Yohanes skrifi en 2:1-25
2 Tu dei baka dati wan trowfesa ben de na Kana na ini Galilea èn a m’ma fu Yesus ben de drape.
2 Yesus nanga den disipel fu en ben kisi wan kari tu fu kon na a trowfesa.
3 Di a win ben de fu kba, a m’ma fu Yesus taigi en: „Den no abi win moro.”
4 Ma Yesus taigi en: „Frow, san mi nanga yu abi fu du nanga dati?* Mi yuru no doro ete.”
5 En m’ma taigi den man di ben e prati a win: „Un du ala san a e taigi unu.”
6 Siksi ston kroiki ben de drape so taki den sma ben kan wasi den anu soleki fa den wet fu den Dyu ben e taki. Ibriwan fu den kroiki ben kan teki sowan 44 noso 66 liter* watra.
7 Yesus taigi den man: „Furu den kroiki nanga watra.” Ne den furu den te na a lanki.
8 Dan a taigi den: „Un teki pkinso, dan un tyari en go na a fesiman fu a fesa.” Ne den du san a taki.
9 (A fesiman fu a fesa no ben sabi fu pe a win kmopo, ma den man di ben puru a watra ben sabi.) Di a fesiman fu a fesa tesi a watra di ben kenki kon tron win, a kari a trowmasra kon.
10 A taigi en: „Ala sma e poti a bun win fosi èn te den sma kon drungu kba, den e poti a win di no bun so. Ma yu kibri a bun win èn now fosi yu e kon nanga en.”
11 Disi ben de a fosi wondru di Yesus du di a ben de na Kana na ini Galilea. Na so a sori sma a glori fu en èn den disipel fu en ben bribi na ini en.
12 Baka dati, a go nanga en m’ma, den brada fu en nanga den disipel fu en na Kaperna-um, ma den no tan langa drape.
13 Di a Paskafesa fu den Dyu ben de krosbei, Yesus go na Yerusalem.
14 Di a doro ini a tempel a si sma di ben e seri kaw, skapu nanga doifi. A si sma tu di ben e sdon na tapu den sturu fu den e wissel moni.
15 Fu dati ede a meki wan wipi fu t’tei, dan a yagi ala den sma nanga den skapu nanga den kaw fu den kmoto na ini a tempel. A trowe a moni fu den sma di ben e wissel moni èn a drai den tafra fu den tapu.
16 A taigi den sma di ben e seri doifi: „Puru den sani fu dya! Mi P’pa oso a no wan w’woyo!”*
17 Den disipel fu en ben memre san Gado Buku taki: „A lobi di mi abi gi yu oso o de leki wan faya di e bron na ini mi.”
18 Dati meki den Dyu taigi en: „Du wan wondru fu sori wi taki yu abi a reti fu du den sani disi.”
19 Yesus piki den: „Broko a tempel disi, dan mi o bow en baka na ini dri dei.”
20 Den Dyu taki: „A tempel disi bow na ini 46 yari, dan fa yu kan bow en baka na ini dri dei?”
21 Ma a tempel di a ben taki fu en ben de en skin.
22 Fu dati ede di a kon na libi baka, den disipel fu en ben memre taki a ben taki a sani disi furu leisi. Dati meki den bribi den sani di skrifi na ini Gado Buku èn di Yesus taki.
23 Di a ben de na Yerusalem na a Paskafesa, furu sma bigin bribi na ini en* di den si den wondru di a du.
24 Ma Yesus no ben e fertrow den sma fu di a ben sabi den alamala.
25 A no ben de fanowdu tu fu sma taigi en sani fu trawan fu di a ben sabi fa sma e denki.
