Mateyus skrifi en 3:1-17
3 Na a ten dati, Yohanes a Dopuman go preiki na ini a sabana fu Yudea.
2 A taki: „Un musu abi berow, bika a Kownukondre fu hemel kon krosbei.”
3 Fu taki en leti, na fu en a profeiti Yesaya ben taki: „Wan sma e bari na ini a sabana: ’Sreka a pasi fu Yehovah!* Meki den pasi fu en kon reti.’”
4 Yohanes ben e weri krosi di meki fu kameili-w’wiri èn a ben weri wan riem na en mindri. A ben e nyan sprenka nanga bus’oni.
5 Baka dati, den sma fu Yerusalem èn fu heri Yudea nanga a heri kontren na ini a birti fu Yordan-liba ben go na en.
6 A ben dopu* sma na ini Yordan-liba èn den ben taki krin fu den sondu fu den.
7 Di a si taki furu fu den Fariseiman nanga den Saduseiman kon na a presi pe sma ben e dopu, a taigi den: „Un snekipkin, suma taigi unu taki unu o man lowe gi a dei fu Gado en atibron?
8 Un musu du sani di e sori taki unu abi berow.
9 Un no musu prakseri: ’Wi p’pa na Abraham.’ Bika mi e taigi unu taki Gado man meki pkin gi Abraham fu den ston disi.
10 Na aksi de na a rutu fu den bon kba. Fu dati ede, den o koti ibri bon di no e meki bun froktu èn den o iti en go na ini faya.
11 Mi e dopu unu nanga watra, fu di unu abi berow. Ma a sma di e kon baka mi, bigi moro mi èn mi no warti srefi fu puru en susu na en futu. A sma dati o dopu unu nanga santa yeye èn nanga faya.
12 A abi en skopu* na ini en anu kba èn a o krin a heri gron pe a e fon tarwe.* A o poti en tarwe na ini a maksin, ma a o bron a buba nanga faya di nowan sma man kiri.”
13 Bakaten Yesus kmoto na Galilea èn a go na Yohanes na Yordan-liba, fu Yohanes dopu en.
14 Ma fu di Yohanes ben wani tapu en meki a taki: „Yu na a sma di musu dopu mi. Ma now yu e kon na mi fu dopu yu?”
15 Yesus piki en: „Kow du en so disi leisi, bika na a fasi disi wi e du ala sani soleki fa Gado wani.” Baka dati Yohanes no tapu en moro.
16 Ne Yesus dopu. Fa yu si a opo kmoto na ini a watra, hemel opo èn Yohanes si Gado en yeye saka kon na Yesus tapu leki wan doifi.
17 Boiti dati wan sten kmoto na hemel. A taki: „Disi na mi Manpkin. Mi lobi en èn mi feni en bun.”
