Ñawiriqkuna yachayta munanku

¿Imaraykutaq Jehovamanta sutʼinchaqkuna, maqanakuykunaman mana rinkuchu?

Jehovamanta sutʼinchaqkunaqa, unaymantapachaña mayllapipis kawsachunku, mana wak suyuwan maqanakuykunaman rinkuchu, nitaq suyunku ukhupipis. Kay The Australian Encyclopædia, nisqa qillqara 50 watas ñawpaqta, chaymanta jinata nirqa: “Jehovamanta sutʼinchaqkunaqa, maqanakuy kaptin ni imarayku rinkuchu”, nispa.

¿Imaraykutaq chayta ruwanku? Chay ruway, concienciankuwan churanakusqanrayku, mayqinchus Jesucristo yachachisqanmanjina, ruwasqanmanjina ima, amañasqa kachkan. Jesusqa, discipulosninman runa masinkuta munakunankuta yachachirqa. Chayrayku kamachirqa: “Munakuychej enemigosniykichejta; allin kajta ruwaychej qankunata chejnejkunapaj”, nispa (Lucas 6:27; Mateo 22:39). Juk kutipiqa, Jesuspa discipulon, espadawan kutikuyta munarqa, Jesustaq, usqhayllata jinata kamachirqa: “Espadaykita waqaychay. Espadata oqharejkunaqa espadallawantaj wañuchisqa kanqanku”, nispa (Mateo 26:52). Ajinamanta payqa, mana nisqallanwanchu manaqa ruwasqanwanpis, discipulosnin armasta mana uqharinankuta yachachirqa.

Chantapis, Jehovamanta sutʼinchaqkunaqa, pachantinpi kasqankurayku, maqanakuykunaman mana rinkuchu. Chayta ruwankuman chayqa, hermanosninkutapis wañuchinkuman, manataq Jesuspa kamachisqanta kasukuchkankumanchu, pichus ‘puraqmanta munanakunankuta’, kamachirqa (Juan 13:35).

Jehovamanta sutʼinchaqkunapaqqa, kay kamachiykunaqa, mana qhasi parlaykunallachu. Kay segunda guerra mundial nisqapi, ruwasqankuta qhawarina (1939-1945). Estados Unidos suyupiqa, cuartelman mana risqankurayku, 4.300 Sutʼinchaqkunata carcelman wisqʼararqanku. Gran Bretaña suyupitaq, maqanakunankupaq mana yanapayta munasqankurayku, 1.500 kuraqta, carcelman wisqʼarqanku (maypichus 300 warmispis karqanku). Nazi Alemaniapiqa, armasta mana uqharisqankurayku, 270 Sutʼinchaqkunata wañuchirqanku, 10.000 hermanostataq, wisqʼarqanku, chayri jatun carcelespi ñakʼarichinankupaq sinchi llamkʼayman churarqanku. Japón suyupitaq, mayta Sutʼinchaqkunata ñakʼarichirqanku. Kay segunda guerra mundialpi pillatapis familiaykimanta wañuchinku chayqa —chayri wak maqanakuypi—, sutʼita yachawaq: Jehovamanta sutʼinchaqkunamanta, ni mayqin chay ruwaymanta juchayuqchu kanku.

Alemania suyupiqa, Wolfgang Kusserow, 20 watasniyuq waynuchu, maqanakuyman mana riyta munasqanrayku, 1942 watapi, nazis qhururparispa wañurpachirqanku. Payqa, niraq wañuchkaspa, imatachus Jehovamanta sutʼinchaqkuna maqanakuymanta yuyasqankuta, chiqamanta rikuchirqa (Isaías 2:4). Juchachana militar tribunalpi, nirqa: “Jehovamanta sutʼinchaq kani, Biblia yachachisqanmanjinataq uywasqa kani. Juk kamachiyqa, kay kachkan: ‘Diosniykita munakunki, runa masiykitataq qam kikiykitajina munakunki’. Wak kamachiy nillantaq: ‘Ama runata wañuchinkichu’. ¿Sachʼaspaqchu kay kamachiykuna qillqakurqa?”, nispa (Marcos 12:29-31; Éxodo 20:13).

Jehovamanta sutʼinchaqkunaqa, tukuy atiyniyuq Jehová Dioslla, Jallpʼaman allin kawsayta apamunanta creenku. Chayrayku, Dios “tukuy kay pachapi chʼajwasta” chʼinyachinanta suyachkanku (Salmo 46:9).