Ken Lo Ser Resusitá?

“No straña boso di esaki, pasobra e ora lo yega den kual tur ku ta den graf lo tende su bos, i lo sali.”—JUAN 5:28, 29.

1. Ki deklarashon sobresaliente Moisés a tende na e mata di sumpiña ku tabata kimando, i ken a hala atenshon na e palabranan ei despues?

ALGU masha straño a tuma lugá mas ku 3.500 aña pasá. Moisés tabata kuidando e karnénan di e patriarka Jetro. Banda di Seru Horèb, e angel di Yehova a presentá na Moisés den un vlam di kandela meimei di un mata di sumpiña. Segun e relato di Eksodo, Moisés “a wak, i mira, e mata tabata tur na kandela; sin embargo, e mata no a kima kaba na nada.” E ora ei for di meimei di e mata di sumpiña un stèm a yam’é. E stèm a bis’é: “Ami ta e Dios di bo tata, e Dios di Abraham, e Dios di Isaak i e Dios di Jakòb.” (Eksodo 3:1-6) Hopi tempu despues den e promé siglo di nos era, e Yu di Dios mes, Hesus, a hala atenshon na e palabranan ei.

2, 3. (a) Ki rekompensa Abraham, Isaak i Jakòb lo risibí? (b) Ki preguntanan ta surgi?

² Hesus tabata papiando ku algun saduseo. E saduseonan no tabata kere den resurekshon. Hesus a deklará: “Ku e mortonan ta wòrdu lantá, esei Moisés tambe a mustra den e Skritura tokante di e mata, kaminda e ta yama SEÑOR e Dios di Abraham, i e Dios di Isaak, i e Dios di Jakòb. Awor e no ta e Dios di e mortonan, sino di e bibunan, pasobra pa e tur ta biba.” (Lukas 20:27, 37, 38) Ku e palabranan aki, Hesus a konfirmá ku for di e punto di bista di Dios, Abraham, Isaak i Jakòb kendenan tabatin hopi tempu morto kaba ainda tabata bibu den e memoria di Dios. Meskos ku Jòb, nan ta spera riba e fin di nan “sirbishi obligatorio,” nan soño den morto. (Jòb 14:14, NW) Nan lo ser resusitá den e mundu nobo di Dios.

³ Pero kiko di e míles di miónes di otro hende ku a muri atraves di historia humano? Nan tambe lo ser resusitá? Promé ku nos por haña un kontesta satisfaktorio riba e pregunta ei, laga nos haña sa for di e Palabra di Dios unda hende ta bai ora nan muri.

Unda e Mortonan Ta?

4. (a) Unda hende ta bai ora nan muri? (b) Kiko ta Seol?

⁴ Beibel ta deklará ku e mortonan “no sa nada.” Ora un hende muri e no ta bai sufri tormento den fièrnu, ni pasa un tempu di  agonia den Limbo, * sino simplemente ta bolbe na stòf. P’esei, e Palabra di Dios ta konsehá e bibunan: “Tur loke bo man haña pa hasi, hasié ku tur bo forsa; pasobra no tin ni aktividat ni planifikashon ni sabiduria den Seol, kaminda bo ta bai.” (Eklesiastés 9:5, 10; Génesis 3:19) E palabra “Seol” ta deskonosí pa hopi hende. E ta un ekspreshon hebreo di kua su orígen no ta muchu kla. Hopi religion ta siña ku e mortonan ta na bida ainda, pero manera e Palabra inspirá di Dios ta mustra, esnan ku ta den Seol ta morto, inkonsiente. Seol ta e graf komun di humanidat.

5, 6. Despues ku Jakòb a muri, unda i huntu ku ken el a wòrdu derá?

⁵ E promé kaminda ku e palabra “Seol” ta aparesé den Beibel ta na Génesis 37:35. Ora e patriarka Jakòb a haña sa ku su yu stimá Hosé supuestamente lo a muri, el a nenga di wòrdu konsolá i a bisa: “Lo mi baha bai den Seol na rou.” Keriendo ku su yu tabata morto, Jakòb a deseá di muri i bai Seol. Despues, nuebe di Jakòb su otro yunan mas grandi kier a baha bai Egipto ku Benjamin, su yu mas chikitu, pa buska alivio pa e hamber ku a asotá nan. Sin embargo, Jakòb a nenga, bisando: “Mi yu no ta bai ayanan ku boso, pasobra su ruman hòmber a muri i é so a keda. Si algu malu pasa kuné durante di e biahe ku boso ta hasi, boso lo hasi mi kabei blanku baha ku tristesa den Seol.” (Génesis 42:36, 38) E dos referensianan aki ta konektá morto ku Seol, i no ku un bida despues di morto.

⁶ E relato di Génesis ta mustra ku Hosé a bira e atministradó di alimento na Egipto. Esei a pone ku Jakòb por a biaha bai Egipto pa aya e bolbe uni ku Hosé, lokual tabata un re-enkuentro felis. Despues di esei, Jakòb a biba den e tera ei te na su morto na e edat hopi avansá di 147 aña. Pa kumpli ku su último deseo, su yunan a hiba su restunan i dera nan den e kueba di Makpela den e tera di Kánaan. (Génesis 47:28; 49:29-31; 50:12, 13) Dje forma aki Jakòb a wòrdu derá huntu ku su tata Isaak i su tawela Abraham.

“Reuní ku Nan Tatanan”

7, 8. (a) Unda Abraham a bai ora el a muri? Splika. (b) Kiko ta mustra ku otro hende tambe a bai Seol ora nan a muri?

⁷ Mas promé, ora Yehova a konfirmá su pakto ku Abraham i a primintí ku su desendensia lo a bira hopi, el a indiká kiko lo a sosodé ku Abraham. Yehova a bis’é: “Abo, lo bo bai serka bo tatanan na pas; lo bo wòrdu derá na un edat hopi avansá.” (Génesis 15:15) I esei ta netamente loke a sosodé. Génesis 25:8 ta bisa: “Abraham a hala su último rosea i a muri na un edat hopi avansá, un hòmber bieu i satisfecho di su bida, i el a wòrdu reuní ku su pueblo.” Ta na kua pueblo e ta referí aki? Génesis 11:10-26 ta menshoná su antepasadonan di for di tempu di Sèm yu di Noe. Pues ta serka esnan ku tabata drumí den Seol kaba Abraham a wòrdu “reuní” ora el a muri.

⁸ E ekspreshon “reuní ku su pueblo” ta aparesé vários bes den e Skritura Hebreo. Pues, ta lógiko pa konkluí anto ku tantu Ismael yu di Abraham komo Aaron ruman di Moisés a bai Seol ora nan a muri, wardando riba un resurekshon. (Génesis 25:17; Numbernan 20:23-29) Moisés tambe a bai Seol, ounke niun hende no tabata sa unda su graf tabata. (Numbernan 27:13; Deuteronomio 34:5, 6) Meskos tambe, Josué, susesor di Moisés komo lider di Israel, huntu ku henter un generashon di hende tambe a bai Seol ora nan a muri.—Huesnan 2:8-10.

9. (a) Kon Beibel ta mustra ku e palabra hebreo “Seol” i e palabra griego “Hades” ta referí na e mesun lugá? (b) Ki speransa tin pa e personanan ku ta den Seol, òf Hades?

⁹ Hopi siglo despues, David a bira rei di e 12 tribunan di Israel. Ora el a muri, el “a bai sosegá serka su tatanan.” (1 Reinan 2:10) E tambe a bai Seol? Ta interesante pa nota ku riba  dia di Pentekòste di aña 33 di nos era, apòstel Pedro a referí n’e morto di David i a sita Salmo 16:10 [NW]: “Lo bo no laga mi alma den Seol.” Despues ku Pedro a menshoná ku David tabata den su graf ainda, el a apliká e palabranan ei na Hesus i a indiká ku David “a mira padilanti i a papia di e resurekshon di e Kristu, ku e no a wòrdu lagá den Hades, ni su karni no a mira korupshon. E Hesus aki Dios a lanta, di lokual nos tur ta testigu.” (Echonan 2:29-32) Aki Pedro a usa e palabra “Hades,” e ekivalente griego di e palabra hebreo “Seol.” Pues, hende ku segun Beibel ta den Hades ta den e mesun kondishon ku esnan ku e ta bisa ta den Seol. Nan ta drumi den morto, wardando un resurekshon.

Tin Hende Malbado den Seol?

10, 11. Pakiko nos por bisa ku algun hende malbado ta bai Seol, òf Hades, ora nan muri?

¹⁰ Despues ku Moisés a guia e nashon di Israel i saka nan for di Egipto, a lanta un rebelion den desierto. Moisés a bisa e pueblo pa separá nan mes for di e lidernan rebelde Kore, Datan i Abiram, pasobra nan lo a muri un morto violento. Moisés a splika: “Si e personanan aki muri di akuerdo ku e morto di henter humanidat i wòrdu kastigá ku e kastigu di henter humanidat, e ora ei no ta Yehova a manda mi. Pero si e ta algu kreá ku Yehova lo bai krea, i tera habri su boka i guli nan huntu ku tur loke ta pertenesé na nan i nan tin ku baha bibu den Seol, e ora ei boso lo sa sigur ku e hòmbernan aki a trata Yehova ku falta di rèspèt.” (Numbernan 16:29, 30, NW) Pues sea ku ta tera a habri i guli nan òf ku ta kandela a kaba ku nan manera a sosodé den e kaso di Kore i e 250 levitanan ku a tuma parti pa nan, tur e rebeldenan aki a bin resultá den Seol, òf Hades.—Numbernan 26:10.

¹¹ Simei, kende a maldishoná Rei David, a haña su kastigu na man di Salomon, susesor di David. David a bisa Salomon: “No lag’é bai sin haña kastigu, pasobra abo ta un hòmber sabí; i lo bo sa kiko bo mester hasi kuné, i lo bo laga su kabei blanku baha tur na sanger den Seol.” Salomon a laga Bènaia ehekutá e sentensia. (1 Reinan 2:8, 9, 44-46) Un otro víktima di Bènaia su spada di ehekushon tabata Joab, eks-hefe di ehérsito di Israel. Su kabei blanku no a “baha bai na pas den Seol.” (1 Reinan 2:5, 6, 28-34) Tur e dos ehèmpelnan aki ta mustra ku e kantika inspirá di David ta bèrdat: “E malbadonan lo bolbe na Seol, sí, tur e nashonnan ku ta lubidá Dios.”—Salmo 9:17.

12. Ken Ahitofel tabata, i unda el a bai ora el a muri?

¹² Ahitofel tabata e konsehero personal di David. Nan tabata konsiderá su konseho komo si fuera ta di Yehova mes e tabata bini. (2 Samuel 16:23) Lamentablemente, e sirbidó di konfiansa aki a bira un traidó i a djòin un rebelion bou di guia di Absalon, yu di David. Aparentemente, David a referí indirektamente na e traishon aki ora el a  skirbi: “No ta un enemigu [a] reprochá mi, pasobra esei lo mi por a soportá; ni no ta esun ku [a] odia mi [a] halsa su mes kontra mi, pasobra lo mi por a skonde p’e.” David a kontinuá: “Laga morto kohe nan di sorpresa; laga nan baha bibu den Seol, pasobra tin maldat den nan kas, meimei di nan.” (Salmo 55:12-15) Dia Ahitofel i su sosionan a muri, nan a bai Seol.

Ken Ta den Gehena?

13. Pakiko Hudas ta ser yamá “e yu di pèrdishon”?

¹³ Kompará David su situashon ku esun di Hesus, e David Mayor. Hudas Iskariot, un di e 12 apòstelnan di Kristu, a bira un traidó meskos ku Ahitofel. Hudas su akto di traishon tabata muchu mas serio ku esun di Ahitofel. Hudas a aktua kontra Dios su Yu unigénito. Den un orashon na fin di su ministerio riba tera, e Yu di Dios a bisa di su siguidónan: “Miéntras ku mi tabata ku nan, mi tabata warda nan den bo nòmber ku bo a duna mi; i mi a warda nan i ni un di nan no a bai pèrdí, ku eksepshon di e yu di pèrdishon, pa e skritura wòrdu kumplí.” (Juan 17:12) Dor di referí aki na Hudas komo “e yu di pèrdishon,” Hesus a indiká ku ora Hudas a muri, no tabatin speransa mas pa e bini bèk den un resurekshon. E no a sigui biba den e memoria di Dios. E no a bai Seol, sino Gehena. Kiko ta Gehena?

14. Kiko Gehena ta representá?

¹⁴ Hesus a kondená e lidernan religioso di su tempu pasobra nan a hasi kada un di nan disipelnan ‘meresedor di Gehena.’ (Mateo 23:15, NW) E hendenan di e tempu ei tabata konosé e Roi di Hinom. E tabata sirbi komo un landfill den kua nan tabata tira kadaver di kriminalnan ehekutá ku no tabata wòrdu konsiderá digno di un entiero apropiá. Mas promé, Hesus mes a hasi menshon di Gehena den su Sermon Riba Seru. (Mateo 5:29, 30, NW) P’esei, su nifikashon simbóliko tabata masha kla pa su oyentenan. Gehena a representá destrukshon kompletu sin speransa di un resurekshon. Ademas di Hudas Iskariot di den tempu di Hesus, tabatin mas hende ku a bai Gehena, i no Seol òf Hades ora nan a muri?

15, 16. Ken a bai Gehena ora nan a muri, i pakiko nan a bai einan?

¹⁵ E promé sernan humano, Adam ku Eva, a wòrdu kreá perfekto. Nan a peka den un forma deliberá. Nan tabatin dilanti nan sea bida òf morto eterno. Nan a desobedesé Dios i a tuma parti pa Satanas. Pues ora nan a muri, no tabata posibel pa nan benefisiá di e sakrifisio di reskate di Kristu. Mas bien, nan a bai Gehena.

 ¹⁶ E promé yu di Adam, Kain, a mata su ruman Abel i despues di esei a biba komo fugitivo. Apòstel Juan a deskribí Kain komo un hende “ku tabata di e malbado.” (1 Juan 3:12) Ta rasonabel pa konkluí ku ora el a muri, el a bai Gehena meskos ku su mayornan. (Mateo 23:33, 35, NW) E situashon di e hòmber hustu Abel sí ta kompletamente distinto! Pablo a splika: “Pa medio di fe Abel a ofresé na Dios un mihó sakrifisio ku Kain, dor di kual el a optené e testimonio ku e tabata hustu, ora Dios a duna testimonio di su regalonan.” Pablo a agregá: “I pa medio di fe ainda e ta papia, ounke ku e ta morto.” (Hebreonan 11:4) Sí, aktualmente Abel ta den Seol wardando riba un resurekshon.

Un “Promé” i un “Mihó” Resurekshon

17. (a) Ken ta bai Seol durante ‘e tempu di fin’ aki? (b) Kiko ta warda hende ku ta den Seol i kiko ta warda esnan ku ta den Gehena?

¹⁷ Hopi hende ku ta lesa e informashon aki lo kier sa kiko lo para di esnan ku ta muri durante ‘e tempu di fin.’ (Daniel 8:19) Revelashon kapítulo 6 ta deskribí e kareda di e kuater ginetenan durante e tempu ei. Ta interesante pa nota ku e último den esakinan yama Morto, i Hades ta siguié. Pues, hopi di e hendenan ku ta muri un morto prematuro kousá pa loke e ginetenan anterior hasi ta bin resultá den Hades, pa warda einan riba un resurekshon den e mundu nobo di Dios. (Revelashon 6:8) Anto kiko ta warda hende ku ta den Seol (Hades) i kiko ta warda esnan ku ta den Gehena? Den poko palabra, resurekshon pa e promé grupo i destrukshon pa e último.

18. Ki prospekto “e promé resurekshon” ta ofresé?

¹⁸ Apòstel Juan a skirbi: “Bendishoná i santu ta esun ku tin parti den e promé resurekshon; riba esakinan e di dos morto no tin poder, ma nan lo ta saserdotenan di Dios i di Kristu i lo reina huntu kuné pa mil aña.” Esnan ku lo ta ko-gobernante huntu ku Kristu ta risibí “e promé resurekshon,” pero ki speransa tin pa e restu di humanidat?—Revelashon 20:6.

19. Kon algun hende ta benefisiá di “un mihó resurekshon”?

¹⁹ For di tempu di Dios su sirbidónan Elias i Eliseo, e milager di resurekshon a trese hende bèk na bida. Pablo a bisa en detaye ku “muhénan a haña nan mortonan bèk pa medio di resurekshon; i otronan a wòrdu torturá, sin aseptá nan liberashon, pa nan por a optené un mihó resurekshon.” Sí, e fiel sirbidónan aki ku a mantené nan integridat a anhelá un resurekshon ku lo a duna nan chèns di biba no djis un par di aña mas pa despues muri, sino pa eternidat! Esei en bèrdat ta “un mihó resurekshon.”—Hebreonan 11:35.

20. Kiko e siguiente artíkulo lo analisá?

²⁰ Si nos muri fiel promé ku Yehova pone fin n’e mundu malbado aki, nos tin e speransa sigur di “un mihó resurekshon,” mihó den e sentido ku e ta unu ku mira riba bida eterno. Hesus a primintí: “No straña boso di esaki, pasobra e ora lo yega den kual tur ku ta den graf lo tende su bos, i lo sali.” (Juan 5:28, 29) Nos siguiente artíkulo ta sigui analisá e propósito di resurekshon. Lo e mustra kon e speransa di resurekshon ta fortalesé nos pa warda integridat i yuda nos desaroyá e spiritu di sakrifisio propio.

[Nota]

Bo Ta Kòrda?

• Pakiko Beibel ta bisa ku Yehova ta e Dios “di e bibunan”?

• Den ki kondishon e hendenan den Seol ta?

• Kiko ta warda e hendenan ku ta den Gehena?

• Kon algun hende lo benefisiá di “un mihó resurekshon”?

[Preguntanan di Estudio]

[Plachi na página 15]

Meskos ku Abraham, esnan ku ta bai Seol ta wardando riba un resurekshon

[Plachi na página 16]

Pakiko Adam ku Eva, Kain i Hudas Iskariot tur a bai Gehena?