သင်​မှတ်မိ​သလော

မကြာသေးမီ​က ထုတ်ဝေ​ခဲ့​သော ကင်းမျှော်စင် စာစောင်​များ​ကို ဖတ်ရှု​ရ​၍ တန်ဖိုး​ထား​လေးမြတ်​ခဲ့​ပါသလော။ သို့​ဖြစ်​လျှင် အောက်ပါ​မေးခွန်းများကို သင်​ဖြေဆို​နိုင်၊ မဖြေ​ဆိုနိုင် စမ်း​ကြည့်​ပါ–

• “စဉ်းစား​တွေးခေါ်​နိုင်စွမ်း” က​မည်သို့ ကာကွယ်​စောင့်ရှောက်​ပေး​နိုင်​သနည်း။ (သု. ၁:၄၊ က​ဘ)

ယင်းက ဝိညာဉ်​ရေး​အန္တရာယ်များ​ကို သတိရှိ​စေနိုင်​သည်၊ အလုပ်ခွင်​တွင် လိင်ဆိုင်ရာ​သွေးဆောင်မှုများ​ကို ရှောင်ရှား​ခြင်း အစ​ရှိသော ပညာရှိ​စွာ ပြုမူ​ဆောင်ရွက်ဖို့ ကြိုတင်​စီစဉ်​ရန် လှုံ့ဆော်ပေး​နိုင်​သည်။ ခရစ်ယာန်​ချင်း​များသည် မစုံလင်သူ​များ​ဖြစ်သည်​ကို အသိအမှတ်ပြု​ရန် ကူညီပေး​သည့်​အပြင် စိတ်ဆိုး​စ​ရာ​အကြောင်း ပေါ်လာ​သည့်​အခါ​တွင်​လည်း စိတ်​လိုက်​မာန်​ပါ တုံ့ပြန်​ခြင်း​ကို​ရှောင်ရန် လှုံ့ဆော်ပေး​နိုင်၏။ ဝိညာဉ်​ရေး​လမ်းလွဲ​သွား​စေနိုင်​သည့် စည်းစိမ်ဥစ္စာ​လိုက်စားခြင်း​ကို ရှောင်ရှား​ရန်​လည်း ကူညီပေး​နိုင်​သည်။—၈/၁၅၊ စာမျက်နှာ ၂၁-၄။

• လူတစ်ဦး​သည် အကျိုးပြုသော အိမ်နီးချင်း​တစ်ဦး မည်သို့​ဖြစ်လာ​နိုင်​သနည်း။

အိမ်နီးချင်း​ကောင်း​တစ်ဦး​ဖြစ်​ရန် နည်း​နှစ်နည်း​မှာ ရက်ရက်ရောရော ပေးကမ်း​သူ​ဖြစ်​ခြင်း​နှင့် ကျေးဇူး​သိ​တတ်​စွာ ခံယူ​သူ​ဖြစ်​ခြင်း​တို့​ဖြစ်သည်။ အခက်အခဲ​ကြုံ​သည့်​အခါ အိမ်နီးချင်း​ကောင်း​ဖြစ်​ခြင်း​သည် တန်ဖိုး​ရှိ၏။ ယေဟောဝါသက်သေ​များသည် မကြာမီ ဖြစ်ပျက်​လာတော့​မည့် ဆိုးသွမ်းမှု​ကို ဘုရားသခင် အဆုံးစီရင်​ခြင်း​အကြောင်း တခြားသူ​များ​ကို သတိပေး​ခြင်း​အားဖြင့် အိမ်နီးချင်း​ကောင်း​ဖြစ်​ဖို့ ကြိုးစား​နေကြ​သည်။—၉/၁၊ စာမျက်နှာ ၄-၇။

• သမ္မာကျမ်းစာ​အရ စိန့်​အစစ်အမှန်များ​ကား မည်သူ​တို့​နည်း၊ သူတို့သည် လူကို မည်သို့​ကူညီပေး​မည်​နည်း။

အစောပိုင်း​ခရစ်ယာန်​အားလုံး​သည် စိန့်​အစစ်အမှန်များ သို့​မဟုတ် သန့်ရှင်းသူ​များ​ဖြစ်​ကြ​ပြီး သူတို့သည် လူ​တို့ သို့​မဟုတ် အဖွဲ့အစည်း​များ​အားဖြင့် ထိုသို့​ဖြစ်လာ​သည်မဟုတ်​ဘဲ ဘုရားသခင်​က သူတို့ကို ထိုသို့​သတ်မှတ်ခြင်း​ဖြစ်၏။ (ရောမ ၁:၆၊ ၇) ဤ​သန့်ရှင်းသူ​များသည် ကောင်းကင်​အသက်တာ​သို့ ရှင်ပြန်ထမြောက်​သည်​နှင့် ခရစ်တော်​နှင့်အတူ မြေကြီးပေါ်​ရှိ တည်ကြည်သူ​များ​ကို ကောင်းချီး​ပေး​ကြ​ပါ​လိမ့်​မည်။ (ဧဖက် ၁:၁၈-၂၁)—၉/၁၅၊ စာမျက်နှာ ၅-၇။

• ရှေး​ဂရိ​နိုင်ငံ​မှ အားကစား​ပြိုင်ပွဲ​များ​အကြောင်း သိရှိ​ထားခြင်း​က ခရစ်ယာန်​များ​အတွက် အဘယ်​တန်ဖိုး​ရှိ​နိုင်​သနည်း။

တမန်​တော်​ပေတရု​နှင့် ပေါလု​တို့၏​စာစောင်​များ​တွင် ရှေး​အားကစားပွဲ​များ​ကို အခြေပြု​သည့် ပုံ​ဥပမာ​များ သို့​မဟုတ် အရိပ်အမြွက်​ဖော်ပြချက်များ ပါရှိ​၏။ (၁ ကောရိန္သု ၉:၂၆; ၁ တိမောသေ ၄:၇; ၂ တိမောသေ ၂:၅; ၁ ပေတရု ၅:၁၀) ရှေး​အားကစားသမား​တစ်ဦး​အတွက် နည်းပြ​ကောင်း​တစ်ဦး​ရှိဖို့၊ ချုပ်တည်း​ခြင်း​ရှိဖို့​နှင့် ကောင်းစွာ​ကြိုးစား​အားထုတ်မှု​ရှိဖို့ အရေးကြီး​၏။ ယနေ့ ခရစ်ယာန်​များ​၏ ဝိညာဉ်​ရေး ကြိုးစား​အားထုတ်မှု​များနှင့်​ပတ်သက်​၍​လည်း ထပ်တူ​ပင်​ဖြစ်သည်။—၁၀/၁၊ စာမျက်နှာ ၂၈-၃၁။

• တိုင်းတစ်ပါး​တွင် သားသမီး​များ​ကို မွေးမြူခြင်း​၏ စိန်ခေါ်ချက်​များနှင့် အကျိုးကျေးဇူးများ​ကား အဘယ်နည်း။

ကလေး​များစွာ​သည် ဘာသာ​စကား​အသစ်​ကို မိဘများ​ထက် ပို​၍​လျင်မြန်​စွာ တတ်သိလာ​ကြသည်၊ ထို​အခါ မိဘများသည် သားသမီး​များ​၏ တွေးခေါ်​စဉ်းစား​မှု​နှင့် တုံ့ပြန်မှု​တို့ကို နားလည်​ရ​ခက်​လာပေမည်။ ထို့​ပြင် သားသမီး​များသည် မိဘ​၏​ဘာသာ​စကား​ဖြင့် ကျမ်းစာ​သွန်သင်ချက်​များ​ကို အလွယ်တကူ သဘောမပေါက်​နိုင်​တော့​ချေ။ သို့​တိုင် မိဘများသည် မိမိတို့​ဘာသာ​စကား​ကို သားသမီး​များ​အား သွန်သင်ပေး​သည့်​အခါ မိသားစု​နှောင်ကြိုး ခိုင်ခံ့​လာနိုင်​သည်၊ သားသမီး​များသည် ဘာသာ​စကား​နှစ်မျိုးကို သိရှိ​လာပြီး ယဉ်ကျေးမှု​နှစ်မျိုး​နှင့် အကျွမ်းတဝင်​ရှိကြ​ပေမည်။—၁၀/၁၅၊ စာမျက်နှာ ၂၂-၆။

• ဝန်ချ​တောင်းပန်​ခြင်း​ကို သင်ယူခြင်း​သည် အဘယ်ကြောင့် အရေးကြီး​သနည်း။

စိတ်ရင်းမှန်​ဖြင့် ဝန်ချ​တောင်းပန်​ခြင်း​သည် ပျက်ပြား​နေသော ဆက်ဆံ​ရေး​ကို ပြန်လည်​ကောင်းမွန်​စေသည့် နည်း​တစ်နည်း​ဖြစ်၏။ ဝန်ချ​တောင်းပန်​ခြင်း​၏​တန်ခိုး​နှင့်​ဆိုင်သော ပုံသက်သေ​များ​ကို သမ္မာကျမ်းစာ​တွင် တွေ့ ရှိ​ရသည်။ (၁ ဓမ္မ​ရာဇဝင် ၂၅:၂-၃၅; တမန်​တော် ၂၃:၁-၅) တစ်ခါတစ်ရံ၊ လူ​နှစ်ဦး မသင့်မတင့်​ဖြစ်သော​အခါ နှစ်ဖက်စလုံး​သည် အနည်း​နှင့်​အများ အမှား​မကင်း​ကြ​ပေ။ ထို့​ကြောင့် အပြန်အလှန်​အလျှော့ပေး​ပြီး ဝန်ချ​တောင်းပန်​ဖို့​လို​သည်။—၁၁/၁၊ စာမျက်နှာ ၄-၇။

• ငွေ​အနည်းငယ်​ဖြင့်​ပင် လောင်းကစားခြင်း​သည် အဘယ်ကြောင့်​မှား​သနည်း။

လောင်းကစားခြင်း​သည် သမ္မာကျမ်းစာ​က ပြစ်တင်​ရှုတ်ချ​ထားသော ကိုယ်ကျိုးရှာ​ခြင်း၊ ပြိုင်ဆိုင်​လို​စိတ်​နှင့် လောဘ​ကြီးခြင်း​တို့ကို နှိုးဆွ​ပေး​နိုင်၏။ (၁ ကောရိန္သု ၆:၉၊ ၁၀) လောင်းကစား​စွဲ​နေ​သူ​အများ​သည် ငယ်​စဉ်​က လောင်း​ကြေး​အနည်းငယ်​ထိုး​ရာ​မှ စတင်​ခဲ့​ကြသည်။—၁၁/၁၊ စာမျက်နှာ ၃၁။

• သမ္မာကျမ်းစာ​စောင် အများစုကို ဂရိ​ဘာသာ​စကား​ဖြင့် ရေးသားခဲ့​ရာ ကျမ်းစာ​ကို ဂရိ​ဘာသာ​စကား​သို့ ပြန်ဆို​ဖို့ အဘယ်ကြောင့်​လိုအပ်​ခဲ့​သနည်း၊ အဘယ်​အကျိုး​ရလဒ် ရရှိခဲ့​သနည်း။

ခေတ်​သစ်​ဂရိ​ဘာသာ​စကား​သည် ဟေဗြဲ​ကျမ်း​စာစောင်​များ​၏ စက်ပ်တွားဂျင့်​ဘာသာပြန်​ကျမ်း​၏ ဂရိ​ဘာသာ​စကား​နှင့်​လည်းကောင်း၊ ခရစ်ယာန်​ဂရိ​ကျမ်း​စာစောင်​များ​၏ ဂရိ​ဘာသာ​စကား​နှင့်​လည်းကောင်း သိသိသာသာ ကွဲပြား​ခြားနား​သည်။ မကြာသေးမီ ရာစုနှစ်များ​က သမ္မာကျမ်းစာ​၏ စာစောင်​အချို့ သို့​မဟုတ် တစ်အုပ်လုံး​ကို အရပ်​သုံး​ဂရိ​ဘာသာ​စကား​သို့ ပြန်ဆို​ရန် အကြိမ်ကြိမ်​ကြိုးစား​ခဲ့​ကြသည်။ ယနေ့ ကျမ်းစာ​တစ်အုပ်လုံး​အနေ​နှင့်​ဖြစ်စေ၊ အစိတ်အပိုင်း​အနေ​နှင့်​ဖြစ်စေ သာမန်​ဂရိ​များ ဖတ်ရှု​နားလည်​နိုင်သော ဘာသာပြန်​ကျမ်း ၃၀ ခန့်​ရှိသည်၊ ယင်း​တို့​အနက် ထင်ပေါ်​ကျော်ကြား​သည့် ကျမ်း​တစ်စောင်​မှာ ၁၉၉၇ ခုနှစ်​တွင် ထုတ်ဝေ​ခဲ့​သော သန့်ရှင်းသော​ကျမ်း​စာစောင်​များ​၏ ကမ္ဘာသစ်​ဘာသာပြန်​ကျမ်း ဖြစ်၏။—၁၁/၁၅၊ စာမျက်နှာ ၂၆-၉။

• ဆယ်ဖို့တစ်ဖို့​ပေးခြင်း​သည် ခရစ်ယာန်​များ​အတွက် အဘယ်ကြောင့် မလို​အပ်​သနည်း။

ရှေး​ဣသရေလ​လူမျိုး​ကို ပေး​ခဲ့​သော ပညတ်တရား​အရ ဆယ်ဖို့တစ်ဖို့​ပေးခြင်း​ဖြင့် လေဝိ​သားများ​ကို ထောက်ပံ့​ကူညီ​ပေးဖို့​နှင့် ဆင်းရဲသူ​များ​ကို ကြည့်ရှု​စောင့်ရှောက်​ဖို့​ဖြစ်သည်။ (ဝတ်ပြုရာ ၂၇:၃၀; တရားဟောရာ ၁၄:၂၈၊ ၂၉) ပူဇော်ရာ​ယဇ်​အဖြစ် ယေရှု​သေဆုံး​ခဲ့​ခြင်း​က ပညတ်တရား​နှင့် ၎င်း​၏​ဆယ်ဖို့တစ်ဖို့​ပေးခြင်း တောင်းဆိုချက်​ကို ပယ်ဖျက်​လိုက်​၏။ (ဧဖက် ၂:၁၃-၁၅) အစောပိုင်း​အသင်းတော်တွင် ခရစ်ယာန်​တစ်ဦးချင်း​စီ​အတွက် ချမှတ်​ထားသော​စံနမူနာ​မှာ မိမိ​တတ်နိုင်​သလော​က်​နှင့် စိတ်​ရှိသည့်အတိုင်း ပေးကမ်း​ရန်ဖြစ်​သည်။ (၂ ကောရိန္သု ၉:၅၊ ၇)—၁၂/၁၊ စာမျက်နှာ ၄-၆။

• နောက်ဆုံး​စမ်းသပ်​ချိန်​တွင် စာတန်​သည် အတိုင်းမသိ​များပြား​သော​သူများကို လှည့်ဖြား​လိမ့်​မည်​ဟု ဗျာ. ၂၀:၈ က​ဆိုလို​ပါသလော။

လှည့်ဖြား​ခံရ​မည့်​သူများ​သည် “သမုဒ္ဒရာ​သဲလုံး​နှင့်​အမျှ​များ” လိမ့်​မည်​ဟု ထို​ကျမ်းချက်​က​ဆို​သည်။ သမ္မာကျမ်းစာ​တွင် ထို​အသုံးအနှုန်း​သည် အလွန်​များပြား​မှု​ကို​မဆိုလို​ဘဲ မသိနိုင်​သည့်​အရေအတွက်​ကို ဆိုလို​လေ့​ရှိသည်။ “သမုဒ္ဒရာ​သဲလုံး​ကဲ့သို့” ဖြစ်လာ​မည့် အာဗြဟံ​၏​အမျိုးအနွယ်​သည် နောက်ဆုံး​တွင် ယေရှု​ခရစ်​အပြင် လူပေါင်း ၁၄၄,၀၀၀ ဖြစ်လာ​၏။ (ကမ္ဘာဦး ၂၂:၁၇; ဗျာ. ၁၄:၁-၄)—၁၂/၁၊ စာမျက်နှာ ၂၉။