Bibliaj kutichisqan

 Diospa Reinonqa uj Gobierno, chay Gobiernotaqa Jehová Dios churarqa. Chay Gobierno cielopi kasqanrayku, Bibliaqa nillantaj: ‘Cielopi kaj Gobierno’, nispa (Marcos 1:14, 15; Mateo 4:17). Diospa Gobiernonqa ashkha imaspi runaspa gobiernonkuman rijchʼakojtinpis, tukuy imapi aswan sumajpuni.

•   Kamachejkuna. Diosqa Jesucristota ajllarqa Gobiernonpi Rey kananpaj, paymantaj may jina atiyta qorqa. Kay jallpʼapeqa ni jaykʼajpis uj gobierno ajina atiyniyoj kanqachu (Mateo 28:18). Jesusqa atiyninwan allin imasllata ruwan. Payqa rikucherqaña atienekunapaj jina kamachej kasqanta, khuyakuyniyoj kamachejtaj kasqanta (Mateo 4:23; Marcos 1:40, 41; 6:31-34; Lucas 7:11-17). Jesusqa Diospa yanapayninwan tukuy nacionesmanta wakin runasta ajllarqa cieloman rinankupaj, kay jallpʼatataj kamachimunankupaj (Apocalipsis 5:9, 10).

•   ¿Mashkha tiempota kamachenqa? Kay jallpʼapi gobiernosqa uj tiempollata kamachinku. Diospa Gobiernontajrí “ni jaykʼaj chinkachisqachu kanqa” (Daniel 2:44).

•   ¿Pikunataj chay Gobiernoj atiyninpi kanqanku? Pi runallapis Diospa Gobiernonpa atiyninpi kayta atin, maypi nacekojtinpis, familian maymanta kajtinpis. Ajinapis chay Gobiernoj atiyninpi kananpajqa Diospa munayninta ruwanan tiyan (Hechos 10:34, 35).

•   Kamachiykuna. Diospa Gobiernonpa kamachiykunasnenqa mana sajra ruwayllatachu juchachan, manaqa kamachiyninpi kajkunata yanapan llimphu kausayniyoj kanankupaj. Ujnin kamachiynin kay kashan: “‘Jehová Diosniykitaqa munakunayki tiyan tukuy sonqoykiwan, tukuy kausayniykiwan, tukuy yuyayniykiwantaj’. Chaymin aswan kuraj, ñaupaj kaj kamachiytaj. Iskay kajtaj ñaupaj kajman rijchʼakullantaj: ‘Runa masiykita munakunayki tiyan qan kikiykita jina’” (Mateo 22:37-39). Diospa Gobiernonpa atiyninpi kajkunaqa Diosta munakusqankurayku, runa masinkutapis munakusqankurayku tukuywan kʼachas kanku.

•   ¿Imatataj Diospa Gobiernon yachachin? Diospa Gobiernonqa mana llimphu kausayniyoj kanankupaj kamachiykunallatachu churan, manaqa kamachiyninpi kajkunaman yachachin imaynatachus chay kamachiykunata juntʼanankuta (Isaías 48:17, 18).

•   ¿Imapajtaj Diospa Gobiernon? Diospa Gobiernonqa mana chay Gobiernopi kamachejkuna runasmanta valekuspa qhapajyaykunankupajchu, manaqa Diospa munaynin juntʼakunanpaj. Chantapis Diospa Gobiernon kashan Diosta munakojkuna kay jallpʼapi uj paraisopi wiñaypaj kausakuyta atinankupaj (Isaías 35:1, 5, 6; Mateo 6:10; Apocalipsis 21:1-4).