Ia Pipii Atu i le Faaa‘oa‘oga na Saunia E Iesu
Ia Pipii Atu i le Faaaʻoaʻoga na Saunia E Iesu
“Ua ou avatu le faaaʻoaʻo iā te outou, e pei ona ou faia iā te outou, ia faapea lava e outou ona fai.”—IOANE 13:15.
1. Aiseā ua avea ai Iesu o se faaaʻoaʻo mo Kerisiano e mulimuli ai?
I LE talafaasolopito atoa o tagata, e na o le toʻatasi lava na soifua mai e aunoa ma se agasala. Ua na o Iesu. E ese mai iā Iesu, “e leai se tagata e lē agasala.” (1 Tupu 8:46; Roma 3:23) O le māfuaaga lea ua manatu ai Kerisiano moni iā Iesu o se faaaʻoaʻoga lelei atoatoa e ao ona mulimuli ai. A o lumanaʻi lona maliu iā Nisani 14, 33 T.A., na fetalai atu Iesu i ona soo ina ia faaaʻoaʻo iā te ia: “Ua ou avatu le faaaʻoaʻo iā te outou, e pei ona ou faia iā te outou, ia faapea lava e outou ona fai.” (Ioane 13:15) I lenā pō mulimuli, na taʻua ai e Iesu ni auala e ao i Kerisiano ona taumafai ai ia pei o ia. O le a tatou iloiloina nisi o na auala i lenei mataupu.
E Manaʻomia le Lotomaulalo
2, 3. E faapefea ona avea le faamaulalo o Iesu ma faaaʻoaʻoga sili ona lelei?
2 Ina ua faalaeiauina e Iesu ona soo e mulimuli i lana faaaʻoaʻoga, na ia fetalai faapitoa lava i le lotomaulalo. E sili atu i le faatasi, na ia fautuaina ai ona soo ina ia lotomaulalo, ma i le pō o Nisani 14, na ia faaalia ai lona faamaulalo e ala i le mulumuluina o vae o ona aposetolo. Ona fetalai lea o Iesu: “Afai o aʻu le Alii, ma le aʻoaʻo, ua ou mulumuluina o outou vae, e tatau ona outou femulumuluaʻi o outou vae.” (Ioane 13:14) Ona sosoo lea ma lona fetalai i ona aposetolo ina ia mulimuli i le faaaʻoaʻoga na ia faataatia. Maʻeu se faaaʻoaʻoga lelei o le faamaulalo!
3 Na taʻua e Paulo, a o leʻi afio mai Iesu i le lalolagi, “sa uiga faatasi ma le Atua.” Ae, na faamaulalo e ia iā te ia lava ma avea ma se tagata. E lē gata i lea, “ua faamaulalo o ia e ia lava, ua na anaana ua oo ina maliu, o le maliu lava lea i le satauro.” (Filipi 2:6-8) Seʻi manatu i ai. O Iesu, o lē e tulaga lona lua i le aoao o mea, na finagalo malie e faamaulalo o ia i agelu, ia fanau mai o se pepe, ia soifua aʻe ma gauaʻi i ni mātua lē lelei atoatoa ma maliu e pei o se tagata solitulafono. (Kolose 1:15, 16; Eperu 2:6, 7) E matuā mataʻina lona faamaulalo! Pe e lē talafeagai ea ona faaaʻoaʻo i lenā “manatu” ma atiina aʻe le “loto maulalo”? (Filipi 2:3-5) Ioe, peitaʻi e lē faigofie.
4. O ā mea ua faamaualuluga ai tagata, peitaʻi aiseā e mataʻutia ai le faamaualuga?
4 O le tuufaafeagai o le lotomaulalo o le faamaualuga. (Faataoto 6:16-19) O le faamaualuga lea na oo ai ina paʻū Satani. (1 Timoteo 3:6) E faigofie lava ona mauaa i loto o tagata, ma faigatā ona toe aveesea. E faamaualuluga tagata ona o o latou atunuu, ituaiga, meafaitino, tulaga tau aʻoaʻoga, mea o le olaga nei ua mafai ona latou faia, tulaga aloaʻia, foliga vaaia, tomai i mea tau taaloga ma le tele o isi mea. Peitaʻi, e aunoa ma se tasi o na mea e tāua iā Ieova. (1 Korinito 4:7) Pe afai tatou te faamaualuluga ona o mea na, e faaleagaina ai la tatou faiā ma Ieova. “O loo maualuga Ieova, a e silasila mai o ia i lē ua faamaulalo; a o lē ua faamaualuga, e silafia mamao mai e ia.”—Salamo 138:6; Faataoto 8:13.
Lotomaulalo i le Va ma o Tatou Uso
5. Aiseā e tāua ai i toeaina ona lotomaulalo?
5 E lē tatau ona tatou faamaualuluga i o tatou faaeaga po o mea ua mafai ona tatou faia i le auaunaga iā Ieova, po o le auala tatou te lagolagosua ai i meafai a le faapotopotoga. (1 Nofoaiga a Tupu 29:14; 1 Timoteo 6:17, 18) O le mea moni, o le mamafa o o tatou tiute tauave o le atili manaʻomia foʻi lenā o le lotomaulalo. Na fautuaina e Paulo toeaina ina ia aua neʻi “faapei o ē pule faasauā i ē ua tofia i ai outou, a ia fai outou ma faaaʻoaʻo i le lafu mamoe.” (1 Peteru 5:3) Na tofia toeaina ina ia avea ma auauna ma faaaʻoaʻoga, ae lē o le fia pule.—Luka 22:24-26; 2 Korinito 1:24.
6. O ā vala o le soifuaga faa-Kerisiano tatou te manaʻomia ai le lotomaulalo?
6 E lē na o toeaina e ao ona lotomaulalo. Na tusi Peteru i tane talavou o ē e ono femitai i le vave o o latou mafaufau ma tino malolosi pe a faatusatusa atu iā i latou e matutua: “Ia oofu outou uma lava i le loto maulalo o le tasi i le tasi; auā, E tetee atu le Atua i ē faamaualuluga, a e foaʻiina mai le alofa tunoa i ē faamaulalo.” (1 Peteru 5:5) Ioe, o le lotomaulalo e pei o Keriso e tāua mo i tatou uma. E manaʻomia le lotomaulalo e talaʻi ai le tala lelei aemaise lava pe a lē ano mai po o le lē fiafia foʻi o tagata. E ao foʻi ona tatou lotomaulalo e talia ai fautuaga po o le faafaigofie o o tatou olaga ina ia faateleina se sao i le faiva. E lē gata i lea, tatou te manaʻomia le lotomaulalo aemaise le loto tele ma le faatuatua e onosaia ai faasalalauga sesē, faafitauli taufaamasinoga, po o sauāga ogoogo.—1 Peteru 5:6.
7, 8. O ā nisi o auala e mafai ona tatou atiina aʻe ai le lotomaulalo?
7 E faapefea e se tasi ona foʻia le faamaualuga ae ‘manatu ma le loto maulalo, ua sili nisi’ na i lo ia? (Filipi 2:3) E manaʻomia ona ia manatu iā te ia e pei o le silasila a Ieova. Na faamatala e Iesu le uiga saʻo ina ua ia fetalai: “E faapea foʻi outou, pe a uma ona fai o mea uma na poloaʻiina atu iā te outou, tou te fai ane, O auauna lē aogā i matou nei; auā o mea e tatau ona matou fai, o mea ia ua matou faia.” (Luka 17:10) Ia manatua e lē mafai ona faatusatusa atu mea ua tatou faia i mea na faia e Iesu. Ioe, sa faamaulalo Iesu.
8 E lē gata i lea, e mafai ona tatou ole atu mo le fesoasoani a Ieova ina ia atiina aʻe le vaaiga saʻo iā i tatou lava. E mafai ona tatou tatalo e pei o le faisalamo: “Ia e aʻoaʻo mai iā te aʻu i le faautauta lelei ma le poto; auā ua ou faamaoni i au poloaʻiga.” (Salamo 119:66) O le a fesoasoani Ieova iā i tatou e atiina aʻe se manatu lelei ma saʻo iā i tatou lava, ma o le a ia tauia i tatou ona o le lotomaulalo. (Faataoto 18:12) Na fetalai Iesu: “O sē faamaualuga o ia iā te ia, e faamaulaloina lea; a o sē faamaulalo o ia iā te ia, e faamaualugaina lea.”—Mataio 23:12.
Se Vaaiga Talafeagai i le Saʻo ma le Sesē
9. Na faapefea ona silasila Iesu i le saʻo ma le sesē?
9 E ui lava na soifua mo le 33 tausaga faatasi ma tagata lē lelei atoatoa, ae sa “leai se agasala” a Iesu. (Eperu 4:15) Ina ua vavalo e faatatau i le Mesia, na faapea mai le faisalamo: “Ua e finagalo i le amiotonu, ma e ʻinoʻino i le amio leaga.” (Salamo 45:7; Eperu 1:9) I lenei foʻi vala, e ao i Kerisiano ona tauivi e faaaʻoaʻo iā Iesu. E lē gata ua latou iloa le saʻo mai le sesē, ae ua latou ʻinoʻino i le leaga ae loto atu i le lelei. (Amosa 5:15) Ua fesoasoani lenei iā i latou e tau faasaga i manatu leaga na fananau mai ma i latou.—Kenese 8:21; Roma 7:21-25.
10. O le ā le uiga ua tatou faaalia pe afai tatou te faia ma le lē salamō “mea leaga”?
10 Na fetalai Iesu i le Faresaio o Nikotemo: “Auā o i latou uma o ē fai mea leaga e ʻinoʻino i latou i le malamalama, e lē ō mai foʻi i le malamalama, neʻi faailoa a latou amio. A o lē ua faamaoni ana mea e fai, e sau lava o ia i le malamalama, ia faaalia ana amio ina ua tatau i le Atua.” (Ioane 3:20, 21) Ia mātau: Na faailoa mai e Ioane Iesu o le “malamalama moni lea, na te faamalamalamaina tagata uma lava.” (Ioane 1:9, 10) Peitaʻi, na fetalai Iesu pe afai tatou te faia “mea leaga”—o mea e sesē, e lē taliaina e le Atua—ua tatou ʻinoʻino i le malamalama. Pe e mafai ona e ʻinoʻino iā Iesu ma lē amanaʻiaina ana tapulaa? Ae, o le tulaga lenā o i latou e faia agasala ma le lē salamō. Atonu latou te lē o manatu faapena, ae ua mautinoa o le silafaga lenā a Iesu.
Atiina Aʻe le Finagalo o Iesu i le Saʻo ma le Sesē
11. O le ā e manaʻomia ina ia tatou atiina aʻe le finagalo o Iesu i le mea saʻo ma le mea sesē?
11 E tatou te manaʻomia se malamalamaaga manino i le mea saʻo ma le mea sesē e tusa ai ma le silafaga a Ieova. E tatou te maua lenā malamalamaaga mai le suʻesuʻeina o le Tusi Paia. A o tatou faia suʻesuʻega, e manaʻomia ona tatou tatalo e pei o le faisalamo: “Ieova e, ia e faailoa mai iā te aʻu ou ala; ia e aʻoaʻo mai iā te aʻu i ou magāala.” (Salamo 25:4) Ae peitaʻi ia manatua, e taufaaʻoleʻole Satani. (2 Korinito 11:14) E mafai ona ia faia le mea sesē e faafoliga mai e saʻo i se Kerisiano e lē o mataala. O lea la, e tatau ai ona manatunatu loloto i mea ua aʻoaʻoina ma ia utagia fautuaga a le “auauna faamaoni ma le mafaufau.” (Mataio 24:45-47) O le suʻesuʻe, tatalo ma le manatunatu loloto i mea ua tatou aʻoaʻoina o le a fesoasoani iā i tatou e avea ai ma ē taʻumatuaina ma auaufaatasi ma i latou “ua masani ona lagona ina ua aʻoaʻosooina e iloa ai le lelei ma le leaga.” (Eperu 5:14) O le a tatou ʻinoʻino ai i mea leaga ae fiafia i mea lelei.
12. O le ā le fautuaga a le Tusi Paia e fesoasoani iā i tatou ia lē faia mea sesē?
12 Pe afai tatou te ʻinoʻino i le mea sesē, o le a tatou lē ati aʻe se faanaunauga mo mea sesē i o tatou loto. Na tusi Ioane ina ua mavae le tele o tausaga talu ona maliu Iesu: “Aua tou te mananaʻo i le lalolagi, po o mea o i ai i le lalolagi. Pe afai e manaʻo se tasi i le lalolagi, e lē o iā te ia le alofa i le Tamā. Auā o mea uma lava o i le lalolagi, o le tuʻinanau o le tino, ma le tuʻinanau o mata, ma le faalialia o lenei olaga, e lē mai le Tamā ia, a e mai le lalolagi.”—1 Ioane 2:15, 16.
13, 14. (a) Aiseā e mataʻutia ai mo se Kerisiano le manaʻo i mea o le lalolagi? (e) E mafai faapefea ona tatou ʻalofia le iai o se manaʻo i mea o le lalolagi?
13 E ono manatu nisi e lē leaga mea uma lava i le lalolagi. E ui lava e saʻo, ae e mafai e le lalolagi ma ana faatosinaga ona tosina ese ai i tatou mai le auauna atu iā Ieova. E leai se mea o ofo mai e le lalolagi e mafai ona tatou vavalalata atu ai i le Atua. Peitaʻi, pe afai tatou te mananaʻo i mea i le lalolagi, e ui lava e lē o ni mea sesē ae ua tatou iai lava i se ala e lamatia ai. (1 Timoteo 6:9, 10) E lē gata i lea, ua tele mea leaga i le lalolagi ma e mafai ona faaleagaina ai i tatou. Pe afai tatou te matamata i polokalame o le televise o loo faamatilatila mai ai faiga sauā, matapeapea po o feusuaʻiga lē mamā, e oo ina manatu i ai e lē leaga na mea, ma oo ina faaosoosoina ai. Afai tatou te miomiō ma tagata o lo latou faanaunauga autū o le faaleleia o latou olaga po o le atiina aʻe o pisinisi, e mafai foʻi ona avea na mea ma mea tāua iā i tatou.—Mataio 6:24; 1 Korinito 15:33.
14 I le isi itu, pe afai tatou te naunau i le Afioga a Ieova, o le a tatou lē tosina atu ai i le “tuʻinanau o le tino, ma le tuʻinanau o mata, ma le faalialia o lenei olaga.” E lē gata i lea, pe afai tatou te auaumea ma i latou e faamuamua manaʻoga o le Malo o le Atua, o le a pei ai i tatou o i latou—tatou te naunau ai i mea latou te naunau i ai ma ʻalofia mea latou te ʻalofia.—Salamo 15:4; Faataoto 13:20.
15. I le pei o Iesu, e faapefea ona faamalosia i tatou e le naunau i le amiotonu ma ʻinoʻino i le amio leaga?
15 O le ʻinoʻino i le amio leaga ma naunau i le amiotonu na fesoasoani iā Iesu e taulaʻi atu ai i “le olioli sa tuu i ona luma.” (Eperu 12:2) E mafai foʻi ona faapena i tatou. Ua tatou iloa o le a “mavae atu foʻi le lalolagi, atoa ma lona tuʻinanau.” So o se faamalieina lava e maua mai le lalolagi, e lē tumau. Ae peitaʻi, o “lē fai le finagalo o le Atua, e tumau lea e faavavau.” (1 Ioane 2:17) Talu ai sa faia e Iesu le finagalo o le Atua, na ia tatalaina ai le ala mo tagata e maua ai le ola e faavavau. (1 Ioane 5:13) Seʻi o tatou faaaʻoaʻo uma lava iā te ia ma maua aogā mai i lona faamaoni.
Onosaia Sauāga
16. Aiseā na faalaeiau ai e Iesu ona soo ina ia fealofani?
16 Na faaalia e Iesu se isi auala e ono faaaʻoaʻo ai ona soo iā te ia: “O laʻu poloaʻiga lenei, ia outou fealofani, pei ona ou alofa atu iā te outou.” (Ioane 15:12, 13, 17) E tele māfuaaga e ao ai ona alolofa Kerisiano i o latou uso. Ae, i lenei tulaga, na taulaʻi atu fetalaiga a Iesu, i lo latou fesagaʻi ma le ʻinoʻino mai o le lalolagi. Na ia fetalai: “Afai e ʻinoʻino mai le lalolagi iā te outou, ua outou iloa ua muamua ona ʻinoʻino mai iā te aʻu. . . . E lē sili le auauna i lona alii. Afai ua latou faasauā mai iā te aʻu, e faasauā foʻi iā te outou.” (Ioane 15:18, 20) Ioe, ua pei Kerisiano o Iesu e sauāina. E manaʻomia ona latou atiina aʻe se fusi malosi o le alofa e fesoasoani e onosaia ai lenā tulaga inosia.
17. Aiseā e ʻinoʻino ai le lalolagi i Kerisiano moni?
17 Aiseā o le a ʻinoʻino ai le lalolagi i Kerisiano? Talu ai, i le pei o Iesu, “e lē ni o le lalolagi” i latou. (Ioane 17:14, 16) E solitū i latou i mea tau vaegaau ma faapolotiki, latou te usiusitai i mataupu silisili a le Tusi Paia, ma faatāuaina le paia o le ola faapea foʻi le tausisia o tapulaa maualuluga tau amio. (Galuega 15:28, 29; 1 Korinito 6:9-11) O lo latou sini autū o mea faaleagaga ae lē o meafaitino. O loo latou ola i le lalolagi, ae e pei ona tusi Paulo, e “peiseaʻī ua lē fetagofi i ai.” (1 Korinito 7:31) E moni, na faaalia e nisi lo latou fiafia i tapulaa maualuluga a Molimau a Ieova. Ae peitaʻi, e lē suia e Molimau a Ieova mea latou te talitonu i ai ina ia taliaina ai i latou e isi. O le iʻuga, o le toʻatele i le lalolagi e lē malamalama iā i latou, ma e ʻinoʻino iā i latou.
18, 19. I le mulimuli i le faaaʻoaʻoga a Iesu, e faapefea ona feagai Kerisiano ma teteega ma sauāga?
18 Na iloa e aposetolo o Iesu le matuā ʻinoʻino o le lalolagi ina ua puʻea Iesu ma sauāina, ma na latou vāai i le auala na feagai ai Iesu ma na mea. I le faatoʻaga i Ketesemane, na ō mai ai tagata lotu tetee iā Iesu e puʻe o ia. Na taumafai Peteru e puipuia o ia i se pelu, peitaʻi na fetalai atu Iesu: “Inā toe sulu ia o lau pelu i lona faamoega; auā o i latou uma o ē tago i le pelu, e oti i latou i le pelu.” (Mataio 26:52; Luka 22:50, 51) I taimi muamua atu, na tau Isaraelu i le pelu faasaga i o latou fili. Ae ua ese tulaga o mea i le taimi lea. O le Malo o le Atua e “lē mai le lalolagi nei” ma e leai ni tuaoi faaleatunuu e ao ona puipuia. (Ioane 18:36) E lē o toe umi ona avea lea o Peteru ma se tasi o le nuu faaleagaga, ma e fai le lagi ma tofi o ona sui. (Kalatia 6:16; Filipi 3:20, 21) O lea la, mai i lenā taimi seʻia faasolo mai ai, o le a taulimaina ai e soo o Iesu le ʻinoʻino ma sauāga e pei ona sa ia faia—e lē fefe peitaʻi e fifilemu. Latou te tuu atu ma le mautinoa iʻuga o mea i aao o Ieova ma faalagolago iā te ia mo le malosi e tumau ai.—Luka 22:42.
19 Na tusi Peteru i tausaga mulimuli ane: “Na tigāina Keriso lava mo outou, ua tuuina mai ai e ia le faaaʻoaʻo mo outou, ina ia outou mulimuli atu i ona tulagāaao. . . . O lē sa agateleina, a e leʻi toe agatele atu, na faatigāina o ia, a e leʻi faamataʻu atu, a ua tuuina atu o ia e ia i lē na te faamasino tonu.” (1 Peteru 2:21-23) E tusa ai ma le lapataʻiga a Iesu, o le a oo i Kerisiano sauāga ogoogo i le faagasologa o taimi. E pei lava o le uluaʻi senituri ma aso nei, ua mulimuli Kerisiano i le faaaʻoaʻoga a Iesu ma atiina aʻe ni talaaga matagofie o le tumau ma le faamaoni, e faaalia ai lo latou tausia o le filemu. (Faaaliga 2:9, 10) Seʻi o tatou faia uma faapea pe a tatou fesagaʻi ma na tulaga.—2 Timoteo 3:12.
“Ia Outou Oofu i le Alii o Iesu Keriso”
20-22. E faapefea e Kerisiano ona ‘oofu i le Alii o Iesu Keriso’?
20 Na tusi Paulo i le faapotopotoga i Roma: “A ia outou oofu i le Alii o Iesu Keriso; aua foʻi le sauniuni mo le tino, e oo ai ona tuʻinanau.” (Roma 13:14) I se uiga faafaatusa e oofu Kerisiano iā Iesu e pei lava ona ofu i se laʻei. Latou te finafinau e faaaʻoaʻo i ona uiga ma gaoioiga i le tele latou te mafai ona faaatagia atu ai, lo latou Matai e ui o i latou o ni tagata lē lelei atoatoa.—1 Tesalonia 1:6.
21 E mafai ona tatou “oofu i le Alii o Iesu Keriso” pe afai tatou te masani lelei i lona soifuaga ma tauivi e ola e pei ona ia soifua ai. E tatou te faaaʻoaʻo i lona faamaulalo, o lona naunau i le amiotonu, lona ʻinoʻino i le amio leaga, lona alofa foʻi i ona uso, e lē so o le lalolagi o ia, ma lona tumau ma le onosai i mafatiaga. Tatou te lē “sauniuni mo le tino,” o lona uiga, e lē tatau ona avea ma fuafuaga autū i le olaga le mauaina o sini faalelalolagi po o le faamalieina o tuʻinanauga faaletino. Na i lo lea, pe afai e faia se filifiliga po o le taulimaina o se faafitauli, tatou te fesili: ‘O le ā o le a faia e Iesu i lenei tulaga? O le ā e finagalo ai o ia iā te aʻu e fai?’
22 O le manatu mulimuli, tatou te faaaʻoaʻo iā Iesu e ala i le maelega i le ‘talaʻia atu o le tala lelei o le malo.’ (Mataio 4:23; 1 Korinito 15:58) I lenā foʻi auala, ua mulimuli ai Kerisiano i le faaaʻoaʻoga na saunia e Iesu, ma o le a talanoaina i le mataupu o sosoo mai le auala latou te mulimuli ai.
Pe e Mafai Ona E Faamatala?
• Aiseā e tāua ai i se Kerisiano ona lotomaulalo?
• E faapefea ona tatou atiina aʻe se vaaiga talafeagai i le saʻo ma le sesē?
• O le ā le auala ua faaaʻoaʻo ai Kerisiano iā Iesu i le feagai o teteega ma sauāga?
• E faapefea ona “oofu i le Alii o Iesu Keriso”?
[Fesili mo le Suʻesuʻega]
[Ata i le itulau 7]
Na faataatia e Iesu le faaaʻoaʻoga sili o le lotomaulalo
[Ata i le itulau 8]
E manaʻomia le lotomaulalo i vala uma o le olaga o se Kerisiano e aofia ai le talaʻiga
[Ata i le itulau 9]
E mafai e Satani ona faia ni faafiafiaga lē talafeagai e faafoliga mai e lelei mo se Kerisiano
[Ata i le itulau 10]
O le alofa o o tatou uso o le a faamalosia ai i tatou faasaga i teteega