Gi den Romesma 9:1-33
9 Mi na wan bakaman fu Krestes. Santa yeye e tiri mi konsensi èn mi e taki san tru. Mi no e lei te mi e taki
2 dati mi e sari srefsrefi èn taki mi e firi wan pen na ini mi ati di no wani gwe.
3 Bika mi e winsi taki fluku ben kan kon na mi tapu èn taki na mi ben o prati fu Krestes na presi fu mi brada, sobun den sma fu mi pipel.
4 Den na Israelsma di Gado ben teki leki en manpkin èn di ben kisi glori. Nanga den a ben meki den ferbontu, na den a ben gi a Wet, na den ben kisi a grani fu du santa wroko gi en èn na den a ben pramisi difrenti sani.
5 Den na bakapkin fu den afo fu wi, èn Krestes di gebore leki wan libisma, kmoto fu den. Gado di e tiri ala sani musu kisi prèise fu têgo. Amen.
6 Ma disi no wani taki dati a wortu fu Gado no kon tru. Bika a no ala bakapkin fu Israel na trutru Israelsma.
7 A no ala bakapkin fu Abraham na trutru bakapkin fu en tu, bika Gado Buku taki: „Den bakapkin di mi pramisi yu o kmoto fu Isak.”
8 Sobun, a no ala den bakapkin fu Abraham na trutru pkin fu Gado, ma na soso den wan di gebore fu di Gado ben pramisi dati. Den na den trutru pkin fu Abraham.
9 Bika Gado ben pramisi disi: „Tra yari na a ten disi, mi o drai kon baka na yu. Dan yu frow Sara o abi wan manpkin.”
10 Ma a no na a okasi dati w’wan a ben meki wan pramisi. A ben du dati tu di Rebeka ben kon de nanga bere fu wi afo Isak èn di a ben musu kisi wan tweeling.
11 Gado ben besroiti na fesi kba san a e luku te a e teki wan sma leki en pkin. A no e luku den sani di a sma e du, ma a e kari suma a wani. Dati meki di den boi no ben gebore ete èn di den no ben du nowan bun noso ogri ete,
12 a taigi Rebeka: „A moro owruwan o de a srafu fu a moro yonguwan.”
13 A de soleki fa Gado Buku taki: „Na Yakob mi ben lobi. Mi no ben lobi Esau.”
14 We, san wi sa taki dan? Wi kan taki dati Gado no e du san reti? Kwetkweti!
15 A taigi Moses: „Mi o sori bun-ati gi suma mi wani èn mi o abi sar’ati gi suma mi wani.”
16 Sobun, a no e d’don na san wan sma wani noso na omeni muiti a sma e meki,* ma a e d’don na Gado di abi sar’ati.
17 Na ini Gado Buku skrifi san a ben taigi Farao. A taigi en: „Mi meki yu tan na libi fu sori sma mi krakti èn fu meki sma na heri grontapu kon sabi mi nen.”
18 Sobun, a abi sar’ati gi suma a wani, ma efu a wani a kan libi wan sma tu meki a kon tranga-ede.
19 Kande yu o aksi mi: „Efu nowan sma man tapu Gado fu du san a wani, dan fu san ede a e suku fowtu na wi?”
20 Ma suma na yu, libisma, taki yu wani hartaki nanga Gado? Efu wan sma meki wan sani fu klei, a sani dati man taigi a sma di meki en: „Fu san ede yu meki mi so?”
21 Wan sma di e meki sani nanga klei mag du san a wani nanga a klei, a no so? A kan teki wan pisi klei fu meki wan prapi di a e gebroiki gi wan prenspari wroko, ma a kan teki a srefi pisi klei fu meki wan tra prapi gi wan lagi wroko, a no so?
22 Na so a de tu nanga Gado. A wani puru atibron na tapu ogrisma èn a wani meki sma si a krakti fu en. Ma tòg a abi pasensi nanga den sma di e meki en ati bron èn di fiti fu kisi strafu.
23 A e du disi fu meki den sma noso den prapi di a o sori sar’ati, si a bigi glori fu en, bika a sreka den prapi disi na fesi fu gi den glori.
24 Wi na den prapi disi di a teki puru na mindri Dyu èn na mindri den trakondre sma. Efu dati na san a du, dan san dan?
25 A de soleki fa a taki tu na ini a buku fu Hosea: „Den sma di no de mi pipel, mi o kari ’mi pipel’, èn na uma di mi no ben lobi, mi o kari ’mi lobiwan’.
26 Na a presi pe mi ben taigi den: ’Unu no de mi pipel’, na drape mi o kari den ’manpkin fu a libilibi Gado’.”
27 Yesaya srefi ben taki fu Israel: „Awinsi den Israelsma furu leki a santi na ini se, tòg na soso den wan di tan abra o kisi ferlusu.
28 Bika Yehovah* o aksi den sma na grontapu fu gi frantwortu fu san den du. A o strafu den es’esi.”
29 Yesaya ben taki na fesi tu: „Efu Yehovah* di e tiri den legre no ben meki wan tu pkin fu wi tan na libi, dan wi ben o kon de leki Sodom èn wi ben o gersi Gomora.”
30 We, san wi sa taki dan? Den trakondre sma no ben e du muiti fu de ret’ati sma. Ma tòg Gado e si den leki ret’ati sma fu di den abi bribi.
31 Na a tra sei, den Israelsma ben e du muiti fu hori a Wet fu di den ben wani de ret’ati sma. Ma tòg den no ben man du ala san a Wet e taki.
32 Fu san ede? Bika den ben e denki taki na den sani di den ben e du ben o meki den tron ret’ati sma. Den no ben si taki na bribi ben o meki den tron ret’ati sma. Den ben stotu den futu na a „ston di e meki sma stotu den futu”.
33 A de soleki fa Gado Buku taki: „Luku, na Sion mi e poti wan ston di e meki sma stotu den futu èn wan bigi ston di e meki sma fadon. Ma a sma di e bribi na ini en, no o kisi syen.”
