O le Tusi i le Faapotopotoga i Kolose 1:1-29
1 O aʻu o Paulo, o le aposetolo a Keriso Iesu e ala i le finagalo o le Atua, ma Timoteo+ lo tatou uso,
2 o le tusi lenei i le ʻaupaia, o uso faamaoni o ē ua autasi ma Keriso i Kolose:
Tau ina ia iā te outou le agalelei faifua ma le filemu mai i le Atua lo tatou Tamā.
3 E matou te faafetai e lē aunoa i le Atua le Tamā o lo tatou Alii o Iesu Keriso, pe a matou tatalo mo outou,
4 talu ai na matou faalogo i lo outou faatuatua iā Keriso Iesu, ma lo outou alofa i le ʻaupaia uma
5 ona o le faamoemoe ua teuina mo outou i le lagi.+ Na outou faalogo muamua i lenei faamoemoe, e ala i le feʻau o le upu moni o le tala lelei
6 lea ua oo mai iā te outou. E pei ona fua mai le tala lelei ma faateleina i le lalolagi uma,+ ua faapena foʻi ona tupu iā te outou talu mai le aso na outou faalogo ai, ma iloa lelei ai le mea moni i le agalelei faifua o le Atua.
7 O le mea lenā na outou iloa mai i lo tatou uso a pologa, o lē e pele, o Epafara,+ o se auauna faamaoni a Keriso mo i matou.
8 Na ia faailoa mai foʻi iā i matou lo outou alofa i le itu faaleagaga.*
9 O le mea foʻi lea matou te leʻi mapu ai e tatalo mo outou,+ talu le aso na matou faalogo ai i na mea, ma talosaga atu ina ia faatumuina outou i le poto saʻo+ i lona finagalo i le atamai uma ma le malamalama faaleagaga,+
10 ina ia savavali ai e tusa ma le finagalo o Ieova,* ma iʻu ina matuā faafiafiaina ai o ia a o faaauau ona outou fua mai fua o galuega lelei uma, ma ia tupu pea lo outou poto saʻo i le Atua;+
11 tau ina ia faamalosia foʻi outou i le malosi uma e tusa ma lona mana tele,+ ina ia mafai ai ona outou tutumau atoatoa ma le onosaʻi atoa ma le olioli,
12 a o outou faafetai i le Tamā o lē ua māfua ai ona outou agavaa ina ia maua le tofi o le ʻaupaia+ o loo i le malamalama.
13 Na ia laveaʻi i tatou mai i le pule a le pōuliuli,+ ma avatu i tatou i le malo o lona Alo pele,
14 o ia foʻi ua faasaʻolotoina ai i tatou e ala i le togiola, o le faamagaloina lea o a tatou agasala.+
15 O ia ua foliga i le Atua e lē vaaia,+ o le ulumatua o foafoaga uma;+
16 auā na foafoaina isi mea uma i le lagi ma le lalolagi e ala iā te ia, o mea e vaaia ma mea e lē vaaia,+ e tusa lava po o nofoālii, po o alii sili, po o malo, po o pule. Na foafoaina isi mea uma e ala iā te ia+ ma na foafoaina foʻi mo ia.
17 O ia foʻi na muamua i isi mea uma lava,+ ma ua iai isi mea uma lava ona o ia,
18 o ia o le ulu o le tino, o le faapotopotoga lea.+ O ia o le amataga, o le ulumatua o ē ua toetutū mai i le oti,+ ina ia avea ai o ia ma lē e muamua i mea uma lava;
19 auā na finagalo le Atua e faaatoatoa mea uma iā te ia,+
20 ma e ala iā te ia, ua faaleleia ai e le Atua o isi mea uma lava iā te Ia,+ ina ia lelei ai e ala i le toto+ na faamaligiina i luga o le laau na faapuapuagatia ai,* e tusa po o mea o i le lalolagi po o mea o i le lagi.
21 O outou foʻi o ē na vavaeese muamua, ma avea outou ma fili talu ai sa outou mafaufau i galuega leaga,
22 a o lenei ua ia toe faaleleia e ala i le tino faaletino o lea tagata ina ua maliu o ia, ina ia tuuina atu outou i ona luma e paia, e lē taʻuleagaina, ma e lē tuuaʻia i se mea,+
23 pe afai e faaauau ona outou faatuatua,+ ma faatumauina outou i luga o le faavae,+ ma ia mausalī,+ ia aua neʻi taaʻina ese mai i le faamoemoe o loo i le tala lelei lea na outou faalogo i ai, lea foʻi na talaʻiina atu i foafoaga uma i lalo o le lagi.+ O le tala lelei lea ua ou auauna i ai, o aʻu o Paulo.+
24 O le mea lea ua ou olioli ai nei i oʻu puapuaga ona o outou,+ ma o loo oʻu tofo i puapuaga o le Keriso e leʻi faapea ona oo i loʻu nei tino e fai ma sui o lona tino,+ o le faapotopotoga lea.+
25 Ua avea aʻu ma auauna i lenei faapotopotoga, e tusa ma le tiute tauave+ lea na tuuina mai iā te aʻu e le Atua mo outou, ina ia matuā talaʻi le afioga a le Atua,
26 o le mea lilo paia+ lea na natia mai i faiga o mea a le lalolagi*+ ma augātupulaga ua mavae. A o lenei ua faailoa mai i lana ʻaupaia,+
27 o ē ua finagalo malie le Atua e faailoa atu ai i atunuu uma le oloa mamalu o lenei mea lilo paia,+ o Keriso lea ua autasi ma outou, ma le faamoemoe e tofusia i lona mamalu.+
28 O ia lea o loo tatou talaʻia, ma apoapoaʻi ma aʻoaʻo atu i tagata uma i le atamai uma, ina ia tatou tuuina atu tagata taʻitoʻatasi o ni soo o Keriso ua matutua faaleagaga.+
29 O le mea lea ou te matuā galue mamafa ai ma finafinau, e ala i lona mana lea o loo matuā galue i totonu iā te aʻu.+
Faamatalaga Pito i Lalo
^ Ele., “i la le agaga.”
^ Tagaʻi i le Uiga o Upu.
^ Tagaʻi i le Uiga o Upu.
