Yohanes skrifi en 13:1-38
13 Fosi a Paskafesa Yesus ben sabi taki a yuru ben doro fu gwe libi a grontapu disi fu go na a P’pa. A ben lobi den sma fu en di ben de na grontapu. Iya, a ben lobi den te na a kba.
2 Di neti tapu, Yesus nanga den disipel fu en ben e nyan. Na a ten dati Didibri ben poti a prakseri kba na ini na ati fu Yudas Iskariot, a manpkin fu Simon, taki a musu seri Yesus.
3 Yesus ben sabi taki a P’pa ben poti ala sani na ini en anu. A ben sabi tu taki a ben kon fu Gado èn taki a ben o go na Gado.
4 Ne Yesus opo kmoto na a tafra pe den ben e nyan èn a puru en dyakti. Dan a teki wan duku èn a tai en na en bere.
5 Baka dati, a poti watra na ini wan beki, dan a bigin wasi den futu fu den disipel. Ne a drei den futu nanga a duku di a ben tai na en bere.
6 Di a doro na Simon Petrus, dan Petrus taigi en: „Masra, na yu e wasi mi futu?”
7 Yesus piki en: „Now yu no e ferstan san mi e du, ma bakaten yu o ferstan.”
8 Petrus taigi en: „Noiti yu o wasi mi futu.” Yesus piki en: „Efu mi no wasi yu futu, yu a no wan disipel fu mi.”
9 Simon Petrus taigi en: „Masra, no wasi mi futu w’wan, ma wasi mi anu nanga mi ede tu.”
10 Yesus taigi en: „Efu wan sma wasi en skin kba, dan na soso en futu a abi fu wasi fu di en heri skin krin kba. Unu krin, ma a no un alamala.”
11 Bika a ben sabi suma na a sma di ben o seri en. Dati meki a taki: „A no un alamala krin.”
12 Di a kba wasi den futu fu den, a weri en dyakti, dan a go sdon baka na a tafra èn a taigi den: „Unu ferstan san mi du gi unu?
13 Unu e kari mi: ’Leriman’ nanga ’Masra’, èn unu abi leti, bika na dati mi de tu.
14 Efu mi wasi un futu aladi mi na un Masra nanga Leriman, dan un musu wasi* den futu fu makandra tu.
15 Bika mi gi unu na eksempre, so taki unu kan du tu san mi du gi unu.
16 Unu kan bribi mi: Wan srafu no bigi moro en masra èn wan boskopuman no bigi moro a sma di seni en.
17 Efu unu sabi den sani disi èn unu e du den, dan unu o de koloku.
18 Mi no e taki fu un alamala. Mi sabi den sma di mi kari. Ma disi e psa, so taki den sani di skrifi na ini Gado Buku kan kon tru. Drape skrifi: ’A sma di ben e nyan mi n’nyan e suku fu du mi ogri.’*
19 Mi e taigi unu den sani disi now, fosi den psa, so taki te den psa unu kan bribi taki mi na a sma dati.
20 Bribi mi: Efu wan sma e teki a wan di mi seni kon, dan a e teki mi tu. Èn a sma di teki mi, e teki a sma di seni mi kon.”
21 Baka di Yesus taki disi, a bigin sari trutru èn a taigi den krin: „Mi e taigi unu: Wan fu unu o seri mi.”
22 Den disipel luku makandra fu di den no ben sabi fu suma a ben taki.
23 Wan fu den disipel fu Yesus ben sdon krosbei fu en èn Yesus ben lobi en.
24 Simon Petrus meki wan sani nanga en ede gi a disipel dati èn a taigi en: „Taigi wi fu suma a e taki.”
25 Dati meki a disipel disi skoifi go moro krosbei na Yesus èn a aksi en: „Masra, suma na en?”
26 Yesus piki en: „Na a sma di mi o gi a pisi brede di mi dopu na ini a komki.” Ne a dopu a pisi brede na ini a komki, dan a gi Yudas, a manpkin fu Simon Iskariot.
27 Di Yudas teki a pisi brede, dan Satan teki en abra. Fu dati ede Yesus taigi en: „A sani di yu wani du, go du en moro esi.”
28 Ma nowan fu den trawan di ben sdon na a tafra ben sabi fu san ede Yesus taigi en a sani disi.
29 Fu di Yudas ben e hori a monikisi meki sonwan fu den ben denki taki Yesus ben seni en go bai sani gi a fesa. Kande den ben denki tu taki a ben musu gi den pôtisma wan sani.
30 Fu dati ede di Yudas teki a pisi brede, a go direk na dorosei. A ben de neti kba.
31 Baka di Yudas go na dorosei, Yesus taki: „A Manpkin fu libisma e kisi grani now èn a o meki Gado kisi grani tu.
32 Gado srefi o gi en grani èn a e gi en grani nownow kba.
33 Mi pkin, mi o de nanga unu wan syatu pisi ten ete. Unu o suku mi èn san mi taigi den Dyu, na dati mi e taigi unu now tu: ’Pe mi o go, unu no man kon.’
34 Mi e gi unu wan nyun wet: Un musu lobi makandra. Neleki fa mi lobi unu, na so un musu lobi makandra tu.
35 Te unu lobi makandra, dan ala sma o sabi taki unu na mi disipel.”
36 Simon Petrus taigi en: „Masra, pe yu o go?” Yesus piki: „Pe mi e go, yu no man kon nanga mi now, ma bakaten yu o kon na mi.”
37 Petrus taigi en: „Masra, fu san ede mi no man kon nanga yu now? Mi de klarklari fu gi mi libi* gi yu.”
38 Yesus piki en: „Yu de klarklari fu gi yu libi* gi mi? Bribi mi: Fosi wan kakafowru bari, yu o taki dri leisi taki yu no sabi mi.”
