Meki na osofamiri-libi waka boen
Kapitel 29
Meki na osofamiri-libi waka boen
1. (a) Fa na osofamiri ben bigin? (b) San ben de a prakseri di Gado ben abi nanga na osofamiri?
DI JEHOVAH GADO ben meki a fosi man nanga oema, a ben tjari den kon makandra foe den meki pikin kon tron wan osofamiri (Genesis 2:21-24; Mateus 19:4-6). A ben de a prakseri foe Gado foe a trowpaar disi ben sa kon abi moro sma, foe di den ben o meki pikin. Dan te den pikin ben gro kon bigi, dan den ben o trow èn kisi pikin, abi den eigi osofamiri. A ben de a prakseri foe Gado taki, baka wan pisi ten, kolokoe osofamiri ben o libi na ibri pisi foe grontapoe. Den ben sa meki ala presi foe grontapoe kon tron wan moi paradijs. — Genesis 1:28.
2, 3. (a) Foe san ede Gado no kan kisi porinen te sani no e waka boen ini wan osofamiri? (b) San de fanowdoe foe abi wan osofamiri-libi pe sani e waka boen?
2 Tokoe na ini a ten disi joe abi osofamiri di broko, èn foeroe trawan di e tan libi nanga makandra ete, no de kolokoe. So boen, kande wan sma sa aksi: ’Efoe Gado ben meki troetroe na osofamiri, wi no moesoe froewakti moro betre bakapisi dan?’ Ma Gado no kan kisi porinen te a no e waka boen na ini wan osofamiri. Wan man di abi wan fabrik, kande e meki wan sani èn e gi bodoi fa foe gebroiki en. Ma na a man di abi a fabrik en fowtoe, efoe a sani broko, foe di a baiman no waka baka den bodoi? Kwetikweti. A sani di a fabrik meki, awinsi a de foe wan kwaliteit di boen dorodoro, sa broko foe di a sma no ben gebroiki en na wan joisti fasi. Na so a de toe nanga na osofamiri.
3 Jehovah Gado gi leri na ini bijbel di abi foe doe nanga na osofamiri-libi. Ma efoe den leri disi poti na wan sei, dan san e pasa dan? Awinsi a seti foe na osofamiri boen dorodoro, tokoe a kan broko. Dan den memre foe na osofamiri no sa de kolokoe. Na a tra sei, te den e waka baka den gronprakseri foe bijbel, dan dati sa meki wan kolokoe osofamiri kon, pe sani e waka boen. A de foe dati ede wan prenspari sani, taki wi froestan fa Gado ben meki den difrenti memre foe na osofamiri èn sortoe ròl a ben abi na prakseri gi den.
FA GADO BEN MEKI A MAN NANGA NA OEMA
4. (a) Sortoe difrenti de na mindri man nanga oema? (b) Foe san ede Gado ben meki den difrenti disi?
4 Ala sma kan si taki Jehovah no ben meki man nanga oema a srefi. A troe taki na foeroe fasi den de a srefi. Ma difrenti na skinsei èn na seks-sei de krin foe si na den. Den de difrenti ini firi toe. Foe san ede den difrenti disi de dan? Gado ben meki den na a fasi dati, foe jepi ibriwan foe den foe doe wan difrenti ròl. Baka di Gado ben meki a man, a ben taki: „A no boen taki libisma tan en wawan. Mi e go meki wan jepi gi en, leki wan fitipisi foe en.” — Genesis 2:18.
5. (a) Fa na oema ben meki kon tron wan „fitipisi” foe a man? (b) Pe a fosi trow ben feni presi? (c) Foe san ede a trowlibi kan de troetroe wan kolokoe seti?
5 Wan fitipisi na wan sani di e fiti na wan tra sani noso di e wroko boen nanga en makandra, so taki a e meki a kon boen dorodoro. Gado ben meki na oema leki wan satisferi patna gi a man foe jepi en foe doe den gebod di Gado ben gi foe foeroe grontapoe nanga libisma èn foe sorgoe gi grontapoe. So boen, baka di Gado ben teki wan pisi foe a man meki na oema, dan Gado ben trow den fosi sma drape na ini a djari foe Eden, foe di a ben ’tjari na oema go na a man’ (Genesis 2:22; 1 Korentesma 11:8, 9). Trowlibi kan de wan kolokoe seti, bika a man nanga na oema, ibriwan foe den meki nanga wan fanowdoe di a trawan man foe gi en. Den difrenti eigifasi foe den de ini balansi nanga makandra. Te wan masra nanga wan wefi e froestan èn e warderi makandra èn e wroko makandra ini akroederi nanga den ròl di den kisi, dan ala toe e doe a pisi foe den foe bow wan kolokoe osofamiri.
A RÒL FOE A MASRA
6. (a) Soema Gado ben meki tron edeman foe na osofamiri? (b) Foe san ede disi de joisti èn praktis?
6 Wan trowlibi noso wan osofamiri abi tiri fanowdoe. Gado ben meki a man nanga wan moro bigi marki foe den eigifasi nanga krakti di de fanowdoe foe gi a tiri disi. Dati meki bijbel e taki: „Wan masra na a edeman foe en wefi, neleki fa Krestes na a edeman foe a gemeente toe” (Efeisesma 5:23). Disi na wan praktis sani, bika pe tiri no de, joe abi problema nanga broeja. Efoe wan osofamiri moesoe de sondro a makti foe wan edeman, dan a ben o de leki wan sma e proeberi foe tjari wan oto sondro stuur. Noso efoe a wefi ben sa strei nanga a makti disi foe na edeman, dan a ben o de leki toe tjariman sidon ini na oto, ibriwan nanga wan stuur di e tjari wan foe den fesiwiel.
7. (a) Foe san ede son oema no lobi a prakseri taki a man abi a makti leki edeman? (b) Ibri sma abi wan edeman, èn foe san ede a seti foe Gado foe a makti foe wan edeman na wan koniwan?
7 Ma foeroe oema no lobi a prakseri taki wan man moesoe de na edeman foe na osofamiri. Wan prenspari sani foe san ede dati de so, de taki foeroe masra no waka baka den leri foe Gado fa foe gebroiki a makti leki edeman na wan joisti fasi. Tokoe a de wan sani di sma e erken taki efoe wan organisâsi wani wroko boen, dan wan sma moesoe de di e tiri sani èn di e teki den bosroiti di moesoe teki te foe kaba. Foe dati ede bijbel e taki nanga koni: „Na edeman foe ibri man na Krestes; a man foe en sei na a edeman foe na oema; Gado foe en sei na a edeman foe Krestes” (1 Korentesma 11:3). Ini a seti foe Gado, Gado na a wan-enkriwan di no abi wan edeman na en tapoe. Ala tra sma, srefi Jesus Krestes, so srefi masra nanga wefi moesoe teki a tiri di den e tiri den èn moesoe saka densrefi na ondro den bosroiti foe trawan.
8. (a) Na eksempre foe soema den masra moesoe waka na en baka te den e gebroiki a makti foe den leki edeman? (b) San masra kan leri foe na eksempre dati?
8 Disi wani taki dati, efoe mansma wani foe doe a ròl foe den leki masra, dan den moesoe teki a makti di Krestes abi leki edeman. Boiti foe dati, den moesoe waka baka na eksempre foe en, foe di den o gebroiki a makti foe den leki edeman na tapoe den wefi foe den na a srefi fasi leki fa Krestes ben doe dati nanga en gemeente foe bakaman. Fa Krestes ben handri nanga en bakaman na grontapoe? Dati ben de ala ten na wan switi fasi, èn na wan fasi pe a ben hori den na prakseri. Noiti a ben grofoe noso kisi atibron esi-esi, srefi efoe den ben e draidrai foe teki san a ben sori den (Markus 9:33-37; 10:35-45; Lukas 22:24-27; Johanes 13:4-15). Te joe loekoe en boen, dan sondro draidrai a ben gi en libi foe den ede (1 Johanes 3:16). Wan kresten masra moesoe studeri na eksempre foe Krestes finifini èn doe ala moeiti foe waka na baka dati te a abi foe doe nanga den sma foe en osofamiri. Te a e doe disi, dan a no sa de wan osofamiri edeman di e basi den, noso di e prakseri ensrefi nomo noso di no e hori den na prakseri.
9. (a) Sortoe kragi foeroe wefi abi? (b) San masra moesoe hori na wan koni fasi na prakseri, te den e gebroiki a makti foe den leki edeman?
9 Ma na a tra sei, den masra moesoe hori disi na prakseri: Joe wefi e kragi taki joe no e opo doe sani troetroe leki edeman foe na osofamiri? A e taki dati joe no e teki fesi na ini na oso èn no e meki plan gi osofamiri aktiviteit, èn no e teki a frantiwortoe foe teki den bosroiti di moesoe teki te foe kaba? Ma na dati Gado e aksi joe foe doe leki masra. A no de foe taki, dati a sa de wan koni sani te joe de nanga opo jesi gi den rai nanga winsi foe tra memre foe na osofamiri èn hori den rai disi na prakseri te joe e gebroiki a makti foe joe leki edeman. A de krin taki joe leki masra abi a moro moeilek ròl na ini na osofamiri. Ma efoe joe e doe opregti moeiti foe doe a ròl dati, dan joe wefi seiker sa de klari foe jepi joe èn hori baka gi joe na ini disi. — Odo 13:10; 15:22.
DOE A RÒL FOE A WEFI
10. (a) Bijbel e gi wefi deki-ati foe doe san? (b) San e pasa te wefi e poti a bijbel rai disi na wan sei?
10 Soleki fa bijbel e taki, dan Gado ben meki na oema leki wan jepi gi a masra foe en (Genesis 2:18). Ini akroederi nanga a ròl dati, bijbel e gi a deki-ati disi: „Meki den wefi saka densrefi na den masra foe den ondro” (Efeisesma 5:22). A de wan aladei sani na ini a ten disi taki oemasma lobi djompo taki èn strei nanga mansma. Ma te wefi wani teki fesi èn e proeberi foe teki a makti leki edeman abra, dan den kan de pikinmoro seiker taki a doe disi foe den o meki problema kon. Foeroe masra e taki foe dati ede: ’Efoe a wani prei basi na ini na oso, meki a prei basi dan.’
11. (a) Fa wan wefi kan jepi en masra foe teki fesi? (b) Efoe wan wefi e doe a ròl di Gado gi en, dan sortoe krakti disi sa abi kande tapoe en masra?
11 Ma kande joe e firi taki sani e dwengi joe foe teki fesi, foe di joe masra no e doe dati. Ma joe kan doe moro foe jepi en foe doe en frantiwortoe leki osofamiri edeman? Joe e sori taki joe e loekoe na en foe a tiri joe? Joe e aksi en rai nanga tiri? Joe e proeberi foe no broko en saka na ini den sani di a e doe? Efoe joe e doe moeiti troetroe foe doe a ròl di Gado gi joe na ini na osofamiri, dan a de pikinmoro seiker taki joe masra sa doe di foe en toe. — Kolosesma 3:18, 19.
12. San e sori taki wefi mag tjari a prakseri foe den na wan joisti fasi kon na fesi, awinsi disi de kontrari a prakseri foe a masra foe den?
12 Disi no wani taki dati wan wefi no mag tjari en prakseri kon na fesi efoe a e denki tra fasi foe a tori leki en masra. A wefi kan abi wan joisti fasi foe loekoe sani, èn na osofamiri ben sa feni wini foe dati efoe en masra ben sa arki na en. Bijbel e teki Abraham wefi Sara poti leki wan eksempre gi kresten wefi foe di a ben saka ensrefi na en masra ondro (1 Petrus 3:1, 5, 6). Tokoe Sara ben sori fa foe loesoe wan osofamiri problema, èn di Abraham no ben agri nanga en, dan Gado ben taigi Abraham: „Arki na en” (Genesis 21:9-12). A no de foe taki dati, te a masra e teki wan bosroiti te foe kaba na ini wan afersi, dan a wefi moesoe hori baka gi dati, efoe nanga dati a no e pasa a wet foe Gado. — Tori foe den Apostel 5:29.
13. San wan boen wefi sa e doe, èn sortoe krakti disi sa abi tapoe en osofamiri?
13 Te wan wefi e doe en ròl na wan joisti fasi, dan a kan doe foeroe foe sorgoe gi na osofamiri. Foe eksempre, a kan bori gosontoe njanjan, hori na oso krin èn na ini boen orde èn abi wan prati na a leri di moesoe gi na den pikin. Bijbel e gi deki-ati na oema di trow „foe lobi den masra foe den, foe lobi den pikin foe den, foe de gosontoe ini denki, foe de krin, foe wroko na oso, foe abi boen-ati, foe saka densrefi na den eigi masra ondro, so taki sma no kosi a wortoe foe Gado” (Titus 2:4, 5). A wefi nanga mama di e doe den wroko disi, sa wini foe ala ten a lobi nanga a respeki foe en osofamiri. — Odo 31:10, 11, 26-28.
A PRESI FOE PIKIN NA INI NA OSOFAMIRI
14. (a) San na a joisti posisi foe pikin na ini na osofamiri? (b) San pikin kan leri foe na eksempre foe Jesus?
14 Jehovah ben gi a fosi libisma paar na ordroe: „Oen meki pikin èn kon foeroe” (Genesis 1:28). Ija, Gado ben taigi den foe kisi pikin. Den pikin ben sa de wan blesi gi na osofamiri (Psalm 127:3-5). Foe di den e kon na ondro a wet nanga a komando foe den papa nanga mama foe den, dan bijbel e teki a posisi foe wan pikin gersi nanga di foe wan srafoe (Odo 1:8; 6:20-23; Galasiasma 4:1). Srefi Jesus ben tan saka ensrefi na en papa nanga mama ondro di a ben de wan pikin (Lukas 2:51). Disi wani taki dati a ben gi jesi na den èn ben e doe san den ben e taigi en. Efoe ala pikin ben doe so, dan disi seiker ben sa tjari kolokoe kon gi na osofamiri.
15. Foe san ede pikin de nofotron wan pen na ati gi den papa nanga mama foe den?
15 Ma, na presi foe pikin de wan blesi gi wan osofamiri, den de na ini a ten disi nofotron wan fonten foe pen na ati gi papa nanga mama. Fa dati doe kon? Foe di den pikin èn so srefi den papa nanga mama, no e poti bijbel leri di abi foe doe nanga na osofamiri-libi, na ini a libi foe den. San na wan toe foe den wet nanga gronprakseri disi foe Gado? Meki wi go ondrosoekoe wan toe foe den na tapoe den tra bladzijde di e kon. Te wi o doe dati, dan loekoe efoe joe no e agri taki, te joe o gebroiki den, joe kan tjari kolokoe kon na ini na osofamiri foe joe.
Lobi joe wefi èn gi grani na en
16. Sortoe komando den masra e kisi, èn fa den e doe den komando disi na a joisti fasi?
16 Nanga a koni foe Gado, bijbel e taki: „Den masra moesoe lobi den wefi foe den leki den eigi skin” (Efeisesma 5:28-30). Ala ten baka ondrofeni sori taki, efoe den wefi wani foe de kolokoe, dan den moesoe abi a firi taki den masra foe den lobi den. Disi wani taki dati wan masra moesoe poti spesroetoe prakseri na en wefi èn disi wani taki toe dati a moesoe sori safoefasi èn sori taki a e froestan en wefi èn ala ten baka moesoe gi en a djaranti taki a lobi en. A moesoe ’gi en grani’, soleki fa bijbel e taki. A e doe disi foe di ini ala sani san a e doe, a e hori a wefi na prakseri. Na a fasi dati a sa wini a lespeki foe a wefi. — 1 Petrus 3:7.
Abi lespeki gi joe masra
17. Sortoe komando den wefi e kisi, èn fa den e doe disi?
17 Èn san wi kan taki foe den wefi? „A wefi moesoe abi dipi lespeki gi en masra”, bijbel e taki (Efeisesma 5:33). A poti di a rai disi e poti na wan sei, na wan prenspari sani foe san ede son masra ati e bron nanga den wefi foe den. Wan wefi e sori lespeki gi en masra te a e hori baka gi den bosroiti foe en èn te a e wroko makandra nanga en nanga en heri sili foe doro den marki di den poti leki osofamiri. Te a e doe en ròl di bijbel gi en leki ’jepi nanga fitipisi’ foe en masra, dan a e meki en makriki gi en masra foe lobi en. — Genesis 2:18.
De getrow na makandra
18. Foe san ede trowpatna moesoe de getrow na makandra?
18 Bijbel e taki: „Masra nanga wefi moesoe de getrow na makandra.” Gi a masra bijbel e taki: „De kolokoe nanga joe wefi èn feni prisiri nanga a pikinwenke di joe ben trow . . . foe san ede joe ben sa gi a lobi foe joe na wan tra oema? Foe san ede joe ben sa wani a moi foe wan tra man wefi di e hari joe?” (Hebrewsma 13:4; Odo 5:18-20, Today’s English Version, [Ingrisitongo]) Ija, soetadoe de teige a wet foe Gado; a e tjari problema kon na ini wan trowlibi. „Foeroe sma e denki taki wan soetadoe afersi e tjari moro libi kon na ini wan trowlibi”, na so wan sabiman foe trowlibi ben taki, ma a ben taki moro fara taki so wan afersi ala ten e tjari „troetroe problema” kon. — Odo 6:27-29, 32.
Soekoe foe plisi joe patna
19. Fa trowpatna kan kisi a moro bigi prisiri foe a sekslibi?
19 Wan sma no e feni kolokoe te a e soekoe ini a fosi presi en eigi seks prisiri, ma moro foeroe te a e proeberi foe plisi en trowpatna toe ini a tori disi. Bijbel e taki: „Meki a masra gi en wefi san a moesoe kisi, ma meki a wefi doe a srefi toe na en masra” (1 Korentesma 7:3). Krakti e poti na tapoe gi. Èn te wan sma e gi, dan a e kisi troetroe prisiri. A de soleki fa Jesus Krestes ben taki: „Moro kolokoe de ini gi sani leki ini kisi sani.” — Tori foe den Apostel 20:35.
Gi joesrefi na den pikin foe joe
20. Foe san ede a de so prenspari taki papa nanga mama doe sani makandra nanga den pikin foe den?
20 Wan pikin foe so wan aiti jari ben taki: „Mi papa e wroko ala ten. Noiti a de na oso. A e gi mi moni nanga wan lo preisani, ma pikinmoro noiti mi e si en. Mi lobi en èn mi winsi taki a no ben sa wroko ala ten, so taki mi ben kan si en moro.” O moro boen na osolibi de, te papa nanga mama e waka baka a bijbel komando foe leri den pikin foe den ’te den e sidon na den oso èn te den de na pasi èn te den e didon èn te den e opo’! Te joe e gi joesrefi na den pikin foe joe, e meki wan boen gebroiki foe a ten di joe de nanga den, dan dati seiker sa tjari osofamiri kolokoe kon. — Deuteronomium 11:19; Odo 22:6.
Gi a tranga leri di de fanowdoe
21. San bijbel e taki foe a gi foe tranga leri na pikin?
21 Wi hemel Tata e gi papa nanga mama wan boen eksempre, foe di a e gi en pipel leri di e sori den na tapoe den fowtoe, noso e gi den tranga leri. Pikin-nengre abi tranga leri fanowdoe (Hebrewsma 12:6; Odo 29:15). Foe di bijbel e erken disi, dan a e gi a tranga: „Oen tata, . . . tan kweki [oen pikin] na ini a tranga leri nanga makti rai foe Jehovah.” A gi foe tranga leri, awinsi disi wani taki fonfon noso a teki di joe e teki grani poeroe na den anoe, na wan boeweisi taki papa nanga mama lobi den pikin foe den. Bijbel e taki: „A sma di lobi [en manpikin], na a sma di e soekoe en troetroe nanga tranga leri.” — Efeisesma 6:4; Odo 13:24; 23:13, 14.
Oen jongoewan — kakafoetoe gi den pasi foe grontapoe
22. Sortoe plekti de tapoe jongoewan, èn san de ini a tori foe doe en?
22 Grontapoe e doe moeiti foe tjari jongoewan go so fara foe pasa den wet foe Gado. Boiti foe dati, bijbel e taki dati ’lawfasi tai na a ati foe wan boi’ (Odo 22:15). So boen, joe de na ini wan feti foe doe san boen. Tokoe bijbel e taki: „Oen pikien, oen moe gi jesi na oen tata nanga mama vo Masra hede; bikasi so a de fiti.” A sa tjari bigi wini kon. So boen, oen pikin, oen sori taki oen koni. Poti prakseri na a rai: „Memre oen Mekiman ala di oen jongoe ete.” Kakafoetoe gi den tesi foe gebroiki drug, foe kon droengoe, foe doe hoeroedoe èn foe doe tra sani di de teige den wet foe Gado. — Efeisesma 6:1-4, Njoe Testament Nanga dem Psalm; Preikiman 12:1; Odo 1:10-19.
Studeri bijbel makandra
23. Sortoe wini osofamiri sa kisi te den e studeri bijbel makandra?
23 Efoe wán memre foe na osofamiri e studeri bijbel èn e poti den leri foe en na ini en libi, dan dati sa meki na osofamiri kon kolokoe. Ma efoe alamala — masra, wefi nanga pikin — e doe disi, fa den sa de wan blesi osofamiri! Wan waran krosibei matifasi nanga wan opo komunikâsi sa de, ala di ibri memre foe na osofamiri e proeberi foe jepi den trawan foe dini Jehovah Gado. So boen, meki a de wan osofamiri gwenti foe studeri bijbel makandra! — Deuteronomium 6:4-9; Johanes 17:3.
DOE WAN SANI NANGA OSOFAMIRI PROBLEMA MEKI SANI WAKA BOEN
24. Foe san ede trowpatna moesoe loekoe pasa den fowtoe foe makandra?
24 Srefi na ini osofamiri di normaal de kolokoe, joe sa abi problema ten na ten. Disi e kon foe di wi alamala de onvolmaakti èn e doe fowtoe sani. „Wi alamala e naki foetoe foeroetron”, bijbel e taki (Jakobus 3:2). So boen, trowpatna no moesoe aksi volmaaktifasi foe makandra. Na presi foe dati, ibriwan foe den moesoe loekoe pasa den fowtoe foe a trawan. Dati meki no wan foe den patna moesoe froewakti wan volmaakti kolokoe trowlibi, foe di dati na wan sani di onvolmaakti libisma no man doro.
25. Fa moeilekhèit na ini a trowlibi moesoe loesoe na wan lobi fasi?
25 A no de foe taki, dati wan masra nanga wan wefi sa wani foe doe moeiti foe no doe sani san e tergi a tra patna. Ma o serjoesoe den e proeberi foe doe disi toe, tokoe den sa doe sani sontron di e broeja a trawan. Fa den moesoe doe nanga moeilekhèit dan? A bijbel rai na disi: „Lobi e tapoe wan lo sondoe” (1 Petrus 4:8). Disi wani taki dati patna di e sori lobi, no sa taki ala leisi baka foe den fowtoe di a trawan doe. Lobi e taki, te joe loekoe en boen: ’Ija, joe ben meki wan fowtoe. Ma dati mi e meki sontron toe. So boen, mi sa loekoe pasa a di foe joe èn joe mag doe a srefi gi mi.’ — Odo 10:12; 19:11.
26. Te wan problema opo ede kon, san sa jepi dan foe loesoe na afersi?
26 Te trowpaar de klari foe taki dati den meki fowtoe èn e proeberi foe no doe den moro, dan foeroe kroetoekroetoe nanga pen na ati no abi foe de. A marki foe den moesoe de foe loesoe problema, no foe wini wan kroetoekroetoe. Srefi efoe joe patna no abi leti, dan joe kan meki en moro makriki foe loesoe a problema te joe e sori switifasi. Efoe joe na a sma di meki a fowtoe, dan aksi pardon na wan sakafasi. No poti a tori na wan tra ten; doe wan sani nanga a problema sondro foe draidrai. „No meki son dongo ala di joe de na ini wan atibron fasi.” — Efeisesma 4:26.
27. Trowpatna sa kisi jepi foe loesoe den problema foe den te den waka na baka sortoe bijbel rai?
27 Spesroetoe efoe joe na wan sma di trow, dan joe moesoe waka baka a gronprakseri foe „e hori ai, no soso foe persoonlijk belangstelling ede na tapoe oen eigi afersi, ma so srefi foe persoonlijk belangstelling ede na tapoe di foe tra sma” (Filipisma 2:4). Joe moesoe gi jesi na a bijbel komando: „Teki weri den safoe firi foe lobi foe sari-ati, boen-atifasi, sakafasi foe denki, safri-atifasi nanga langa pasensi. Tan froedrage makandra èn gi makandra pardon na wan fri fasi efoe a wan abi wan sani foe kragi foe a trawan. Soleki fa Jehovah gi oenoe pardon na wan fri fasi, na so oenoe moesoe doe toe. Ma boiti ala den sani disi, teki weri lobi, bikasi a de wan volmaakti banti foe wánfasi.” — Kolosesma 3:12-14.
28. (a) Brokotrow na a fasi foe loesoe trowproblema? (b) Soleki fa bijbel e taki, san na a wan-enkri sani foe kan broko wan trow, so taki wan sma de fri foe trow baka?
28 Na ini a ten disi foeroe trowpaar no e meki a rai foe a Wortoe foe Gado jepi den foe loesoe den problema foe den, ma den e soekoe foe broko a trow. Gado e feni brokotrow boen leki wan fasi foe loesoe problema? Nôno, a no e feni dati boen (Maleaki 2:15, 16). A ben de en prakseri taki a trowlibi ben sa de wan seti foe wan sma en heri libi langa (Romesma 7:2). Bijbel e gi pasi foe soso wán sani foe broko wan trow, so taki wan sma de fri foe trow baka èn dati na hoeroedoe (Grikitongo: porneia, tegoe seks hoeroedoe). Efoe wan sma doe hoeroedoe, dan a patna di no fowtoe kan bosroiti efoe a o broko a trow noso no o broko a trow. — Mateus 5:32.
29. (a) Efoe joe trowpatna no de nanga joe na ini a kresten anbegi, san joe moesoe doe dan? (b) San ben sa kan de wan boen bakapisi?
29 San foe doe dan, efoe joe trowpatna e weigri foe studeri a Wortoe foe Gado makandra nanga joe, noso e gens srefi joe kresten aktiviteit? Tokoe ete bijbel e gi joe deki-ati foe tan nanga joe patna èn no si wan prati leki a makriki fasi foe komoto na ini den problema foe joe. Doe san joesrefi kan foe meki a situwâsi na ini joe oso kon moro boen, foe di joe e poti na ini joe libi san bijbel e taki foe a fasi fa joe moesoe tjari joesrefi. Dan kande baka wan pisi ten joe kan wini joe patna leki wan bakapisi foe a fasi fa joe e tjari joesrefi leki kresten (1 Korentesma 7:10-16; 1 Petrus 3:1, 2). Èn fa joe sa kisi wan blesi efoe a lobi-ati pasensi foe joe kisi pai na a fasi disi!
30. Foe san ede a de so prenspari taki papa nanga mama gi den pikin foe den wan boen eksempre?
30 Foeroe osofamiri problema na ini a ten disi abi foe doe nanga den pikin. San joe kan doe efoe disi de a tori na ini joe osofamiri? Ini a fosi presi, leki papa nanga mama oenoe moesoe gi wan boen eksempre. Disi de so, foe di pikin e firi moro foe waka na baka den doe foe joe leki foe doe san joe e taki. Èn efoe den doe foe joe de tra fasi leki den wortoe foe joe, dan jongoewan e si disi esi-esi. So boen, efoe joe wani taki joe pikin libi wan toemoesi boen kresten libi, dan joesrefi moesoe gi na eksempre. — Romesma 2:21, 22.
31. (a) Sortoe moro prenspari sani pikin abi fanowdoe foe gi jesi na a rai foe a papa nanga mama foe den? (b) Fa joe ben sa kan sori joe pikin taki a de wan koni sani foe gi jesi na a wet foe Gado di e tapoe wi foe doe hoeroedoe?
31 Joe moesoe rideneri noso taki-go-taki-kon nanga joe pikin. A no nofo foe taigi den jongoewan nomo taki: ’Mi no wani taki joe doe hoeroedoe, bikasi a fowtoe.’ Joe moesoe sori den, taki na a Mekiman foe den, Jehovah Gado, e taki dati den sortoe sani leki hoeroedoe fowtoe (Efeisesma 5:3-5; 1 Tesalonikasma 4:3-7). Ma srefi dati no nofo. Pikin moesoe kisi jepi toe foe si foe san ede den moesoe gi jesi na den wet foe Gado èn fa disi sa tjari wini gi den. Foe eksempre, joe ben sa kan poti a prakseri foe joe pikin na tapoe a kefalek moi fasi fa wan libisma beibi e doe kon, foe di a siri foe wan man nanga na eksi foe wan oema ben kon na makandra, èn joe kan aksi: ’Joe no denki taki a Sma di meki a wondroe disi foe wan mama meki wan pikin, sabi moro boen fa libisma moesoe gebroiki a krakti di Gado gi den foe meki pikin?’ (Psalm 139:13-17) Noso joe ben sa kan aksi: ’Joe denki taki wi Gran Mekiman ben sa meki wan wet foe poeroe a prisiri foe wi na ini a libi? Na presi foe dati, wi no ben sa de moro kolokoe efoe wi ben sa gi jesi na den wet foe en?’
32. (a) Fa joe moesoe de, efoe a fasi fa joe pikin e si sani no e agri nanga di foe Gado? (b) Fa joe pikin kan kisi jepi foe si a koni foe san bijbel e taki?
32 Den sortoe aksi disi kan meki joe pikin go denki foe a wet foe Gado di abi foe doe nanga a gebroiki foe den sjenpresi di de foe kan meki pikin. Meki a tjari den prakseri foe en kon na fesi. Efoe den no de san joe ben winsi taki den moesoe de, no atibron. Proeberi foe froestan, taki a geslakti foe joe pikin drifi boen fara komoto na den regtfardiki leri foe bijbel, èn proeberi dan foe sori en foe san ede den doe foe en geslakti di de teige boen gwenti nanga wet, no de wan koni sani. Kande joe kan poti a prakseri foe joe pikin na tapoe spesroetoe eksempre pe seks hoeroedoe meki pikin kon gebore dorosei foe a trowlibi, èn so srefi meki siki na a sjenpresi noso tra problema kon. Na a fasi disi a e kisi jepi foe si a regtfardikifasi nanga joistifasi foe san bijbel e taki.
33. Foe san ede a bijbel howpoe foe libi foe têgo na ini wan paradijs na grontapoe kan jepi wi foe meki na osofamiri-libi waka boen?
33 A bijbel howpoe foe libi foe têgo na ini wan paradijs na grontapoe, kan jepi wi spesroetoe foe meki na osofamiri-libi waka boen. Fa so? Bika efoe wi wani libi troetroe na ini Gado njoen seti, dan wi sa doe ala moeiti foe libi now soleki fa wi e howpoe foe libi na a ten dati. Disi wani taki dati wi sa waka soifri na baka den leri nanga tiri foe Jehovah Gado. A bakapisi sa de taki Gado sa poti na tapoe a disiten kolokoe foe wi, a kroon foe têgo libi nanga kolokoe pasa marki na ini ala têgo ten di de na wi fesi. — Odo 3:11-18.
[Aksi foe a tori disi]
