O le Tusi Muamua iā Timoteo 6:1-21
6 O i latou o ē o avea ma pologa,* ia latou manatu pea e tatau ona āva atoatoa i o latou matai,+ ina ia aua lava neʻi upuleagaina le suafa o le Atua ma le aʻoaʻoga.+
2 O ē e iai o latou matai e talitonu, aua le lē faaaloalo iā i latou ona o i latou o uso. Ae ia atili ona latou auauna ma le lotomalie, auā o i latou e maua aogā mai i la latou auaunaga lelei, o ni tagata talitonu ma e alofagia.
Ia faaauau ona aʻoaʻo atu nei mea ma tuuina atu nei apoapoaʻiga.
3 Afai e aʻoaʻo atu e se tagata se aʻoaʻoga ese, ma e lē ioe i faatonuga aogā*+ mai i lo tatou Alii o Iesu Keriso, po o aʻoaʻoga e tusa ai ma le faamaoni i le Atua,+
4 ua faafefeteina la o ia i le faamaualuga ma e lē malamalama i se mea.+ Ua matuā maumaututū* o ia i felafolafoaʻiga ma finauga i upu.+ O mea nei e tupu ai le matauʻa, le femisaaʻi, le taufaaleaga,* o masalosaloga leaga,
5 o nai mea iti ua finau ai pea tane e lē mamā o latou mafaufau,+ ma ua lē o toe malamalama i le upu moni, auā ua latou manatu e maua ai a latou mea ona o le faamaoni i le Atua.+
6 E moni, e tele mea e maua mai i le faamaoni i le Atua+ ma le lotomalie.
7 Auā e tatou te leʻi aumaia lava se mea i le lalolagi, ma e lē mafai foʻi ona tatou aveese ai o se mea.+
8 O lea, afai ua iai ni a tatou meaʻai* ma ofu e oofu ai,* ia tatou lotomalilie i nei mea.+
9 A o i latou o ē fia mauʻoa, e paʻuʻū i latou i le faaosoosoga ma le mailei,+ ma le tele o tuʻinanauga valea ma le tigā, ia e oo atu ai tagata i le faaumatiaga ma fano ai.+
10 Auā o le manaʻo tele i tupe o le pogai lea o mea leaga eseese uma, ma o le manaʻo tele i ai, ua ō ese ai nisi mai i le faatuatua, ma tuia ai i latou e i latou lava i le tele o tigā.+
11 A o oe le tagata o le Atua, ia e sola ese mai i nei mea. Ae ia saʻili le amiotonu, le faamaoni i le Atua, le faatuatua, le alofa, le tumau ma le agamalu.+
12 Ia tau le taua lelei o le faatuatua; ia taofimau i le ola e faavavau lea na valaauina ai oe, ma na e faailoa atu le faalauiloaga lelei i luma o molimau e toʻatele.
13 I le silafaga a le Atua, o lē e faasaoina mea uma lava, ma Keriso Iesu, o ia o se molimau, na ia faia se faalauiloaga lelei i luma o Ponotio Pilato,+ ou te poloaʻi atu iā te oe
14 ina ia e tausi i le poloaʻiga ma le lē ponā, ma le lē taʻuleagaina, seʻia faaali mai lo tatou Alii o Iesu Keriso,+
15 lea e faaali mai e le Pule fiafia e toʻatasi i lona taimi atofaina. O ia o le Tupu o tupu ma le Alii o alii,+
16 e na o ia lava e lē mafai ona oti,*+ o lē e afio i le malamalama e lē mafai ona sao i ai se tasi,+ o lē e leʻi vaaia e se tagata ma e lē mafai lava ona vaai i ai.+ Ia iā te ia le viiga ma le mana e faavavau. Amene.
17 Ia faatonu* i ē e mauʻoa i lenei faiga o mea a le lalolagi* ina ia aua le faasausili,* ma ia lē faamoemoe i ʻoa e lē tumau,+ ae i le Atua o lē e foaʻi maia le tele o mea ina ia tatou fiafia ai.+
18 Ia faatonu i latou ia faia mea lelei, ia tamaoaiga i galuega lelei, ia limafoaʻi,* ia nofosauni e tufa atu mea i isi,+
19 ia teua oloa mo i latou lava o se faavae lelei mo le lumanaʻi,+ ina ia latou taofimau ai i le ola moni.+
20 Timoteo e, ia e leoleoina le mea ua tuuina atu iā te oe,+ ia ʻaloʻalo ese mai i upu lē aogā e faaleaga ai mea paia, ma feteenaʻiga i le mea ua taʻua ma le pepelo o le “poto.”+
21 Ua liliuese nisi mai i le faatuatua ona o le faalialiavale o lenā poto.
Tau ina ia iā te outou le agalelei faifua o le Atua.
Faamatalaga Pito i Lalo
^ Ele., “O i latou o i lalo o le amo o le pologa.”
^ Po o “faatonuga e malosi ai; faatonuga e mālōlōina ai.”
^ Po o le “pupū.”
^ Po o le “o upu masoā.”
^ Po o “ni mea e tausia ai i tatou.”
^ Pe atonu “mea e nonofo ai.” Ele., “mea e ufiufi ai.”
^ Po o le “e lē mafai ona faaumatia.”
^ Po o le “faamaualuluga.”
^ Tagaʻi i le Uiga o Upu.
^ Po o le “poloaʻi.”
^ Po o le “mataalofa.”
