Gi den Romesma 2:1-29
2 Ma brada, te yu e krutu trawan, yu no man taki dati yu no abi fowtu, awinsi suma na yu. Bika te yu e krutu trawan, dan yu e krutu yusrefi fu di yu e du den srefi sani dati tu.
2 Wi sabi taki te Gado o krutu den sma di e du den sani disi, a o krutu den na wan reti fasi.
3 Mi brada, efu yu e krutu sma fu den srefi sani di yu e du, dan yu denki taki Gado no o krutu yu tu?
4 Noso yu e si en leki noti taki Gado abi so furu bun-ati, taki a e ferdrage sani èn taki a abi pasensi? Na sabi yu no sabi taki na fu di Gado abi bun-ati, meki a wani yepi yu fu abi berow?
5 Ma fu di yu tranga-ede so èn yu no abi berow, meki Gado en ati e bron nanga yu moro nanga moro. A o strafu yu na a dei fu en bigi atibron te a o krutu sma na wan reti fasi.
6 A o pai ibri sma gi den sani di den e du.
7 A o gi têgo libi na den sma di e tan du bun fu di den wani kisi glori, grani nanga wan skin di no man pori.
8 Ma Gado en ati o bron srefsrefi èn a o strafu den sma di lobi meki trobi, di no e du san reti èn di no wani arki den tru tori fu Gado.
9 Ibri sma di e du ogri o kisi problema èn a o pina. Disi o miti den Dyu fosi, ma a o miti den Grikisma tu.
10 Ma ala sma di e du bun o kisi glori, grani nanga freide. Den Dyu o kisi den sani disi fosi, ma den Grikisma o kisi den tu.
11 Bika Gado no lobi a wan sma moro a trawan.
12 Efu wan sma sondu fu di a no sabi Gado wet, dan a o dede awinsi a no sabi a wet. Ma efu wan sma sondu aladi a sabi Gado wet, dan na a wet dati o krutu en.
13 Bika a no den sma di yere a wet nomo, Gado feni bun. Ma na den sma di e libi soleki fa a wet e taki, Gado e si leki ret’ati sma.
14 Den sma di no de Dyu no sabi den wet fu Gado. Ma te den e du san a wet e taki sondro fu den sabi, dan dati e sori taki a wet de na ini den ati aladi den no sabi a wet.
15 Na den srefi sma disi e sori taki a wet skrifi na ini den ati. A konsensi fu den e sori dati tu. Den eigi prakseri e sori den taki den fowtu noso taki den no fowtu.
16 Na so a o de na a dei te Gado o meki Krestes Yesus krutu den sani di libisma du kibrikibri. Na dati a bun nyunsu di mi e preiki e sori.
17 Yu e kari yusrefi wan Dyu, yu e fertrow tapu a Wet èn yu e meki bigi taki yu na fu Gado.
18 Yu sabi san Gado wani èn yu sabi san bun, fu di sma leri yu a Wet.
19 Yu feni taki yu musu sori brenisma a pasi èn taki yu de wan leti gi den sma di de na ini dungru.
20 Yu feni taki na yu musu sori den sma di no e gebroiki den ferstan, san bun èn taki na yu musu de leriman fu den yongu pkin. Yu e bribi taki yu sabi den moro prenspari sani nanga den tru tori di skrifi na ini a Wet.
21 Ma yu di e gi trawan leri, fu san ede yu no e du den sani di yu e leri sma? Yu e preiki gi sma: „No fufuru”, ma yu e fufuru?
22 Yu e taigi sma: „No waka gi yu trowpatna”, ma yu e waka gi a trowpatna fu yu? Yu e taki dati yu e fisti gi falsi gado, ma yu e fufuru sani puru na ini den tempel?
23 Yu e meki bigi taki yu sabi a Wet, ma yu e gi Gado syen fu di yu no e du san a Wet e taki.
24 Bika „na fu unu ede Gado e kisi pornen na mindri den trakondre sma”, na so Gado Buku taki.
25 Fu taki en leti, soso te yu e du san a Wet e taki, dan fosi a besnèi* di yu besnèi abi waarde. Ma efu yu e trangayesi a Wet, dan awinsi yu besnèi, a de leki yu no besnèi.
26 Fu dati ede, efu wan sma di no besnèi, e du san a Wet e taki, dan a de leki a sma dati besnèi awinsi a no besnèi.
27 Te wan sma di no besnèi e du san a Wet e taki, dan a e krutu yu di sabi a Wet èn di besnèi, fu di yu no e du san a Wet e taki.
28 Bika a no te wan sma gebore leki wan Dyu, dan en na wan trutru Dyu. A no te wan sma besnèi, dan a besnèi trutru.
29 Ma san de na ini wan sma ati, na dati e meki taki a de wan trutru Dyu èn na en ati besnèi. A no wan wet e taki disi, ma na a santa yeye. A no libisma e prèise a sma dati, ma na Gado e prèise en.
