“တစ်ဖန်မွေးဖွားခြင်း” ဆိုတဲ့ စကားလုံးက တစ်ဖန်မွေးဖွားခြင်း ခံရသူနဲ့ ဘုရားသခင်စပ်ကြား ဆက်ဆံရေးအသစ် စတင်ခြင်းကို ဆိုလိုတယ်။ (ယောဟန် ၃:​၃၊ ၇) ဘုရားသခင်က တစ်ဖန်မွေးဖွားခြင်းခံရသူတွေကို မိမိရဲ့သားသမီးတွေအဖြစ် မွေးစားတယ်။ (ရောမ ၈:​၁၅၊ ၁၆။ ဂလာတိ ၄:၅။ ၁ ယောဟန် ၃:၁) တရားဝင် မွေးစားခံရသူတွေလိုပဲ သူတို့ရဲ့အခြေအနေ ပြောင်းလဲသွားပြီး ဘုရားရဲ့မိသားစုဝင် ဖြစ်လာကြတယ်။​—၂ ကောရိန္သု ၆:​၁၈။

လူတစ်ဦး ဘာကြောင့် တစ်ဖန်မွေးဖွားခြင်း ခံရသလဲ

“တစ်ဖန်မွေးဖွားခြင်း မခံရတဲ့သူဟာ ဘုရားသခင့်နိုင်ငံတော်ကို မြင်ရမှာ မဟုတ်ဘူး” လို့ ယေရှုပြောတယ်။ (ယောဟန် ၃:၃) ဒါကြောင့် တစ်ဖန်မွေးဖွားခြင်းက လူတစ်ဦးကို ဘုရားနိုင်ငံတော်မှာ ခရစ်တော်နဲ့အတူ အုပ်ချုပ်နိုင်ဖို့ အသင့်ပြင်ဆင်ပေးတယ်။ နိုင်ငံတော်ဟာ ကောင်းကင်မှာ တည်ထောင်မှာဖြစ်လို့ “တစ်ဖန်မွေးဖွား” ခံရသူတွေအတွက် အမွေကို “ကောင်းကင်မှာ သိမ်းထားပေးတယ်” လို့ ကျမ်းစာ ဆိုတယ်။ (၁ ပေတရု ၁:​၃၊ ၄) သူတို့ဟာ ခရစ်တော်နဲ့အတူ “ဘုရင်တွေအဖြစ် အုပ်ချုပ်” ရမယ်ဆိုတဲ့ အာမခံချက် ရထားကြတယ်။​—၂ တိမောသေ ၂:​၁၂။ ၂ ကောရိန္သု ၁:​၂၁၊ ၂၂။

ဘယ်လိုနည်းနဲ့ တစ်ဖန်မွေးဖွားခြင်း ခံရသလဲ

တစ်ဖန်မွေးဖွားခြင်း ခံရသူတွေဟာ “ရေနဲ့ရော၊ စွမ်းအားတော်နဲ့ပါ” မွေးဖွားခြင်းခံရမယ်လို့ ယေရှု ပြောတယ်။ (ယောဟန် ၃:၅) ဆိုလိုတာက ရေနဲ့ နှစ်ခြင်းခံရမယ်၊ အဲဒီနောက် သန့်ရှင်းသော စွမ်းအားတော်နဲ့ နှစ်ခြင်းခံရမယ်။​—တမန်တော် ၁:၅။ ၂:​၁–၄။

တစ်ဖန်မွေးဖွားခြင်း ခံရသူတွေထဲမှာ ယေရှုက ဦးဆုံးပဲ။ ယေရှု ဂျော်ဒန်မြစ်မှာ နှစ်ခြင်းခံပြီးနောက် ဘုရားသခင်က သူ့ကို သန့်ရှင်းသော စွမ်းအားတော်နဲ့ ဘိသိက်ပေး (နှစ်ခြင်းပေး) ခဲ့တယ်။ ဒါကြောင့် ဘုရားရဲ့သားအဖြစ် သန့်ရှင်းသော စွမ်းအားတော်နဲ့ တစ်ဖန်မွေးဖွားခံရပြီး ကောင်းကင်အသက်တာ ပြန်ရဖို့ မျှော်လင့်ချက် ရှိလာတယ်။ (မာကု ၁:​၉–​၁၁) ဘုရားက ယေရှုကို နာမ်ဝိညာဉ်သားတစ်ဦးအဖြစ် ရှင်ပြန်ထမြောက်စေခြင်းအားဖြင့် ဒီမျှော်လင့်ချက် ပြည့်အောင် လုပ်ပေးခဲ့တယ်။​—တမန်တော် ၁၃:၃၃။

တစ်ဖန်မွေးဖွားခံရတဲ့ တခြားသူတွေလည်း သန့်ရှင်းသော စွမ်းအားတော် မရရှိခင် ရေနဲ့နှစ်ခြင်းခံကြတယ်။ a (တမန်တော် ၂:​၃၈၊ ၄၁) ဒီနောက် ဘုရားသခင်က သူတို့ကို ရှင်ပြန်ထမြောက်စေခြင်းအားဖြင့် ကောင်းကင်အသက်တာ မျှော်လင့်ချက်ကို ပြည့်အောင်လုပ်ပေးမှာ ဖြစ်တယ်။​—၁ ကောရိန္သု ၁၅:၄၂–​၄၉။

တစ်ဖန်မွေးဖွားခံရခြင်းနဲ့ပတ်သက်တဲ့ ယူဆချက်အမှားများ

ယူဆချက်အမှား။ လူတစ်ဦးက တစ်ဖန်မွေးဖွားခြင်းခံ၊ မခံ ကိုယ်ပိုင်ရွေးချယ်ခွင့် ရှိတယ်။

အမှန်– ဘုရားနဲ့ ရင်းနှီးတဲ့ဆက်ဆံရေး ရှိဖို့၊ ကယ်တင်ခြင်းရဖို့ဆိုတဲ့ အခွင့်အရေးကို လူအားလုံး ရထားတယ်။ (၁ တိမောသေ ၂:​၃၊ ၄။ ယာကုပ် ၄:၈) ဒါပေမဲ့ တစ်ဖန်မွေးဖွားခြင်း ခံရမယ့်သူတွေကိုတော့ ဘုရားသခင်ကိုယ်တိုင် ရွေးချယ်တယ် ဒါမှမဟုတ် သန့်ရှင်းသောစွမ်းအားတော်နဲ့ ဘိသိက်ပေးတယ်။ တဖန်မွေးဖွားခြင်းခံရတာဟာ ‘လူတစ်ယောက်ရဲ့ ဆန္ဒ ဒါမှမဟုတ် ကြိုးစားအားထုတ်မှုပေါ် မမူတည်ဘဲ ဘုရားသခင်ပေါ်မှာပဲ မူတည်တယ်’ လို့ ကျမ်းစာက ဆိုတယ်။ (ရောမ ၉:​၁၆) “တစ်ဖန်မွေးဖွားခြင်း” ဆိုတဲ့စကားလုံးကို “အထက်အရပ်မှ မွေးဖွားခြင်း” လို့လည်း ပြန်ဆိုနိုင်တယ်။ ဒါကြောင့် တစ်ဖန်မွေးဖွားခြင်းဆိုတာ “အထက်အရပ်မှ၊” တစ်နည်းအားဖြင့် ဘုရားသခင်ဆီကလာမှန်း သိနိုင်တယ်။​—ယောဟန် ၃:၃။