Sinusuwelduhan Ba ang mga Saksi ni Jehova sa mga Gawain Nila?

I-PLAY

Hindi. Wala kaming suweldo sa mga gawain namin. Tinutularan namin ang halimbawa ni apostol Pablo. Hindi niya ginamit ang ministeryo niya para magkapera.—2 Corinto 2:17.

Sa artikulong ito

Binabayaran ba ang mga Saksi sa pagbabahay-bahay nila?

Hindi. Walang suweldo ang lahat ng ginagawa naming pangangaral, kasama na ang pagbabahay-bahay. (Mateo 24:14) Nangangaral kami at nagtuturo ng Bibliya sa iba gamit ang sarili naming pera, panahon, at pag-aari. Sinusunod namin ang sinabi ni Jesus sa mga apostol niya nang utusan niya silang mangaral: “Tinanggap ninyo nang walang bayad, ibigay ninyo nang walang bayad.”—Mateo 10:7, 8.

May suweldo ba ang mga elder nila?

Wala. Ang lahat ng ginagawang paglilingkod ng mga elder a ay walang bayad, kasama na ang bautismo, kasal, at libing. May sekular na trabaho ang karamihan sa kanila para mapaglaanan ang sarili at ang kani-kaniyang pamilya. Retired na ang iba, at may ilan na nasa pantanging buong-panahong paglilingkod pero walang suweldo.

May suweldo ba ang mga nasa pantanging buong-panahong paglilingkod?

Wala, pero pinaglalaanan sila ng pagkain, tirahan, at maliit na allowance para sa personal na pangangailangan nila. Nakakatanggap din sila ng medikal na tulong. Dahil sa mga ito, nakakapagpokus sila sa ministeryo nila, gaya ng ginawa ni apostol Pablo at ng iba pang Kristiyano noon.—2 Corinto 11:9; Filipos 4:16, 17.

Mga nasa pantanging buong-panahong paglilingkod:

Mga misyonero
Mga naglalakbay na elder at asawa nila, na dumadalaw at nagpapatibay sa mga kongregasyon
Mga special pioneer, na inatasang maglingkod sa mga lugar na may malaking pangangailangan
Mga naglilingkod nang buong panahon sa isang tanggapang pansangay
Mga nagtatayo ng gusali para sa pagsamba o tumutulong sa disaster relief

Iba’t iba ang atas ng mga Saksi ni Jehova na nasa pantanging buong-panahong paglilingkod

Paano namin ginagamit ang mga donasyon?

Ginagamit namin ang mga donasyon para sa mga relihiyosong gawain namin at pagkakawanggawa. Ipinapaliwanag ang iba’t ibang gawain namin sa artikulong “Paano Ginagamit ng mga Saksi ni Jehova ang mga Donasyon?” Makikita naman sa serye ng artikulo na “Saan Napupunta ang Donasyon Mo” kung saan ginagamit ang mga donasyon at kung paano nakakatulong sa mga tao sa buong mundo ang gawain namin.

Ang sabi ng ilan

Sinabi ni Ernest, na mahigit 40 taon nang naglilingkod bilang elder: “Pag-ibig dapat ang dahilan ng isa kaya siya naglilingkod bilang elder. Kung may suweldo kami, baka isipin ng mga tinutulungan namin na may iba kaming motibo. Ang sarap sa pakiramdam kapag nagbibigay ka nang walang kapalit.”
Sinabi ni Kelly, na may sekular na trabaho noon pero naglilingkod na ngayon nang buong panahon sa isang tanggapang pansangay: “Puwede sana akong kumita nang malaki sa trabaho ko. Pero ngayong naglilingkod ako nang walang suweldo, kailangan kong pag-isipang mabuti ang mga binibili ko. Mas masaya at kontento ako ngayon kaysa noong nagtatrabaho ako.”
Sinabi naman ni Ginette, na isang misyonera: “Sapat lang ang natatanggap kong tulong. Bago ako maging misyonera, nag-aral ako ng finance sa isang unibersidad. Puwede sana akong magkaroon ng magandang trabaho. Pero hindi ko iyon pinili, kasi hindi maibibigay ng pera o anumang karera ang kaligayahang makatulong sa mga tao na magbago ang buhay at magkaroon ng pag-asa.”

a Walang pastor, ministro, o pari na nangunguna sa mga kongregasyon ng mga Saksi ni Jehova. Isang grupo ng mga elder ang inatasang manguna sa bawat kongregasyon. (Gawa 14:23) Pero hindi sila nakakataas kaysa sa ibang miyembro ng kongregasyon. Sinabi ni Jesus sa mga tagasunod niya: “Lahat kayo ay magkakapatid.” (Mateo 23:8) Kaya hindi iniisip ng mga elder na mas mahalaga sila kaysa sa iba. Ganito ang sinabi ng Encyclopædia Britannica: “Ang pagkakaiba ng klero sa ibang mga miyembro ng simbahan ay nagsimula noong ikalawang siglo”—matagal nang patay noon si Jesus at ang mga apostol.

Kaugnay na mga Paksa

Karaniwang mga Tanong

Magugustuhan Mo Rin

KARANIWANG MGA TANONG

Mga Saksi ni Jehova