O le Tusi i le Faapotopotoga i Filipi 3:1-21
3 Oʻu uso e, o le toe upu lenei, ia faaauau ona outou olioli i le Alii.+ E lē faigatā iā te aʻu ona tusi atu iā te outou i ia lava mea, ma e mo lo outou saogalemu.
2 Ia faaeteete i taʻifau; ia faaeteete i tagata e faia mea e tigā ai; ia faaeteete foʻi iā i latou o ē e peritomeina le tino.+
3 Auā o i tatou o ē ua peritomeina moni,+ o loo faia le auaunaga paia e ala i le agaga o le Atua, ma ua tatou mitamita ai iā Keriso Iesu,+ e tatou te lē o faatuatuaina foʻi lo tatou tulaga faaletino,
4 ae afai e iai se tasi e iai ni māfuaaga e faatuatuaina ai lona tulaga faaletino, o aʻu lea.
Afai foʻi e iai se tagata e manatu e iai ni māfuaaga e faatuatuaina ai lona tulaga faaletino, e sili lava aʻu:
5 na peritomeina aʻu i le aso lona valu,+ e tupuga mai i le nuu o Isaraelu i le ituaiga o Peniamina, o le Eperu na fanau mai i mātua Eperu;+ o le Faresaio foʻi e tusa ma le tulafono;+
6 ona o le maelega, na ou sauā ai i le faapotopotoga;+ e tusa ma le amiotonu e ala i le tulafono, e leʻi taʻuleagaina ai aʻu.
7 Ae o mea tāua uma na ou maua, ua ou manatu e lē aogā* ona o Keriso.+
8 O lenei foʻi, e moni lava, ua ou lotomalie e lafoaʻi ia mea uma ona o le silisili ese o le poto o Keriso Iesu loʻu Alii. O ia foʻi, ua ou lafoaʻia ai nei mea uma ma ua ou manatu o otaota ia mea, ina ia ou maua Keriso
9 ma ia autasi ma ia, e lē ona o saʻu lava amiotonu mai i le mulimuli i le Tulafono, ae ona o le amiotonu e ala i le faatuatua+ iā Keriso,+ o le amiotonu lea mai i le Atua ona o le faatuatua.+
10 O loʻu sini ia iloa o ia ma le mana o lona toetū mai,+ ma ia tofusia faatasi i ona tigā,+ ma ou lolo atu ai i le oti e pei o lona maliu,+
11 ina ia iloa ai pe e mafai lava ona ou maua le uluaʻi toetū mai i le oti.+
12 E lē faapea ua ou maua le taui po ua ou lelei atoatoa foʻi, ae o loo oʻu tausinio+ ina ia iloa pe e mafai ona ou mauaina le mea na filifilia ai* foʻi aʻu e Keriso Iesu.+
13 Uso e, ou te lē o manatu iā te aʻu faapea ua ou maua le taui; ae e tasi le mea ou te faia: O le faagalo lea o mea ua tuanaʻi,+ ae tepa taulaʻi atu i mea o i le lumanaʻi,+
14 ua ou tausinio i le sini, o le taui lea+ o le valaau faalelagi+ mai i le Atua, e ala iā Keriso Iesu.
15 O lea, o le toʻatele o i tatou ua avea ma tagata matutua,+ seʻi faapena foʻi ona tatou manatunatu, ma afai foʻi e ese so outou manatu i se isi mea, e faaalia lava e le Atua le manatu saʻo iā te outou.
16 O lea la, po o le ā lava le tele o lo tatou agaʻigaʻi i luma, ae seʻi o tatou faaauau ona savavali ma le maopoopo e tusa ma lea lava ala.
17 Le ʻauuso e, ia outou autasi e faaaʻoaʻo mai iā te aʻu,+ ma ia outou vaavaai iā i latou o savavali e ōgatusa ma le faaaʻoaʻoga na matou faia mo outou.
18 Sa masani ona ou taʻua le toʻatele o tagata, a o lenei ua ou taʻua i latou ma le tagi, auā o loo latou savavali o ni fili o le laau na faapuapuagatia ai* le Keriso.
19 O lo latou iʻuga o le faaumatiaga lea, o lo latou atua o le manava lea, o lo latou mamalu o le mea e māsiasi ai, e mafaufau foʻi i latou i mea o i lenei lalolagi.+
20 A o i tatou o tagatānuu+ o le lagi,+ ma e tatou te faatalitali ma le naunau mo se faaola mai i inā, o le Alii o Iesu Keriso,+
21 o lē na te toe suia o tatou tino faatauvaa ina ia pei o lona tino mamalu+ e ala i lona mana tele, lea e mafai ai ona ia faatoʻilaloina o mea uma lava iā te ia.+
Faamatalaga Pito i Lalo
^ Pe atonu “ua ou lotomalie e lafoa‘i.”
^ Ele., “le mea na maua ai.”
^ Tagaʻi i le Uiga o Upu.
