Faataoto 6:1-35
6 Loʻu atalii e, afai ua e faamaonia le aitalafu a lou tuaoi,+Pe afai foʻi ua e lūlū lima* ma le tagata ese,+
2 Afai ua maileia oe i lau folafolaga,Afai foʻi ua maua oe i upu a lou gutu,+
3 Loʻu atalii e, ia e faia lenei gaoioiga, ma faasaoina ai oe,Ona ua maua oe e le lima o lou tuaoi:
Ia e alu ma faamaulalo iā te oe ma ia e matuā ʻaiʻoi atu i lou tuaoi.+
4 Aua neʻi moe ou mata,Pe tautulemoe ou laumata.
5 Ia e faasaoina oe e pei o le manu o le sevi mai i le lima o le tuli manu,Ma e pei o se manulele mai i le lima o lē e puʻe manulele.
6 O oe le tagata paiē,+ inā alu ia i le loi;Ia vaavaai i ona ala ina ia e atamai ai.
7 E ui e leai sona taʻitaʻiʻau, o se leoleo, po o se pule,
8 Ae e na te sauniunia ana meaʻai i le tau māfanafana,+E na te faaputuina foʻi ana meaʻai i le taimi o le seleselega.
9 Le tagata paiē, o le ā le umi o le a e taoto ai pea?
O afea e te tulaʻi ai mai i lau moe?
10 Seʻi toe fai sina moe, seʻi toe fai foʻi sina moeiini,Seʻi toe fai foʻi sina piilima a o taoto,+
11 Ona oo mai ai lea o lou mativa e pei o le tagata faomea,Ma lou lē tagolima e pei o le tagata ua uu ana auupega.+
12 O le tagata lē aogā ma amioleaga, o loo savali o ia ma le gutu faapiʻopiʻo;+
13 Ua faaʻivi lona mata,+ ua minominoi lona vae, ma faasinosino mea i ona tamatamaʻilima.
14 Ua i lona loto le pepelo,Ua ia fafau mea leaga i taimi uma+ ma faatupuina feeseesea‘iga.+
15 O le mea lea e oo faafuaseʻi mai ai lona malaia;E vave lava ona nutimomoia o ia, ae e leai se fofō.+
16 E ono mea e ʻinoʻino i ai Ieova;Ioe, e fitu mea e matuā inosia lava e ia:
17 O mata faamaualuga,+ o le laulaufaiva pepelo,+ ma lima e sasaa le toto o ē e lē sala,+
18 O le loto e fafau faufauga leaga,+ ma vae e vave ona tamoʻe e fai le mea leaga,
19 O le molimau pepelo e na te faia tala pepelo i taimi uma,+Ma so o se tasi e faatupuina fevaevaeaʻiga i le vā o uso.+
20 Loʻu atalii e, ia tausi i le poloaʻiga a lou tamā,Ma aua e te tuulafoaʻiina le faatonuga* a lou tinā.+
21 Ia fusi e lē aunoa ia mea i lou loto;Ia asoa foʻi i lou ua.
22 Pe a e savali, e taʻitaʻiina ai oe;Pe a e taoto, e leoleoina ai oe;Ma pe a e ala aʻe, e tautala mai iā te oe.*
23 Auā o le poloaʻiga o le molī lea,+O le tulafono o le malamalama lea,+Ma o aʻoaʻiga e aʻoaʻoina ai, o le ala lea i le ola.+
24 E leoleoina ai oe mai i le fafine leaga,+Mai i le laulaufaiva taufaasee o le fafine e amio lē mamā.*+
25 Aua le tuʻinanau lou loto i lona lalelei+Pe maileia oe i ona mata faatosina,
26 Auā e iʻu ai ina tasi le falaoa lapotopoto a se tane ona o se fafine talitane,+Ae e tulituliloa e le avā a se isi tane le ola tautele o se tasi.
27 Pe e mafai ea e se tagata ona tuu le afi i lona fatafata ae e lē mū ai ona ofu?+
28 Pe e mafai e se tagata ona savali i malala ola ae e lē mū ai ona vae?
29 E faapena foʻi so o se tasi e feusuaʻi ma le avā a lona tuaoi;E leai se tasi e tago i lea fafine e sao mai i le faasalaga.+
30 E lē inosia e tagata se gaoiPe a ia gaoia ni mea‘ai e faamalieina ai o ia ona ua fia ʻai.
31 Ae a maua o ia, ona ia toe totogi faafitu lea o ia mea;O le a ia avatu oloa uma o lona fale.+
32 O so o se tasi e mulilua ma se fafine, ua leai sona mafaufau;*O lē na te faia lea mea, ua faaumatia e ia lona lava ola.+
33 E na o le faamanu‘alia ma le māsiasi e na te mauaina,+O le a lē soloiesea foʻi lona faalumaina.+
34 Auā o le fuā e matuā ita ai le tane;E na te lē faaalia le alofa mutimutivale pe a ia tauimasui.+
35 E na te lē taliaina se tau e totogi atu;*E lē mafai ona faamalieina o ia, e tusa pe e te avatuina se meaalofa taugatā.
