2 Juan 1:1-13
1 Siak a masiken so nansulat ed biin pinili tan ed ananak to, a peteg ya inad-arok, tan aliwan siak labat noagta amin met ya akapikabat ed katuaan.
2 Inaro mi kayo lapud katuaan a mansiasiansia ed sikatayo, tan mansiansia itan ed sikatayo ed andi-anggaan.
3 Niwala komon ed sikatayo so agnaparaan a kaabigan, panangasi tan deen a manlalapu ed Dios ya Ama tayo tan ed si Jesu-Kristo ya Anak to, pati say katuaan tan aro.
4 Malikeliket ak ta naamtaan ko a mankukurang ed katuaan so arum ed saray ananak mo, unong ed ganggan ya inawat tayo ed Ama.
5 Kanian natan et susulatan ta ka, bii, pian kerewen ko ed sika a manaaroan itayo, ya aliwa iyan sakey a balon ganggan noagta saya imay wala la ed sikatayo diad gapo.
6 Tan saya so kabaliksan na aro, a mantultuloy itayon mankurang unong ed saray ganggan to. Unong a nadngel yo la ed gapo, ingganggan to a nepeg a mantultuloy kayon mankurang ed aro.
7 Ta dakel iray managpalikdo diad mundo, ya agmamibidbir a si Jesu-Kristo et nagmaliw a too. Saya imay managpalikdo tan antikristo.
8 Manalwar kayo, pian agyo nabalang iray bengatlan nansagpotan tayo, noagta pian sigpot yon naawat so tumang yo.
9 Balang sakey a papasulokan toy bangat na Kristo tan agmansiansia ed satan, anggapo ed sikato so Dios. Samay mansiansia ed sayan bangat, walad sikato so Ama tan say Anak.
10 No walay onla ed sikayo tan agto awit iyan bangat, agyon balot papalooben ed saray ayaman yo odino agyo ibabano.
11 Ta samay mangibano ed sikato et mibibiang ed saray mauges a gawa to.
12 Anggaman dakel so labay kon ibaga ed sikayo, agko labay ya isulat iratan, noagta iilaloan kon makakar ak ed sikayo tan makapitongtong ak ya arap-arapan, pian manliket kayon maong.
13 Manpapakomusta ed sika iray ananak na bii ya agim, say sakey a pinili.
