„E PRALENGO hem e phenjengo šukaripe but utičinđa upro mande“ phenela i Lisa. a Odova hem privucinđa la ko ćaćipe. Diso slično hem i En phenđa: „Ki početka, pobuter privucinđa man odova so o phralja hem o phenja mothovđe šukaripe, nego odova sostar on sikavđe.“ On akana uživinena te čitinen e Devleso Lafi hem te razmislinen odolestar so čitinđe, ama o šukaripe tano odova so prvo privucinđa len ko ćaćipe.

Ama, sar šaj te mothova šukaripe kova šaj te pogodini averen ko vilo? Ka dikha duj načinija: odoleja so vaćeraja hem so ćeraja. Palo odova, ka dikha premalo kaste valjani te ova šukar.

Ko 31. poglavlje ko Poslovice vaćeri pe andi bućarni romni, asi koja phenela pe: „Ki olaki ćhib tano o zakon ando šukaripe“ (Posl. 31:26). Oj mukhela odova zakon te utičini ko odova so vaćeri hem sar vaćeri. O dada valjani te mukhen odova „zakon“ te utičini upro lende đi vaćerena pe ćhavencar. But roditeljija đanena so o gruba lafija šaj te povredinen olenge ćhaven hem so olenge ćhave tegani na ka šunen len ako ađahar vaćerena olencar. Ked o roditeljija vaćerena pe ćhavencar ko jekh šukar način, tegani e ćhavenđe ka ovel polokho te šunen len.

Bilo te ove roditelj ja na, sar ko te lafija šaj te dićhol o šukaripe? O odgovor šaj te arakha ko prvo deo ko Poslovice 31:26, kuri pisini: „Ked vaćeri, vaćeri mudro.“ Odova značini so valjani te pazina ko amare lafija hem ko amaro glaso. Šukar tano te puća amen: „Da li odova so mangava te phenav ka holjanćeri nekas ja ka ćerel te ovel mir?“ (Posl. 15:1). Šukar tano sare amen prvo te ćamćera, a palo odova te vaćera.

Jekh aver poslovica phenela: „Ked na razmislineja so vaćereja, te lafija šaj te posaven sar mač“ (Posl. 12:18). Ked razmislinaja odolestar sar amare lafija hem o ton ando amaro glaso ka utičinen upro avera, odova ka pomožini amen te pazina ko odova so vaćeraja. Ked legari amen o „zakon ando šukaripe“ na ka ova gruba ja neljubazna (Ef. 4:31, 32). Umesto te ova negativna hem neljubazna, amen ka ova pozitivna hem blaga. O Jehova aćhavđa amenđe primer ked utešinđa e proroko, e Ilija, kova but darandilo. O anđeo kole o Jehova bićhalđa vaćerđa „tiho hem blago“ (1. Kralj. 19:12). Ama, o šukaripe na mothovi pe samo ko lafija nego hem ko odova so ćeraja. Sar?

Ked amare lafencar hem odoleja so ćeraja mothovaja šukaripe, amen oponašinaja e Jehova (Ef. 4:32; 5:1, 2). I Lisa phenela sar o phralja olaće hem olake porodicaće mothovđe šukaripe. Oj phenela: „Ked iznenada morandiljam te selina amen, duj bračna parija lelje slobodno dive andi buti te šaj te pomožinen amen.  Ko odova vreme, me čak ni na proučinđum i Biblija.“ Odova podstakninđa e Lisa hari pošukar te penđari o ćaćipe.

Isto ađahar, hem i En phenela sar upro late but utičinđa odova so o phralja mothovđe laće šukaripe. Oj phenela: „Sebepi so but manuša ko sveto tane lošna, hine maje pharo te ovel man poverenje upro bilo kaste. Ked upoznajinđum e Jehovase svedokonen, ni olenđe naštinđum te verujinav. Pućljum man: ’Sose on brininena pe maje?‘ Ama, i phen koja proučinđa mancar hine but šukar premalo mande hem odova podstakninđa man te ovel man poverenje upro lende.“ So hine palo odova? I En phenela: „Počminđum hor te razmislinav ando odova so sikljiljum.“

Šaj te dikha so upri Lisa hem i En but utičinđa odova so o phralja mothovđe šukaripe hem mangipe hem sebepi odova manglje pana pošukar te penđaren o ćaćipe. O šukaripe kova amare phralja hem phenja mothovđe, pomožinđa lenđe te ovel len poverenje upro Jehova hem upro oleso narodo.

Disavenđe sebepi odova sar barilje hem kaj živinđe tano polokho te vaćeren nekasa ljubazno hem asandoj. Odova tano but šukar. Ama, ako amen hijam ljubazna hem šukar premalo avera samo sebepi amari kultura, tegani na ka šaj te oponašina e Jehova. (Uporedin e stihoja ando Dela apostolska 28:2.)

O ćaćutno šukaripe tani osobina koja tani plod ando Devleso sveti duh (Gal. 5:22, 23). Te šaj te barjaćera akija osobina, amen valjani te mukha o sveti duh te utičini ko odova sar razmislinaja hem so ćeraja. Ked ćeraja odova, isi amen pobari želja te ova sar o Isus hem o Jehova. Naravno, sar hrišćanija amen brininaja amen hem e manušenđe. Šaj te phena so i osobina šukaripe, barjaćeraja sose mangaja e Jehova hem e manušen. Asavko šukaripe but ka utičini upro manuša hem ka anel amenđe e Jehovaso blagoslov.

Šaj te ovel amenđe lokho te ova zahvalna hem šukar premalo okola soj tane šukar premalo amende ja premalo okola kolen penđaraja (2. Sam. 2:6; Kol. 3:15). Ama, so ako mislinaja so neko na zaslužini te mothova lese šukaripe?

Razmislin akalestar: O Jehova tano najšukar primer ko odova sar valjani te mothovi pe o bizaslužimo šukaripe. Ov ko po Lafi sikavi amen soj tano važno te mothova akija osobina. O lafija „bizaslužimo šukaripe“ tane koristime ko but thana ko grčko deo ando Devleso Lafi. Sar o Devel mothovi amenđe šukaripe?

Razmislin ando milionija manuša kolenđe o Jehova mothovi šukaripe ađahar so dela len odova so valjani lenđe aso životi (Mat. 5:45). Čak angleder te penđara le, o Jehova već mothovđa amenđe šukaripe (Ef. 2:4, 5, 8). Na primer, ov dinđa pe Ćhave aso sa o manuša. O apostol Pavle phenđa so amen hijam otkupime ando greh sebepi e Devleso bizaslužimo šukaripe (Ef. 1:7). Uzo odova, iako grešinaja hem razočarinaja le, ov hem ponodri legari amen hem sikavi amen. Olese lafija hem oleso sikavibe tane sar „sitno boršim“ (Pon. zak. 32:2). Amen niked našti te irina e Jehovase aso sa o šukaripe kova mothovi amenđe. Đanaja so ked o Jehova na bi mothovi po bizaslužimo šukaripe, amen niked na bi ovela amen nada asi budućnost. (Uporedin e stihoja andi 1. Petrova 1:13).

Sigurno pana pobuter mangaja e Jehova sose mothovđa amenđe šukaripe. Odolese, na mangaja te ova šukar samo premalo disave manuša, nego sar o Jehova mangaja uvek te ova šukar premalo sa o manuša (1. Sol. 5:15). Tegani ka ova sar jag koja taćari amen ked avri tano but šudro. Amari porodica, amare amala, kolege, amala ki škola hem avera ka oven bahtale soj tane amencar.

Razmislin kase šaj ki ti porodica ja ki skupština te pomožine ja te phene dijekh šužo lafi. Šaj li dijekhe phalese ja phenjaće te pomožine diso ko ćher, ki bašta ja te đa te pazarine lenđe? Isto ađahar, ako reseja nekas ki služba kase valjani pomoć, da li šaj te ćere diso te pomožine lese?

Oponašin e Jehova hem mukh ko odova so vaćereja hem ćereja te legari tut „o zakon ando šukaripe.“