosibei fu South Lansing, New York

[Prenki na tapu bladzijde 23]

Na a kruktu-anusei: Mi, Martha Hess, nanga mama na ini Hawai

[Prenki na tapu bladzijde 24]

Na a leti-anusei: Memre fu a zendeling-oso fu wi na ini Tokio

[Prenki na tapu bladzijde 24]

Na ondrosei: Nanga Martha Hess di de mi pionier patna langa ten kaba

[Prenki na tapu bladzijde 25]

Na inwijding fu den tra gebow fu a bijkantoro di ben bow na ini Ebina, ben feni presi na ini november di pasa