Bibliaj kutichisqan

 Runasqa sutiyoj kanchej, ¿manachu Diospis sutillayojtaj kanman? Runasqa sutinchejmantapuni rejsinakunchej, Diosman qayllaykunapajpis paypa sutinta yachananchej tiyan.

 Bibliapeqa Dios niwanchej: “Noqa Jehová kani. Chaymin suteyqa” nispa (Isaías 42:8). Diostaqa ashkha sutiswan rejsinchej, chaykunamanta wakenqa kanku: Tukuy Atiyniyoj Dios, Tukuyta Kamachej Señor, tukuy imata Ruwaj Dios. Diosqa kamachisninta niwanchej sutinta oqharinanchejta (Génesis 17:1; Hechos 4:24; 1 Pedro 4:19).

 Ashkha Bibliaspeqa Diospa sutin rikhurin Éxodo 6:3 versiculopi. Chay versiculopi Diosqa nin: “Abrahanman, Isaacman, Jacobman rikhurispa, Tukuy Atiyniyoj Dios jinalla rejsichikorqani, Jehová sutiywantajrí mana paykunaman rejsichikorqanichu”, nispa.

 Quechuapi Diospa sutenqa Jehová, chay sutitataj unaymantapachaña oqharikun. Wakin runasqa Diospa sutin Yavé kasqanta ninku, ajinapis Jehová suti aswan rejsisqa. Bibliaj ñaupaj librosnenqa hebreopi qhelqasqa karqanku, hebreopeqa pañamanta lloqʼeman escribikun. Hebreo parlaypi Diospa sutenqa kay tawa letrasnillayoj: יהוה. Chay letras kanku YHWH, chay tawa letrastataj Tetragrámaton nispa sutichakun.