O le Tusi Muamua i le Faapotopotoga i Korinito 7:1-40
7 E tusa ai ma mea na outou tusi mai ai, e lelei pe a lē tago* se tamāloa i se fafine;
2 peitaʻi ona ua taatele le faia o amioga lē mamā taufeusuaʻiga,* ia taʻitasi le tane ma lana avā,+ ma ia taʻitasi foʻi le fafine ma lana tane.+
3 Ia avatu e le tane i le avā le mea e tatau ai,* ma ia faapena foʻi le avā i lana tane.+
4 E lē pule le avā i lona lava tino, ae e pule ai lana tane; e faapena foʻi ona lē pule le tane i lona lava tino, ae e pule ai lana avā.
5 Aua le faafiti le tasi i le isi i lenei mea, seʻi vaganā ua malilie faatasi i se taimi ua fuafuaina, ina ia mafai ai ona sema se taimi mo tatalo, ona toe faatasi ai lea ina neʻi faaosoosoina outou e Satani ona o le lē puleaina o o outou faalogona.
6 Ae ua ou fai atu lenei mea e fautua atu ai iā te outou, ae e lē o se faatonuga.
7 Ou te loto ia pei tagata uma o aʻu. Peitaʻi, e tofu lava le tagata ma lana meaalofa+ mai i le Atua, e faapena le tasi, ae faapenei le isi.
8 Ou te fai atu i tagata nofofua ma fafine ua oti a latou tane, e sili ona lelei mo i latou ona tumau e pei foʻi o aʻu.+
9 Ae afai e lē mafai ona pulea i latou lava, ia faaipoipo i latou, auā e sili atu ona lelei le faaipoipo nai lo o le mū i le manaʻo.+
10 Ou te fai atu i ē ua faaipoipo, e lē o aʻu a o le Alii, e lē tatau i se avā ona tuua lana tane.+
11 Ae afai e tuua e ia lana tane, ia nofofua pea o ia pe toe faalelei ma lana tane; e lē tatau foʻi i le tane ona tuua lana avā.+
12 A o laʻu upu lenei e fai atu i isi, o aʻu ae e lē o le Alii:+ Afai e iai se uso e iai sana avā e lē talitonu, ma ua lotomalie lana avā e nonofo pea ma ia, aua neʻi tuua e ia lana avā;
13 afai foʻi e iai se fafine e iai sana tane e lē talitonu, ma ua lotomalie lana tane e nonofo pea ma ia, aua neʻi tuua e ia lana tane.
14 Auā ua faapaiaina le tane lē talitonu ona o lana avā, ua faapaiaina foʻi le avā lē talitonu ona o le uso; auā a leai, ua lē mamā a outou fanau, a o lenei ua paia i latou.
15 Ae afai e filifili lē e lē talitonu e alu ese,* ia alu ese pea o ia; e lē saisaitia se uso po o se tuafafine i tulaga faapena, ae ua valaauina outou e le Atua ina ia filemu.+
16 O oe le avā, e te lē iloa ea e mafai ona faaolaina lau tane ona o oe?+ O oe le tane, e te lē iloa ea e mafai ona faaolaina lau avā ona o oe?
17 Ae ia taʻitasi ma savali e pei ona valaauina ai o ia e le Atua, e pei lava ona faasoa atu e Ieova* iā te ia.+ Ua faapea foʻi ona ou avatu lenei faatonuga i faapotopotoga uma.
18 Pe na valaauina ea se tasi ae ua uma ona peritomeina o ia?+ Ia tumau ai o ia i lenā tulaga. Pe na valaauina ea se tasi ae e leʻi peritomeina o ia? Aua neʻi peritomeina o ia.+
19 E lē tāua le peritome, e lē tāua foʻi le lē peritome;+ peitaʻi o le mea e tāua, o le tausia lea o poloaʻiga a le Atua.+
20 Po o le ā lava le tulaga o se tasi ina ua valaauina o ia, ia tumau ai pea.+
21 Pe na valaauina oe a o fai ma pologa? Aua neʻi e popole ai i lenā mea;+ ae afai e mafai ona faasaʻolotoina oe, ia talia lea avanoa.
22 Auā o lē ua valaauina i le Alii a o fai ma pologa, o le tagata saʻoloto o ia a le Alii;+ e faapea foʻi lē ua valaauina a o saʻoloto, o le pologa o ia a Keriso.
23 Na faatauina outou i se tau;+ aua neʻi toe faia outou ma pologa a tagata.
24 Le ʻauuso e, po o le ā lava le tulaga o se tasi ina ua valaauina o ia, ia tumau ai o ia i luma o le Atua.
25 Ou te leʻi maua se poloaʻiga mai i le Alii e faatatau i taupou,* ae ou te faailoa atu loʻu manatu,+ o lē na faaalia i ai le alofa mutimutivale o le Alii, ina ia ou faamaoni.
26 O lea la, o loʻu manatu e sili ona lelei mo se tamāloa ona tumau pea i le tulaga ua iai o ia, ona o le tulaga faigatā ua iai.
27 Po o noanoatia oe i se avā? Aua e te saʻili ina ia tatalaina.+ Po o e saʻoloto mai i se avā? Aua e te saʻili i se avā.
28 Ae e tusa foʻi pe e te faaipoipo, e te lē agasala ai. Afai e faaipoipo se taupou, e lē agasala ai o ia. Peitaʻi, o i latou e faaipoipo, e oo puapuaga i o latou tino. Ae ou te manaʻo ia lē oo na mea iā te outou.
29 Ou te fai atu iā te outou le ʻauuso e, ua itiiti le taimi o totoe.+ E amata atu nei, o i latou o ē ua iai avā, ia peiseaʻī e leai ni a latou avā;
30 o i latou o fetagisi, ia peiseaʻī e lē o fetagisi; o i latou o olioli, ia peiseaʻī e lē o olioli; o i latou foʻi o faatau mai, ia peiseaʻī e leai ni mea;
31 ma o i latou o faaaogā mea a le lalolagi, ia peiseaʻī e lē o faaaogāina atoatoa; auā o loo suia le tulaga o mea* a lenei lalolagi.
32 Ou te manaʻo ina ia aua neʻi outou popole. E popole le alii e leʻi faaipoipo i mea a le Alii, i ni mea e na te faafiafia ai le Alii.
33 A o le tane ua faaipoipo, e popole o ia i mea a le lalolagi,+ i ni mea e na te faafiafia ai lana avā,
34 ma e vaeluaina lona loto. O le tamaʻitaʻi e leʻi faaipoipo, faapea ma le taupou, e popole o ia i mea a le Alii,+ ina ia paia o ia i lona tino ma lona agaga. Peitaʻi, o le fafine ua faaipoipo, e popole o ia i mea a le lalolagi, i ni mea e na te faafiafia ai lana tane.
35 Ou te fai atu nei mea e mo lo outou lava lelei, e lē ina ia saisaitia ai outou,* ae ia uunaʻia ai outou e faia le mea lelei, ma auauna e lē aunoa i le Alii, e leai se mea e faalavelavea ai.
36 Ae afai ua lē mafai e se tagata nofofua ona pulea ona tuʻinanauga, ma pe afai ua teʻa le malaulau o lona talavou, o le mea lenei e ao ona fai: Ia faia e ia le mea e manaʻo i ai; e lē agasala ai o ia. Ia faaipoipo i laʻua.+
37 Ae afai ua filifili i lona loto, ma e lē faigatā iā te ia, ae ua mafai ona ia pulea ona faalogona, ma ua fai lana lava faaiʻuga i lona loto ina ia tumau ona lē faaipoipo,* e manuia ai o ia.+
38 O lea, o lē e faaipoipo* e manuia o ia, a o lē e lē faaipoipo e sili atu lona manuia.+
39 Ua noanoatia le avā i aso uma e ola ai lana tane.+ Ae afai ua oti* lana tane, ona saʻoloto lea o ia e faaipoipo i so o se tasi ua loto i ai, tau lava o lē ua i le Alii.+
40 Ae o loʻu manatu, e sili atu lona fiafia pe a nofofua pea o ia; ua ou manatu foʻi o loo iā te aʻu le agaga o le Atua.
Faamatalaga Pito i Lalo
^ E faasino atu i le faia o feusuaʻiga.
^ O le upu Eleni, o le por·nei′a. Tagaʻi i le Uiga o Upu.
^ E faasino atu i le faamalieina o faalogona taufeusuaʻiga.
^ Po o le “nofo ese.”
^ Po o “ē e leʻi faaipoipo lava.”
^ Ele., “le vaaiga.”
^ Ele., “e lē ina ia lafo atu se matāsele iā te outou.”
^ Po o le “ia tausia pea lona tulaga taupou.”
^ Po o le “o lē e tuuina atu lona tulaga muli pe a faaipoipo.”
^ Ele., “ua moe (i le oti).”
