Mateyus skrifi en 28:1-20
28 Baka Sabat-dei, na a musdei m’manten fu a fosi dei fu a wiki, Maria Magdalena nanga a tra Maria kon luku a grebi.
2 Ne den si taki wan bigi gronseki ben de, fu di na engel fu Yehovah* ben saka kon fu hemel. A ben lolo a ston puru di ben de na fesi a grebi èn a ben e sdon na en tapu.
3 A ben e brenki leki faya di e koti na hemel èn en krosi ben weti srefsrefi.
4 Den waktiman ben e beifi èn den ben e frede so te taki den no ben man beweigi.
5 Na engel taigi den uma: „No frede. Mi sabi taki unu e suku Yesus di sma ben spikri na wan postu.
6 Ma a no de dya, bika a opo baka soleki fa a ben taki. Kon luku a presi pe a ben d’don.
7 Go taigi den disipel fu en taki a opo baka. Go es’esi. Taigi den: ’A de na pasi e go na Galilea. Unu o si en drape. Disi na san mi ben musu taigi unu.’”
8 Dati meki den uma gwe fu a grebi es’esi. Den ben e frede, ma den ben de nanga bigi prisiri tu. Na so den lon go ferteri den disipel fu en.
9 Na a momenti dati Yesus waka kon miti den èn a taki: „Fa a e go nanga unu?” Den go na en, den boigi gi en, dan den hori en na en futu.
10 Dan Yesus taigi den: „No frede! Un go ferteri den brada fu mi taki den kan go na Galilea. Den o si mi drape.”
11 Di den ben de na pasi, wan tu fu den waktiman go na a foto fu ferteri den edeman fu den priester ala san psa.
12 Baka di den edeman fu den priester kon makandra nanga den fesiman èn den taki fu a tori, den gi den srudati bun furu solfru moni.
13 Ne den taki: „Un musu taki: ’Den disipel fu en kon na neti èn den fufuru en tyari gwe di wi ben e sribi.’
14 No bruya. Efu a granman kon yere a tori disi, wi o taki nanga en fu a no du unu noti.”
15 Dati meki den teki a solfru moni èn den du san den edeman fu den priester taigi den. Te na a dei fu tide den Dyu e ferteri a tori disi.
16 Den erfu disipel go na Galilea na a bergi pe Yesus ben taigi den fu go.
17 Di den si en, den boigi gi en, ma son sma ben e tweifri efu na en.
18 Di Yesus kon moro krosbei, a taigi den: „Mi kisi ala makti na ini hemel èn na grontapu.
19 Fu dati ede, go na sma fu ala kondre èn meki den tron disipel. Dopu den na ini a nen fu a Papa, fu a Manpkin èn fu a santa yeye.
20 Leri den fu du ala san mi taigi unu fu du. Unu o si taki mi o de nanga unu ala dei te na a kba fu grontapu.”
Futuwortu
^ Luku „Tra prenspari sani” A5.
