3 Juan 1:1-14
1 Siak a masiken so nansulat ed sika, pinablin Gayo, a peteg ya inad-arok.
2 Inad-arok ya agi, ipipikasik ya onaligwas ka ed amin a bengatla tan maksil komon so laman mo, no panon ya onaaligwas ka la natan.
3 Ta malikeliket ak sanen pinaneknekan na saray agagi so pamebemben mo ed katuaan, no panon a mantutultuloy kan mankukurang ed katuaan.
4 Anggapo lay mas baleg a rason na pisalsalamat ko nen say saya, a narerengel kon mankukurang ed katuaan iray ananak ko.
5 Inad-arok ya agi, matoor ka ed antokaman a gagawaen mo parad saray agagi, tan ed saray agmo ni kabat ya agagi,
6 a nantasi nipaakar ed panangarom ed kongregasyon. Saraya komon so pasipot mo diad paraan a manepeg ed Dios.
7 Ta nambiahe ra nisengeg ed ngaran to, ya anggapoy antokaman ya aalaen da ed totoo na saray nasyon.
8 Nepeg sirin a parawesen tayo irayan totoo, pian magmaliw itayon kakimeyan diad katuaan.
9 Walay insulat ko ed kongregasyon, balet si Diotrefes, a labalabay toy magmaliw a manunaan ed limog da et agto labay ya awaten so antokaman a manlapud sikami.
10 Kanian no onsabi ak, ipanonot ko iray gagawaen to, ya ag-ontutundan mangilalabir na mauges nipaakar ed sikami. Tan lapud agni kontento ed saraya, agto labay ya awaten iray agagi, tan aamperen to iramay malabay a mangawat ed saray agagi tan eekalen to ra ed kongregasyon.
11 Inad-arok ya agi, alig mo so maong, aliwan say mauges. Samay manggagaway maong et walad dapag na Dios. Samay manggagaway mauges et agto nanenengneng so Dios.
12 Saray maabig a kualidad nen Demetrio et tinasian na amin ya agagi tan pinaneknekan itan na katuaan. Diad tua et tatasian mi met, tan amtam a tua so pantatasi mi.
13 Dakel so labay kon ibaga ed sika, ingen ta agko la labay ya isulat iratan.
14 Balet iilaloan koy makapinengneng ed sika, tan makapantongtong ta ya arap-arapan.
Niwala komon so deen ed sika.
Manpapakomusta ed sika iray kakaaro. Ikomustaan mo ak met ed kada sakey ed saray kakaaro tayo.
